ኢሳያሳ ቲንቢቴ 43 - Geeshsha Maxaafa

Xoossa Deraa Ashshizaade

¹ Ha7i gidikko Yaaqoobe, nena medhdhiday, Isra7eele! Nena giigsida GODAY, «Tani nena wozzida gishshas yayyofa. Tani nena ne sunththan xeygadis; neni taassa.

² Neni haaththa giddora pinniza wode, tani nenara gidana. Neni pinnishin shaafay nena mittenna; neni tama giddora bishin nena xuuggenna; tama lacoykka nena meenna.

³ Gaasoykka tani GODAA ne Xoossay, Isra7eele Geeshshay nees dhale; Ta ne gishshas Gibxe wozzo immana; Tophphiyanne Seeba ne gishshas aaththa immana.

⁴ Neni ta sinththan al7onne bonchcho gidida gishshas, tani nena siiqiza gishshas, asaa ne gishshas, kawoteththata ne shemppo gishshas laame immana.

⁵ «Tani nenara diza gishshas yayyofa; tani ne nayta arshey mokkiza baggafe ehana; nena arshey wulliza baggafe shiishshana.

⁶ Tani pudeha bagga, ‹Hamma› dugeha baggaka, ‹Yedda› gaana; ta attuma nayta haahoppe, ta macca naytakka biitta gaxappe,

⁷ ta sunththan xeygettida ubbaa, ta bonchchos ta medhdhidayta, tani giigsidayssanne ta ooththidayssa hammite» gaana.

⁸ Ayfey dishin qooqidayta, hayththika dishin tullidayta kessa.

⁹ Kawoteththati ubbay issife shiiqetto; asaykka issi bolla shiiqo; isttafe kasetidi hayssa nuus yootiday oonee? Beni miish nuus awajjiday oonee? Harati siyidi, «Hayssi tuma» gaana mala, istta tumateththayka qonccana mala bantta markkata ehetto.

¹⁰ «Intte tana erana malanne ammanana mala, izi tana gididayssa intte akeekana mala, ta markkatinne ta doorida ta aylleti inttena. Taappe kase hara xoossi oosettibeenna; taappe guyenkka hara xoossi deenna.

¹¹ Tana; tani GODAA; Taappe attiin hara ashshizay deenna.

¹² Tani qonccisadis; ashshadissinne yootadis; intte giddon hara allaga xoossi de7ibeenna. Tani Xoossa gididayssas intte ta markkatta.

¹³ Beniisofe doommada tani tana; ta kusheppe kessi ekkanay deenna; ta ooththizayssa laammanawu dandayzay oonee?» gees GODAY.

Ammanettontta Isra7eeles Xoossa Maaroteth

¹⁴ GODAY inttena wozziza Isra7eele Geeshshay, «Intte gishshas Baabiloone bolla olanchchata kiittana; istti ceeqettiza markabetan, Baabilooneta ubbaa beettana mala ooththana.

¹⁵ Tani GODAY intte Geeshshay, Isra7eele medhdhida intte kawo» gees.

¹⁶ Abbaa giddora oge, wolqqama haaththa giddora aadhdhizaso kessida GODAY,

¹⁷ para-gaaretanne parata, olanchchatanne mino asata ubbaa ehidi, istti zaari dendontta mala zaqullisida GODAY, muqaadda bidntha mala istta dhayssida GODAY,

¹⁸ «Beni yo7ota hassa7opite; kase aadhdhidayssa balite.

¹⁹ Hekko ta ooraththa miish ooththana; izikka ha7i hanana; intte yuushshi qoppeketii? Tani bazzon oge giigsana; tani aykkoy baynda bazzonkka shaafata kessana.

²⁰ Bazzo do7ati, worakanatinne guttoti tana bonchchana. Tani bazzo biittan haath, aykkoy baynda bazzonkka pultto immana; ta doorida ta deraas haath immana.

²¹ Tani taas giigsida derey ta galataa awajjana mala ta hayssa ooththana.

²² «Yaaqoobe, ne tana xeygabeekka; Isra7eele, ne tana salettadasa.

²³ Neni taas xuugettiza yarshos dors ehabeekka; ne yarshonkka tana bonchchabeekka. Tani nena kaththa yarshon waayisabeekke; exaane yarshonkka saleththabeekke.

²⁴ Neni taas lo7o sawiza exaane shammabeekka; modhdho yarshon tana kalssabeekka. Gido attiin ne nagara tooho tana toossadasa; qohon tana daaburissadasa.

²⁵ «Ta gishshas gaada ne qohoza dhayssizay tani tana; ne nagaraa ta qoppike.

²⁶ Ane kase aadhdhidayssa tana qofsa; ane issife shiiqidi qoodhettoos; ne tumateththaa ane erisa.

²⁷ Ne aawa koyroyssi nagara ooththides; ne astamaaretikka ta bolla makkallida.

²⁸ Hessa gishshas tani ne Xoossa Keeththa halaqata kawushshana; Yaaqoobe bashshas, Isra7eelekka cashshas aaththa immana» gees.