ኢሳያሳ ቲንቢቴ 47 - Geeshsha Maxaafa

Baabiloone Bolla Yaana Pirda

¹ GODAY, «Hanne Baabiloone geela7oyee, gudulla bolla wodhdha utta; hanne Baabilooneta nayee, ne araataappe wodhdha; biittan utta; hayssafe guye neni mala lo7onne dalqidalqa geetetta xeygettaka.

² Woxa ekkada kath gaacca; Ne goossaa qaara; ne qamisaza qaara; ne xifaa bessa; gadigadashe shaafaa pinna.

³ Ne kalloteththi qoncco; yeellachchiza ne kalloy beetto; tani halo makkana; ta oonakka aggike» gees.

⁴ Nuna Wozziza Isra7eele Geeshshaas, sunththay Godaa Ubbaafe Wolqqama Xoossa.

⁵ «Hanne Baabilooneta nayee, dhumaso gelada co7u ga utta; hayssafe guye ne kawoteththata godatteyo geetetta xeygettaka.

⁶ Tani ta deraa hanqettadis; tani xinxxozakka tunisadis; tani istta ne kushen aaththa immadis. Neni gidikko isttas qadhettabeekka; cimmidayta bollaka keehi deexo qambara woththadasa.

⁷ Neni, ‹Tani mernaas godatto gidana› gadasa. Gido attiin haytantta akeekabeekka; istta wurseththi ay gidanaakko qoppabeekka.

⁸ «Hanne ishalo duus dizaaree! Nerkka nenan ammanetta uttidaaree! Ne wozinan, ‹Tana; taappe attiin haray baa. Hannife guye tani am7o gidikke; yelada dhoommidaaro gidikke› gizaaree siya!

⁹ Ha nam7u yo7oti, am7eteththinne yeli dhonththi qofay baynda issi gallas ne bolla gakki wodhdhana; ne ay keena bitikkoka, ne ay keena muurennikokka istti ne bolla kumeththa wolqqara yaana.

¹⁰ Neni ne iitateththan ammanettada, ‹Tana ooninne be7enna› gadasa. Qasse, ‹Tana; taappe attiin haray deenna ne gida wode ne aadho erateththaynne cinccateththi nena baleththida› gadasa.

¹¹ Bashshi ne bolla yaana; neni wostta muurenna zaaranaakko erakka; ne qanxxo immada ne dandayontta qohoy ne bolla gakkana. Ne qoppontta metoy ne bolla dingate yaana.

¹² Hekko be7a; neni naateththafe doommada ooththashe daaburda bitatanne daro muurennota gujja gujja ooththa; oonee erizay nees hananaakko, oonee erizay neni ne morkketa shirosanaakko?

¹³ Ne ekkida zore ubbay nena daaburara ashshides; aginappe agina gakkanaas xoolintte xeelli kaayizayti, xoolintte taybizayti ane haa yetto; nena gakkiza metoppe ane istti nena ashshetto.

¹⁴ Hekko istti happa mala; tamay istta maana. Tamaa lacoppe dendidayssan bana ashshanaas dandayettenna. Asi ho7ana bonqqoy deenna; uttidi ho7ana tamaykka deenna.

¹⁵ Naateththafe doommada ne isttara daaburdayti, ne isttara zal7idayti, istti ooththana dandayzay hayssa xalla; issoy issoy ba mooro gujji gujji baana; gido attiin nena ashshanay deenna» gees.