ኢሳያሳ ቲንቢቴ 54 - Geeshsha Maxaafa

Xiyoones Sinththafe Yaana Bonchcho

¹ GODAY, «Hanne maynne maccassayee, naa yela eronttaare yexxa; ilili gaada ufayssan waassa; hanne miixatta eronttaare, ba azinara dizaari naytappe azinay aggidaari nayti darana» gees.

² Ne dunkaane essanaaso aassa; ne dunkaane magalashatakka aassa tola; xuunththofa; ne wodorota adussa; dhishketakka minththa essa.

³ Neni ushachcha baggaranne hadirsa baggara aakkana; ne zareti kawoteththata laattana; histtidi aykkoy baynda istta katamatan istti daana.

⁴ «Aykkoy baa babbofa; ne yeellatakka; hirgofa; ne kawuyaka; ne yelagateththa yeellaa neni dogana; ne am7eteththaa borokka hayssafe sinththan hassa7akka.

⁵ Nena medhdhidayssi nees azina; iza sunththayka Ubbaafe Wolqqama GODAA. Nena wozziday Isra7eele Geeshsha; izi biitta ubbaa Xoossa geetettees.

⁶ Naateththan ekkidi kadhida machchi mala; neni wozina meqqidanne kadhettida machchi mala; gido attiin GODAY nena guye zaari xeygana» gees Xoossay.

⁷ «Guuththa wode tani nena aggadis; gido attiin gita qadhetan ta nena zaara shiishshana.

⁸ Ta guuththa wodes keeha hanqettida gishshas, ta ayfeso neeppe genththadis; gido attiin ta mernaa kiyateththan nees qadhettana» gees nena Wozziza GODAY.

⁹ «Hayssi taas Nohe wode haaththi biitta zaari dhayssontta mala ta caaqqoyssaththo ha7ikka ne bolla zaarada hanqettontta malanne seerontta mala ta caaqqadis.

¹⁰ Zumati qaaxxiko, zumbullati ba dizasoppe kichchikokka, nees diza ta siiqoy qaaxxenna; nenara ta caaqqida saroteththa qaalay laalettenna» gees nena maariza GODAY.

¹¹ GODAY, «Hanne un7ettida katamayee! Gote carkon shocettidaaree! minettonttaaree! Be7a, tani nena bonchchettida shuchchatan alleqissa keexxana; semppere shuch nees yoch yeggana.

¹² Tani ne qustte zo7o inqqun, ne pengeta xolqiza inqqutan, ne dirsata bonchchettida shuchchatan ooththana.

¹³ Ne attuma nayti ubbay GODAAPPE tamaardayta gidana; ne nayta saroteththika darana.

¹⁴ Neni xilloteththan minna eqqana; gene ogera aysoy neeppe haakkana. Nena babisiza miishshi deenna; shiroteththi neeppe haakkana; ne matakka shiiqenna.

¹⁵ Oonikka nena qohikko, hessi taappe gidenna; nena qohiday diikko ne sinththan kundana;

¹⁶ «Be7a, xiifay taman bonqqana mala womppiina punnizayssa, ola miish qoxxiza wogace medhdhiday tana. Qasse bash gaththana mala medhdhidaykka tana; bashshizayssa medhdhidaykka tana.

¹⁷ Nena qohanaas oosettida miishshi ooththenna. Nena mootiza inxars ubbaa ne laththana; hessa gishshas GODAA aylleta xinxxoy hayssa; istti taappe demmana anjjoy hessa» gees.