ኢሳያሳ ቲንቢቴ 42 - Geeshsha Maxaafa

Godaa Ashkara

¹ GODAY, «Tani kaafa oykkida ta ashkaray, ta izan ufayettiza muurutay hayssa; tani ta Ayana iza bolla woththadis; izi kawoteththatas suure pirda ehana.

² Waassenna; ba qaala dhoqqisenna; ba cenggurssaaka oge bolla keehi sissenna.

³ Dinccettida maqqa izi menththenna; cuwattiza muqaadda izi toyssenna; ammaneteththan izi suure pirda ehana.

⁴ Izi biitta bolla suure pirda ehana gakkanaas daaburenna; hidotakka qanxxenna; haruroti iza wogan ammanettana» gees.

⁵ Salota medhdhiday, istta miccidaykka, sa7anne izin diza ubbaa giigsiday, ba deres peeno izin de7iza asatas shemppo immiza GODAA Xoossay,

⁶ «Tani GODAY nena xilloteththan xeygadis; ta ne kushe oykkana; ta nena naagana. Tani nena kawoteththaas caaqo qaala, ayzaabetaska poo7o histtana

⁷ Ne qooqeta ayfe doy7ana; di7ettidayta qasho keeththafe birshana; dhuman uttidaytakka karchchallefe kessana.

⁸ «Tani GODAA; hayssi ta sunththa; ta bonchcho haras aaththa immike; ta galataakka eeqa xoossatas sheedhdhike.

⁹ Be7ite beni yo7oti polettida; ha7i tani ooraththa miish awajjays; izi mokkanaappe sinth ta inttes yootays» gees.

Galata Yeth

¹⁰ Intteno duge abban wodhdhizaytoo, heen diza ubbatoo! Intteno harurotoo! Heenkka diza ubbatoo! GODAASSI ooraththa mazamure yexxite; biittaa gaxaappe doommidi izas galata mazamure shiishshite.

¹¹ Bazzoynne katamati bantta cenggurssaa dhoqqu histtetto; Qeedaarey de7iza gutay ufayetto; Seela dere asati ufayssan yexetto; zuma xeerankka ililetto.

¹² Istti bonchcho GODAAS immetto; iza galataykka harurotan awajjetto.

¹³ GODAY ola qara mala kezana; olanchcha mala ho7etti dendana. Ceeqeteththa gayro sissana; ba morkketakka oli xoonana.

Goday Ba Deraa Maaddana Immida Hidota

¹⁴ GODAY, «Tani adussa wodeesofe co7u gadis; sirphi gadis; tana qum7a oykkadis; ha7i gidikko miixa oykettida maccassa mala waassays; sheenottayssinne bannakays.

¹⁵ Tani zumatanne zumbullata woddisana; doozata ubbaa melissana. Shaafata haruro biitta kessana; eele haaththatakka micinchchana.

¹⁶ Tani qooqeta istti erontta oge kaaleththana; istti meezetontta ogerakka ta istta efana; dhumaza ta istta sinththan poo7isana; kundukurcco sohota ta giigsana; haytantta ubbaa ta ooththontta aggike.

¹⁷ Eeqa xoossatan ammanettizayti gidikko misletakka, ‹Intte nu xoossata› gizayti guye simmana; istti mulera kawuyana» gees.

Isra7eele Asaa Qooqeteththinne Tulleteth

¹⁸ GODAY, «Intteno tulletoo siyite! intteno qooqetoo be7itenne xeellite!

¹⁹ Ta ashkaraappe attiin hara qooqey oonee? Tani kiittidaadefe attiin hara tulley oonee? taas ammanettidaade mala qooqey, GODAA ashkara mala qooqey oonee?

²⁰ Daro miish be7ideta shin akeekibeekketa; intte hayththay doya dees shin siyekketa» gees.

²¹ GODAY ba xilloteththaa gishshas giidi, ba wogaa gitanne bonchcho kessida gishshas ufayettides.

²² Ha derey bogettidanne bonqqettida, olla giddon wodhdhida, woyne keeththay iza bolla gordettida dere; istti bogettida; istta ashshizaadey deenna; istti di7ettida; «Istta zaarite» gizaykka baawa.

²³ Intte giddofe hayssa siyizay, sinththafe yaana wodes akeeki siyizay oonee?

²⁴ Yaaqoobey bogettana mala, Isra7eeley di7ettana mala ooththiday oonee? Nagara ooththidi nu qohida GODAA gidennee? Istti iza oge kaallanaassinne iza wogaas azazettana koyontta aggida gishshassa.

²⁵ Hessa gishshas eexxiza ba hanqoza, iita ola istta bolla yeddides; tama lacon istta giddoththides; istti gidikko hessa akeekibeettenna; istta xuuggides shin istti wozinan woththibeettenna.