ኢሳያሳ ቲንቢቴ 46 - Geeshsha Maxaafa

Baabiloone Xoossata

¹ Beeley kawuyides; Neboy keehi guuxxides; istta eeqa xoossati caana mehetan caanettida; istti oykki yuuyiza misleti tooho; daaburda medosatas deexo ba7o.

² Isttika issi bolla duge gufannana; caanaakka ashshana dandayettenna; isttika di7ettidi baana.

³ GODAY, «Intteno Yaaqoobe soo asatoo! Isra7eeleppe attida ubbatoo! Intte intte aayi ulon shaara attoosafe haa simmiin inttena ta oykkidaytoo! Intte yelettoosofe doommada ta tookkidaytoo! Ta gizaa siyite.

⁴ Intte cimmidi puulumana gakkanaaska inttena tookkizay tana; tani tana; tani inttena medhdhadis; tani inttena tookkana; tani inttena kaafana; ta inttena ashshana.

⁵ «Tana oonara giniseetii? Tana oonara likkiseetii? Nuni issino misatana mala tana oonara geeddareetii?

⁶ Amarda asati worqqa bantta karaxiiteppe qoleettes; biraakka meezaanen geeddareettes; istti seerisi tigiza hiillanchcha qaxxareettes; izikka isttas xoossa histti medhdhees. Isttika izas goynneettessinne yaynneettes.

⁷ Denththidi bantta hashen tookkeettes; zaaridi he denththida sohon woththeettes; izikka heen eqqaa gees; heeppe awakka qaaxxenna; oonikka izakko waassiko zaaro immenna; metoppeka iza ashshenna.

⁸ «Intteno mooranchchatoo! Hayssa akeekite; yuushshika qopite; intte wozinan qum7i oykkite.

⁹ Kase beni wode hanida yo7ota akeekite; tani Xoossa; taappe haray deenna; tani Xoossa; ta malay oonikka deenna.

¹⁰ Wurseththan hananayssa koyrotta, buroppe yaanayssa beni yootadis; ‹Ta halchchoy mino; tana ufayssizaaz ubbaa ta ooththana› gadis.

¹¹ Arshey mokkiza baggafe bonqqiza arganth, haaho biittafe ta qofa poliza as tani xeygana. Ta yootidayssa ta ooththana; ta halchchidayssa ta polana.

¹² «Intteno wozina shuchchatoo, xilloteththafekka haakkidaytoo, tana siyite.

¹³ Tani ta xilloteththaa ehon days; haaho gidenna. Ta atoteththay gam7enna; tani Xiyoone atoteth. Isra7eele bonchcho mayzana» gees.