ኢሳያሳ ቲንቢቴ 48 - Geeshsha Maxaafa

Simmontta Ixxida Isra7eele

¹ GODAY, «Intteno Isra7eele sunththan xeygettida, Yaaqoobeso asatoo! Yuhuda zareppe beettidaytoo! Intteno GODAA sunththan caaqqizaytoo! tumateththaninne xilloteththan gidontta, Isra7eele Xoossaa xeygizaytoo! Hayssa siyite.

² ‹Nuni geeshsha katamayn dizayta› giidi intterkka inttena xeygizaytoo! Isra7eele Xoossan ammanettizaytoo! GODAY Ubbaafe Wolqqama Xoossay gizayssa siyite.

³ «Kase hanida miishshata tani daro wodeppe sinththan yoota woththadis; ta doonappe kezides. Istti erettana malakka tani ooththadis; ta dingate ooththiin isttika polettida.

⁴ Ne ay mala simmontta as gididaakko ta erays; ne morge shayay birata mala, ne konkkey xarqimala misatees.

⁵ Hessa gishshas hayta ha yo7ota beni ta nees yootadis; istti polettanaappe sinththan ta nena erisa woththadis; hessika, ‹Ta eeqa xoossati hayssa ooththida; miththafe masettida misletinne biratappe oosettida ta xoossati hayssa taas azazida› gontta malassa.

⁶ «Hayta ha yo7ota ne siyadasa; ane ubbaaka xeella; istti likke gididayssa neni ne hu7era markkattikii? Ha7ippe doommada ooraththa miishshata, neeppe geemmidaytanne ne erontta yo7ota ta nees yootana.

⁷ Heyti ha7i medhettida attiin kase gidenna; istta gishshas ne hachchife attiin kase siyabeekka; hessa gishshas, ‹Ee, ta istta gishshas erays› gaana dandayakka.

⁸ Neni siyabeekka woykko erabeekka; ne hayththi benippeka doyettibeenna. Gaasoykka neni kasekka cimmizaadenne naateththafe doommada ne makkallanchcha geetettidayssa ta eradis.

⁹ «Ta sunththaa gishshas gaada tani ta hanqo gam7isana; ta galata gishshas gaada ta neeppe teqqana; ta nena qanxxontta aggana malassa.

¹⁰ Be7a bira mala gidontta aggikokka nena gaccadis; tama mala meton paaccadis;

¹¹ Ta gishshas gaada, tani ta gishshas gaada ooththays. Tarkka tana wostta kawushshateththas aaththa immoo? Ta bonchcho oonaska immike.

Xoossi Doorida Oosanchcha

¹² «Nenoo Yaaqoobe, tani xeygida Isra7eele tani gizaa siya. Tani iza; koyroykka tana; wurseththayka tana.

¹³ Biittaas yoch yeggiday ta kushe; salota micciday ta ushachcha kushe. Ta istta xeygiza wode istti ubbayka issi bolla eqqeettes.

¹⁴ «Intte ubbayka issi bolla shiiqidi siyite; eeqa xoossatappe kase haytantta yootiday oonee? GODAAS doorettida laggey izi Baabiloone bolla halchchidayssa polana; iza qeseykka Baabilooneta bolla gidana.

¹⁵ Tani tarkka yootadis; tumukka ta xeygadis; ta iza ehana; iza oosoykka izas polettana.

¹⁶ «Taakko haa shiiqidi hayssa siyite; tani koyroppe doommadakka geeman haasayabeekke; izi polettishin ta heen days» gees. Ha7ikka Ubbaa Haariza GODAYNNE iza Ayanay tana kiittida.

¹⁷ GODAY nena Wozzida Isra7eele Geeshshay, «Tani GODAA ne Xoossay, nena go7izaaz tamaarsizayssa, baanaas bessizaa ogera nena kaaleththizay tana.

¹⁸ Neni ta azazo siyidaa gididaakko, nees saroteththi shaafa mala, nees xilloteththika abba dambala mala gidanashin.

¹⁹ Ne zereththi abba shaamintta mala, ne naytikka qooday baynda gudulla mala gidanashin; istta sunththi qucettenna; ta sinththafe dhayettennashin» gees.

²⁰ Baabiloone biittafe kezite; Baabiloone asaappe baqatite! Hayssa ililisan erisite; awajjite; biitta gaxa gakkanaas yootite; «GODAY ba ashkaraa Yaaqoobe wozzides» giite.

²¹ Izi istta bazzo biittara kaaleththishin istti saamettibeettenna. Izi isttas zaallafe haath pulttisides; izi zaallaa phalqides; haaththika dhuuqqi kezides.

²² «Iitatas saroy baa» gees GODAY.