ኢሳያሳ ቲንቢቴ 52 - Geeshsha Maxaafa

Xoossay Yerusalaame Ashshana

¹ Hanne Xiyoone denda; denda; wolqqa may7a; geeshsha katamaye Yerusalaamee! Ne bonchcho may7o may7a; hayssafe guye qaxxarettonttaynne tunay ne giddo gelenna.

² Hanne Yerusalaame, denda; gudullaa pitta; ne araatan utta. Di7ettida Xiyoone nayee, ne qoodhen qashettida sansalata kessa yegga.

³ GODAY, «Intte coo hada bayzettideta; ha7ikka miishshi baynda coo intte wozzettana» gees.

⁴ Ubbaa Haariza GODAY, «Koyro ta derey de7anaas duge Gibxe wodhdhides; guyeppe Asoorey gaasoykka baynda un7eththi haarides.

⁵ ‹Histtiin ta derey gaasoykka baynda di7etti biichchiin taas haan aazi dizee?› Istta haaridayti istta bolla qilccida; gallas kumeth ta sunththaa pacey baynda cayeettes.

⁶ Hessa gishshas ta derey ta sunththaa erana; he gallas kasekka yootiday tana gididayssa istti erana. Ee hessi tana» gees.

⁷ Zuma bolla eqqida tohoti, mishiraachcho ekki yiza tohoti, saroteth yootizayti, lo7o mishiraachcho yootizayti, atoteth awajjizayti, Xiyoonokka, «Ne Xoossay kawotides» giza tohoti ay mala lo7o!

⁸ Hanne siya! Nena naagiyzayti bantta qaala dhoqqu histtida. Issi bolla ililishe yexxeettes; GODAY Xiyoone simmiza wode, istti iza bantta ayfera be7ana.

⁹ Intteno Yerusalaamen qolettida sohotoo! Intte issi bolla ililisan yexxite; GODAY ba deraa minththeththides; Yerusalaame katamaakka wozzides.

¹⁰ GODAY ba geeshsha qesaa kawoteththata ubbaa sinththan qonccisana; qasse biittaa gaxan diza ubbayka nu Xoossaa atoteththaa be7ana.

¹¹ Intteno GODAA keeththa miishshata tookkizaytoo! Shaakettite, shaakettite; heeppe kezite. Tuna miish bochchofte; heeppe kezite; intte hu7esikka geeyte.

¹² Gidikkoka eeson kezekketa; woykko beti beekketa; GODAY inttefe sinth aadhdhidi inttena kaaleththana; Isra7eele Xoossayka guyera inttena naagana.

Metoy Iza Gakkiza Oosanchcha

¹³ GODAY, «Be7ite, ta ashkaray akeekan ooththana; izi erettidaade gidana, izi dhoqqu dhoqqu gaana; izi keehi bonchchettana.

¹⁴ Daro asay izan dagamanaashe gakkanaas as ubbaafe qohettida gishshas iza medhay asa medhappe laamettides.

¹⁵ Hessa gishshas izi daro kawoteththata malalisana; iza gaason kawoteththati bantta doona oykkana; isttas yootettonttayssa istti be7ana; istti siyi erontta miish akeekana» gees.