ኢሳያሳ ቲንቢቴ 45 - Geeshsha Maxaafa

Qiroose Dooreteth

¹ «Ta tiydayssas, ushachchaa ta oykkidayssas, kawota gith birshana malanne kawoteththati iza sinththan haarettana mala, pengeti gordettontta mala iza sinththan pengeta doyanaas Qirooses GODAY,

² Tani ne sinththara baana; zumata baasa ginasana; xarqimala pengeta menththana; birata kolatatakka qanxxana.

³ Nena ne sunththan xeygida GODAY, Isra7eele Xoossay tana gididayssa ne erana mala, geemason dagattida aqota, dhumason diza haaro ta nees immana.

⁴ Ta ashkara Yaaqoobe gishshassinne tani doorida Isra7eele gishshas, ne tana erontta aggikokka tani nena ne sunththan xeygadis; bonchcho sunththika nees immadis.

⁵ Tani GODAA; taappe haray oonikka deenna; taappe hara Xoossi deenna; ne tana erontta aggikokka ta nena minththana.

⁶ Hessika asay arshey mokkizasoppe biidi arshey wullizaso gakkanaas taappe haray bayndayssa erana malassa. Tani GODAA; taappe haray oonikka deenna.

⁷ Tani poo7o ooththadis; dhumakka medhdhadis; ta duresayssinne manqisays; hayssa ubbaa ooththiza GODAY tana.

⁸ Intteno salotoo, bollafe xilloteth bukisite; shaaratikka duge xokisite; biittay doyetto; atoteththi mokko. Xilloteththika izara issife dicco. Tani GODAY hessa medhdhadis.

Xoossay Medheteththassinne Taarikes Goda

⁹ «Mana miishshata giddofe bana medhdhidayssara marshettizayssas aayye ana! Urqqay bana medhdhidayssa, ‹Ne ay ooththay?› gi erizee? Ne ooththiza oosoy, ‹Nees kushey baa› gi erizee?

¹⁰ Ba aawa, ‹Ays tana hayssaththo yeladii?› ba aayo, ‹Ays ne hayssaththo miixattadii?› gizaades aayye ana!

¹¹ «Isra7eele Geeshshay, iza medhdhida GODAY sinththafe hanana hanota gishshas, ‹Ta nayta gishshas tana oychcheetii? Ta kushe oosota gishshas azazeetii?

¹² Sa7a ooththiday tana; asikka izi bolla medhdhadis. Salota tani ta kushen toladis; istta bolla salo medhetata woththadis.

¹³ Tani Qiroose xilloteththan denththana; iza oge ubbaa giigsana; ta katamayo izi zaari essana; di7ettida ta asaa miish qanxxisontta coo izi mela yeddana› » gees GODAY Ubbaafe Wolqqama Xoossay.

¹⁴ GODAY, «Gibxe dureteththinne Tophphiya zal7ey, qasse geesan adus gidida Saaba asatikka neekko yaana; neyta gidana. Istti nena kaallana; sansalatan qashetti neekko yiidi nees goynnana; isttas, ‹Tumappe GODAY nenara dees; izappe attiin hara Xoossi deenna› giidi woossana» gees.

¹⁵ Ashshiza Isra7eele Xoossawu, tumappe neni nena genththiza Xoossa.

¹⁶ Eeqa xoossata medhdhizayti ubbay yeellatana, guuxxana issi bolla kawuyana.

¹⁷ Isra7eeley gidikko GODAAN mernaa atoteth attana; intteka mernaas yeellatekketanne kawuyekketa.

¹⁸ Salota medhdhiday izi GODAA; biitta giigsidi medhdhiday, sa7as yoch yeggiday, iza asa duussaso gidana mala attiin coo mela woththanaas medhdhontta GODAY, Tani GODAA; taappe haray deenna.

¹⁹ Ta dhuma biittan geeman yootabeekke; Yaaqoobe zereththatas, «Tana coo hada koyite» gabeekke. Tani GODAY tuma haasayays; suure yo7o awajjays.

Salonne Sa7aa Medhdhida Xoossaanne Baabiloone Eeqata

²⁰ «Intteno kawoteththatappe beettidaytoo! issife shiiqidi haayite; mata shiiqite. Miththaafe oosettida eeqa xoossaa tookkizaytassinne, ashshanawu dandayontta xoossaa woossizaytas erateththi deenna.

²¹ Ane intte mooto yootite; shiishshite; istti ane issife shiiqidi zoretetto. Hayssa koyrottidi awajjiday oonee? Beni yootiday oonee? Tana GODAA gidikkinaa? Xilloynne Ashshiza Xoossi taappe attiin haray deenna.

²² «Intteno biittaa gaxan de7iza ubbatoo! taakko simmidi attite. Tani Xoossa; taappe attiin haray deenna.

²³ Gulbatey ubbay ta sinththan gulbatana; inxars ubbayka tanan caaqqana; Tani tarkka ta hu7en caaqqadis; guye simmontta qaalay ta doonappe xilloteththan kezides.

²⁴ «Istti ta gishshas haasayshe, ‹Xilloteththinne wolqqay GODAAN xalla dees› gaana» gees. Iza bolla hanqon dendidayti ubbay izakko yiidi yeellatana.

²⁵ Gido attiin Isra7eele zereth ubbay GODAAN xillana; bonchchoka demmana.