ኢሳያሳ ቲንቢቴ 49 - Geeshsha Maxaafa

Godaa Oosanchcha

¹ Intteno harurotoo, ta gizayssa siyite. Intteno haahon diza kawoteththatoo, hayssa ezgite. Tani ta aayi ulon dishin GODAY tana xeygides; ta yelettontta dishin tana ta sunththan xeygides.

² Ta inxarsaa giththa mashsha mala qarasides; ba kushe kuwan tana genththides; izi tana hoxe yiishsha mala ooththides; histtidi ba kooho giddon tana qottides.

³ Izi tana, «Isra7eele ne ta aylle, tani ta bonchcho nenan qonccisana» gides.

⁴ Gido attiin tani, «Tani mela coo daaburadis; go7ay baynda coo hada miishshan ta wolqqa wursadis; gidikkoka ta oosozas kushe zaaranay GODAA; ta waagaykka ta Xoossa matanna» gadis.

⁵ Ha7i tani GODAA ayfe sinththan bonchchettadis; Xoossay taas wolqqa gidides; tani Yaaqoobe izakko zaarana mala, Isra7eele izakko shiishshana mala ooththida GODAY ha7ikka zaaridi,

⁶ «Neni taas oosanchcha gideththi, Yaaqoobe qommota ne zaaranayssinne ta naagida Isra7eele zaarada ne ehanayssi hessi nena deexxenna; qasseka ta atoteththaa biitta gaxa ne gaththana mala, tani nena kawoteththatas poo7o histtana» gees.

⁷ Kadhettidayssassinne kawoteththan ixettidayssas, dere haarizayta ashkara gidida nees, GODAY, Isra7eele ashshiza Geeshshay, «Kawoti nena be7idi dendi eqqana; kawo nayti nena be7idi nees ziggana; gaasoykka nena doorida GODAY, Isra7eele Geeshshay ammanettidaade» gees.

Isra7eele Zaari Eso

⁸ GODAY, «Tani doorida wode ne oyshaa zaarana; atoteththa gallas tani nena maaddana; deraas caaqo qaala gidana mala, biittayokka ne zaara essana mala, kase biitta yeggi dhaydaytas istta xinxxo ne zaara immana mala, ta nena maaddana; ta nees ooththana.

⁹ Neni di7ettidayta, ‹Haa kezite!› dhuman dizayta, ‹Poo7on kezite› gaana mala ta ooththadis. Istti ogey dizason dizason kath maana; aykkoy baynda zumbulla bolla heemettizaso demmana.

¹⁰ Istti gafettettenna woykko saamettettenna; istta bazzo biitta seelay woykko awa seelay qohenna. Isttas qadhettizay istta kaaleththana; haaththa pulttoy dizason istta heemmana.

¹¹ «Ta zumata ubbaa oge kessana; ta wogga ogetikka dhoqqu gaana.

¹² Hekko istti haaho dereppe yaana; issi issineti pudehappe, baggayti arshey wulliza baggafe, hankko attidayti Sinimeppe yaana» gees.

¹³ Salotoo intte, ilili giite; biittayee neni ufayetta. Intteno Zumatoo ufayssan yexxite; gaasoykka GODAY ba deraa minththeththees; metotanchchatas qadhettees.

¹⁴ Xiyoona gidikko, «GODAY tana aggides; GODAY tana balides» gadus.

¹⁵ GODAY, «Aaya ba dhanththiza naa balanaas dandayazee? ba yelida naas qadhettekee? oonee erizay iza balana dandayawus; tani gidikko nena balikke.

¹⁶ Hekko tani nena ta kushe qaa7an xaafadis; ne dirsa gimbetikka ubbatoo ta sinththan deettes.

¹⁷ «Ne attuma naytikka eeson simmana; nena laallidayti neeppe baqatana.

¹⁸ Ane dhoqqu gaada ne yuusho xeella; ne nayti ubbay issife shiiqidi neekko yaana. Tani GODAY ta de7on caaqqays; neni istta ubbaa alleqo mala may7ana; ne istta mishira may7o mala may7ana» gees.

¹⁹ «Ne laalettada bula gidikkoka, ne biittay mulera dhaykkoka, hach neni ne derezas xunth gidikkoka, nena mittidayti neeppe haakkana.

²⁰ Ceece wode ne yelida nayti, ne hayththi siyishin, ‹Hayssi gadey nuus keehi xuummides; nu daanaas nuus gidizaso imma› gaana.

²¹ Neni ne wozinan, ‹Hayta taas yeliday oonee? Tani ceecizaadenne maynne; tani goodettidaadenne ixettidaade gida dishin haytantta dichchiday oonee? Tani tarkka attadis shin histtiin haytanti awappe yidoo?› gaasa» gees.

²² Ubbaa Haariza GODAY, «Be7a, tani kawoteththata malatan xeygana; tani ta bandira asaas dhoqqu histta essana; ne attuma nayta istti idimmi ehana; ne macca naytakka bantta hashen tookkidi ehana.

²³ Kawoti nena dichchiza aawata gidana; istta machcheti nena dichchiza aayeta gidana; istti gufannidi nees goynnana; ne toho bollafe baanaakka laaccana; nekka tani GODAA gididayssa erana; tanan hidota ooththizayti yeellatettenna» gees.

²⁴ Di7i ekkida miish olanchchatappe guye zaaranaas, di7etti bidayta menxe iitata kusheppe ashshanaas dandayettizee?

²⁵ Gido attiin GODAY, «Tumukka olanchchati di7i efida miish kessi ekkanaas, menxe iitata kusheppe di7ettidayta ashshanaas dandayettees; nenara olettizaytara ta olettana; ne naytakka tani ashshana.

²⁶ Nena un7eththizayti banttarkka ba asho maana; woyne ushshan maththottiza mala banttarkka ba suuththan maththottana; hessafe guye asa zereth ubbay, tani GODAA, nena Ashshizayssa, nena wozzizayssanne Yaaqoobe Wolqqama gididayssa hessan erana» gees.