ኢሳያሳ ቲንቢቴ 34 - Geeshsha Maxaafa

Dere Bolla Yaana Pirda

¹ Intteno kawoteththatoo shiiqidi siyite! Neni derezi akeeka! Biittaynne biittan diza ubbay, alameynne alameppe yida ubbay siyo!

² GODAY kawoteth ubbaa hanqettides; iza hanqoyka iza olanchchata ubbaa bollana. Izi istta mulera dhayssana; shukaska aaththi immana.

³ Isttafe hayqqidayti kare olettana; istta ahay xinqqana. Zumati suuth xalla gidana.

⁴ Salo xoolintteti ubbay seerana; saloy galba mala xaaxettana; cora xoolintteti ubbay, shullidi qoqofettiza woyne hayththa malanne melidi sa7an wodhiza balase hayththa mala gidana.

⁵ Ta giththa mashshay salota giddon baas gidana gakkanaas uyadus; be7ite; Eedoome bolla, tani qanggida asaa bolla pirdanaas wodhdhadus.

⁶ GODAA giththa mashshay suuth may7adus; modhdhoka kalladus; dorsa laaqqa suuththaninne deysha suuththan goozettadus; dharsho kilaho moodhen goozettadus; GODAY Booxira kataman yarsho, Eedoomen wolqqama shuka giigsida gishshassa.

⁷ Qasse Isttara menththi, kormay wofanora issife kundana; biittaya suuththan caphana; istta biittay modhdhon araddana.

⁸ Hessika GODAY halo kessiza gallassinne Xiyoone gishshas morkketa oliza layth gidana.

⁹ Eedoome kanchcheti shida gidana; izi biittay xuugettiza diine gidana; izi biittay shida mala eexxana.

¹⁰ Izo miza tamay qammanne gallas to7enna; cuwaykka mernaas tullu gaana; yeletappe yeleta gakkanaas kays gidana. Oonikka nam7anththo heera aadhdhenna.

¹¹ Xiloynne quxarsi izo laattana; guttoynne quuroy izin keeth keexxana; Xoossi Eedoome bolla izo laallana wodoronne izo dhayssana tumbe yeddana.

¹² Izi daannati kawo geetetti xeygettanaas dandayza miishshi deenna; izi halaqati mulera pitetti dhayana.

¹³ Gimbetti yuuyida katamata, izi miixata doyoynne okkay laattana; worakanata ollanne guttota duussaso gidana.

¹⁴ Bazzo do7ati godaretara issife daana; bazzo deysh misatiza daydanththati bantta giddon xeygettana; omarsa medhetati heen shemppana; banttas duussaso heen demmana.

¹⁵ Guttoy he keeththan phuuphphulleta yeggana; zaaradakka phuqissana; ba ciyetakka haphphana; woleti waaththan waaththan heen shiiqana.

¹⁶ GODAA maxaafan xeellite; nababite. Haytappe issoyka paccenna; issoy issoy baas waaththa lagge dhayenna; hayssi ha azazozi iza doonappe kezides; iza ayanay istta issi bolla shiishshana.

¹⁷ Istta gisha gisha isttas woththana; iza kushey meezaanen meezaanen gishana; iza mernaas isttas gidana; yeletappe yeleta gakkanaas istti izin de7ana.