ኢሳያሳ ቲንቢቴ 5 - Geeshsha Maxaafa

Woyne Tokkiza Gade Gishshas Yootettida Ginxo

¹ Tani ta siiqo laggeza gishshassinne iza woyne turaa tokkizasoho gishshas siiqo mazamure yexxana. Tani siiqiza laggezas aradda zumbullan woyne turaa tokkizasohoy dees.

² Biitta bookkidi, shuchchaa qori kessidi, ubbaafe lo7iza woyne turaa tokkides; histtidi iza naaganaas shakko giigsides; woyne ushshu gum7izasoho olla bookki giigsides. Hessafe guye lo7o ayfe ayfana giidi naagides; gido attiin caala phanqida ayfe ayfides.

³ Histtiin ta siiqoy, «Intteno Yerusalaamen de7izaytoo! Intteno Yuhuda asatoo! Taappenne ta woyne turaa tokkiza sohozappe giddon de7iza yo7oza ane ha7i intte pirdite.

⁴ Tani ta woyne turaa sohozasi ooththidayssafe hara ay ooththanayssi attidee? Izi lo7o ayfe ayfana gaada ta naagishin ays caala phanqida ayfe ayfidee?

⁵ Ha7i tani ta woyne tokkiza gadeza bolla ooththanaaz inttes yootays. Dirsaa shoddana; izikka dhayana mala ooththana; Tani gimbeza laallana; he sohoykka durettana.

⁶ Tani he sohoza mago biitta ooththana. He turay xunqqettenanne bul7ettenna; Histtiin kindichchoynne agunththi izan mokkana. Iray izan bukkontta mala, tani shaarata azazana» gides.

⁷ Ubbaafe Wolqqama GODAA woyne tokkiza gadey Isra7eele asaa. Yuhuda asay izi ufayettiza atakilte. Istti suure pirda pirdana giidi naagides; gido attiin suuth gussishin be7ides. Izi xilloteth koyides; gido attiin meto waaso siyides.

⁸ Haratas sohoy dhayanaashe gakkanaas, keeth keeththa bolla gujjizaytoo! Gade gadera gaththi oyththidi, intterkka xalla biittaa bolla aakki de7izaytoo! Inttes aayye ana!

⁹ Ubbaafe Wolqqama GODAY tani ta hayththara siyishin, «Gita keeththati kayzi attana; he lo7o keeththatan de7anaas asi dhayana.

¹⁰ Tammu waaxa booratan tokkida woyne ayfeppe issi oto gidiza woyne ushshi xalla ke7ana; tammu qun7a kath zeriin issi qun7a kaththi xalla ayfana» gides.

¹¹ Maththosiza ushshu koyanaas maalado guurara dendidi woyne ushshan xuugettana gakkanaas, sa7aa qamisizaytas aayye ana!

¹² Istta gibirasohon maasinqoy, diiththi, karabey, susul7eynne woyne ushshi dees; gido attiin istti GODAA oosozas wudettibeettenna; izi ba kushen ooththida oosokka bonchchibeettenna.

¹³ Histtiin ta Derey akeeka dhayda gishshas di7etti baana; istta shuumeti koshan hayqqana; istta dere asaykka haaththa saamon xuugetti hayqqana.

¹⁴ Duufoy ba gomppa aassadus; ba doonaakka zawappe bollara doyadus; Yerusalaamen de7iza gita asatinne hankko derey, wocamizaytanne guppizayta issi bolla mittana.

¹⁵ Asi ubbay tooshettananne kawuyana; otoranchchati ubbay yeellatana.

¹⁶ Gido attiin Ubbaafe Wolqqama GODAY, suure pirdan dhoqqu dhoqqu gaana; geeshsha Xoossay ba geeshshateththaa ba xilloteththan bessana.

¹⁷ He wode dorsati bantta qooron heemettiza mala heemettana; dorsa laaqqati laalettida dureta keeththata sohon maata maana.

¹⁸ Cimo wodoron nagaraa goochchizaytas, para-gaare wodoron iitateth goochchizaytas aayye ana!

¹⁹ «Nuni nu ayfera be7ana mala ane Xoossi elelo! Ba oosokka eesoso! Nuni erana mala Isra7eele Geeshshay qoppida qofay matan poletto» gizaytas aayye ana!

²⁰ Iitaa lo7o, lo7oza iita gizaytas, dhumaa poo7o poo7oza dhuma ooththizaytassinne cammizayssa mal7o, mal7izayssa camo ooththizaytas aayye ana!

²¹ Banttana barkka, «Tani aadho eranchcha! Tani qara gidikkinaa!» gi qoppizaytas aayye ana!

²² Woyne ushshan erettidaytassinne maththosiza ushshu walakkanaas goobizaytas aayye ana!

²³ Matta7e ekkidi, mooranchchata xillisizaytassinne xillo asatasi suure pirdaa diggizaytas aayye ana!

²⁴ Istti Ubbaafe Wolqqama GODAA wogaa ixxida gishshas, Isra7eele Geeshshaa qaalaakka kadhida gishshas, tama lacoy buuxa oykkiza malanne mela maatay eexxi dhayza mala istta xaphoy wooqqana; istta ciishshayka buhe mala laaletti dhayana;

²⁵ GODAA hanqoy iza deraa bolla eexxi ke7ides; izi ba kushe denththidi istta shocides. Zumati qaaxxida; hayqqida asaa ahay oge bolla pitti yeggida buura mala gidides; histti pe7iinkka iza hanqoy simmibeenna; iza kushey ha7ikka dendida mala dees.

²⁶ GODAY haakon de7iza kawoteththatas malaata dhoqqan essees; sa7a gaxan de7iza morkketaska wayqees; isttika eeson bichcharishe puttu gaana.

²⁷ Istta giddon daaburanchchaynne wobbey deenna; Isttafe issoynne dhiskennanne ichchenna. Xeessan gixxida qabattoyka birshettenna; Istta caammaa dafoykka duuxxenna.

²⁸ Istta yiishshay hoxe; istta wondafeykka waaxetti uttides. Istta parata qinccafilley zaalla shuchcha mala; istta para-gaareta erzoykka gote mala.

²⁹ Istta xaagoykka gaammo xaago mala; wodalla gaammota mala xaaggeettes; banttas miza miish shankkati oykkidi xaaggeettes; istti oykkidayssa tookki ekki beettes; isttafe woththi ekkanay oonikka deenna.

³⁰ He gallas istti gita abba dambala mala, Isra7eele bolla guummana; oonikka duge zaari biittaa xeelliko dhumanne meto be7ana; poo7oykka shaaran kamettana.