ኢሳያሳ ቲንቢቴ 40 - Geeshsha Maxaafa

Xoossa Dere Minththeththiza Qaala

¹ Intte Xoossay, «Minththeththite! Ta dereza minththeththite!

² Yerusalaameskka shugo qaalara yootite; izis awajjite; iza aylleteththan ooththiza wodey wurides; izi nagara waagay cigettides; iza ba nagara ubbaa gishshas GODAAPPE nam7u kushe qixaate ekkadus» gees.

³ Awajja yootizaade cenggurssi, «Bazzon GODAA oge giigsite; nu Xoossaas Aaraba bazzon aako oge giigsite.

⁴ Shoobbay ubbay pude dhoqqu gaana; zumaynne zumbullay ziqqi gaana; kundukurcco biittay issi gina gidana; kurppoti demba gidana.

⁵ He wode GODAA bonchchoy qonccana; asho may7ida ubbay hessa issife be7ana. GODAA doonay hessa haasaydes» gees.

⁶ Cenggurssi tana, «Waassa!» gides. Tanikka, «Ay ga waassoo?» gadis. Izikka, «Asi ubbay maata mala; iza bonchcho ubbayka demba ciishsha mala.

⁷ GODAY ba shempo iza bollan shempishin maatay melees; ciishshika qokkees; tumappe derey maata mala.

⁸ Maatay melees; ciishshayka qokkees; gido attiin nu Xoossaa qaalay mernaas minni dees» gaada waassa gides.

⁹ Nenoo mishiraachcho Xiyoones yootizaysso, dhoqqa zuma bolla keza; nenoo mishiraachcho Yerusalaames yootizaysso, ne cenggurssaa dhoqqu histta waassa; dhoqqu histta, babbofa; Yuhuda katamatas, «Hekko intte Xoossaa» gaada yoota.

¹⁰ Hekko Ubbaa Haariza GODAY wolqqara yees; iza qesey iza gishshas haarana. Be7ite iza woytoy izara dees; izi ciggana ooso waagaykka izara dees.

¹¹ Izi ba wude heenththanchcha mala heemmees; ba laaqqatakka ba qesen tookkees; ba ki7onkka idimmees; dhanththizaytakka loddara kaaleththees.

¹² Haaththata ba kushe kuphphen makkiday, salota tadhdhakiday, baana daachchon makki oykkiday, zumata ba meezaanen, zumbullatakka meezaanen woththiday oonee?

¹³ GODAA Ayana shaakki eriday, iza zorizaade gidi tamaarsiday oonee?

¹⁴ Erateth demmanaas GODAY oona zore oychchidee? Suure oge iza tamaarsiday oonee? Erateth iza tamaarsiday, akeeka ogekka iza bessiday oonee?

¹⁵ Be7ite kawoteththati gombo giddon xokkida haaththa mala; istti meezaane bolla diza gudulla mala qoodetteettes; harurota liiqo biitta mala geeddarees.

¹⁶ Libaanoosey yarshosoho tamas gidukku; izi medosata qoodaykka xuugettiza yarshos guuththa.

¹⁷ Kawoteththati ubbay iza sinththan aykkoka gidettenna; istti aykkorakka gakki qoodettontta hada miishsha mala.

¹⁸ Histtiin intte Xoossaa oonara giniseetii? Ay mislera gaththi giniseetii?

¹⁹ Eeqa misley gidikko hiilla kushen masettides; hessa worqqa ooththizaadey bollara worqqan meeshees; bira sansalatakka izas giigssees.

²⁰ Hessa mala yarsho shiishshanaas dandayontta manqo asi musontta mith doorees; kundontta misle essanaas erettida hiilla koyees.

²¹ Intte hessa erekketii? Woykko siyibeekketii? Beni beni inttes yootettibeennee? Sa7ay medhettoosofe doommiin intte akeekibeekketii?

²² Izi biitta yuushoppe bollara ba araatan uttees; biitta bolla diza derey boole mala; salota magalasha mala miccees; duussaso dunkaane mala tokkees.

²³ Halaqata hada histtana; ha biittaa ayssizaytakka pitti dhayssees.

²⁴ Istti tokettidi gam7ontta dishin, zerettidi takkontta dishin, buro xapho yeddontta dishin istta bolla carko yeddiin melida; gotey istta suulla mala pitti efides.

²⁵ Geeshshazi isttas, «Tana oonara giniseetii? Tanara ginattizay oonee?» gees.

²⁶ Intte ayfe dhoqqu histtidi pude salo xeellite; haytantta ubbaa medhdhiday oonee? Salo xoolintteta issaa issaa kessizay, istta sunththan sunththan xeygizay iza. Izi ba gitateththaninne ba erateththa minoteththaafe dendidayssan isttafe issoyka dhayenna.

²⁷ Yaaqoobe ne ays hessaththo gay? Isra7eele ne ays hessaththo haasayay? «Ta ogey GODAAPPE geemmides; ta pirday Xoossa achchan wudu geetettibeenna» ays gay?

²⁸ Ne erabeekkii? Ne siyabeekkii? GODAY mernaa Xoossa; izi biittaa ubbaaka medhdhidayssa. Izi daaburenna; azallenna; iza akeekaykka oonankka pilggettenna.

²⁹ Minoteththi bayndaades minoteth immees; Daaburdayssas wolqqa gujjees.

³⁰ Yelagatikka daabureettessinne azalleettes; naateththatikka dhuphettidi kundeettes;

³¹ Gido attiin GODAA hidota ooththizayti bantta wolqqa ooraxisseettes; istti golle mala piradhdhana; istti daaburontta woxxana; istti baana; argacettenna.