ኢሳያሳ ቲንቢቴ 33 - Geeshsha Maxaafa

Maado Demmanaas Woossida Woosa

¹ Nees dhayontta dashe hara dhayssizayssoo! Nees aayye ana! Nena aaththi immontta dishin hara aaththa immizayssoo! Nees aayye ana! Neni dhayso aggida wode ne dhayana; neni aaththa imo aggida wode nena aaththi immana.

² Abeet GODAWU! Nuna maara; nuni nena hidota ooththidos; maalado maalado nuus wolqqa gida; meto wodekka nuna ashshizaade gida.

³ Ne cenggurssay dada mala guummiza wode derey baqatees; neni denda eqqiza wode kawoteththati laaletteettes.

⁴ Kawoteththatoo! Booley shiiqiza mala inttefe di7ettidayssi shiiqana; gumbaroy guppiza mala asay iza bolla dirbbatana.

⁵ GODAY bolla salon de7iza gishshas, dhoqqu dhoqqu gides; izi Xiyoono suure pirdaninne xilloteththan kunththana.

⁶ Izi ne diza layth ubbaan ammanththiza yoch, atoteth, aadho erateththinne erateth gidana; GODAAS yashshateththi hayssa ha aqotatas qulpe gidana.

⁷ Be7ite, istta gooba asati ogetan waasseettes; sigateththas kiitettidaytikka camo yeeho yeekkeettes.

⁸ Wogga ogeti samida; ogera kanththizay deenna. Qachchida qaalay laalettides; zorizayti kadhettida; bonchchettizaykka deenna.

⁹ Biittaya yeekkadussinne gilqadus; Libaanoosey yeellatidi shullides; Lasharooney Arabe mala bazzo gidadus; Baasaaneynne Qarmeloosey bantta hayth qoqofida.

Xoossaa Ixxizaytas Imettida Seera

¹⁰ GODAY kawoteththatasi, «Ha7i tani dendana; ha7i tani bonchchettana; ha7i tani dhoqqu dhoqqu gaana.

¹¹ Intte uttula shaaridi suulla yelideta. Intte shemppiza shemppoy inttena miza tama.

¹² Derey booqintta keziza shuchcha mala taman xuugettana; qasseka agunththa tusha mala taman eexxana.

¹³ Intteno haakon de7izaytoo! tani ooththidayssa siyite; matan dizaytoo! Ta wolqqaa erite» gees.

¹⁴ Xiyoonen diza nagaranchchati dagammida; Xoossi isttas bayndayti babbidi, «Nu garsafe xuuggiza tamara daana dandayzay oonee? Mernaa tamara daana dandayzay oonee?» gida.

¹⁵ Xilloteththan hemettizay, suure haasayzay, baleththon beettiza wodhe kadhizay, gubbo ekkenaappe ba kushe shiishshi ekkizay, as wodhana zuppetizayta zore siyanaappe ba hayth tuccizay, iita beyanaappe ba ayfe qilim7izay,

¹⁶ Hessaadey dhoqqasohon daana; zuma miixay izas shiiqi attizaso gidana; izas qumay imettana; haaththika izas paccenna.

Bonchchoy Kumida Sinththara Yaana Layth

¹⁷ Ne ayfeti kawoza puulateth be7ana; haakon micetti diza biittaaka be7ana.

¹⁸ Beni waayey nees qofettishin neni, «Waanna halaqazi awa bidee? Giira ekkizayssi awa bidee? Shakkoza alaafezi awan dizee» gaana.

¹⁹ Heytantti qadhetay baynda asa; istta haasayay asas gelonttaytanne istta inxarsi deddotizayta; hayssafe guye intte istta beyekketa.

²⁰ Nu ba7aaleta izin bonchchiza Xiyoone katamayo be7ite! Saron dizasohoyo, qaaxxontta dunkaane gididaaro, izi toley shodettonttaaro, izi wodorotappe issinakka duuxxonttaaro Yerusalaame katamayo ne ayfey be7ana.

²¹ Heen GODAY nuus wolqqa gidana; he sohoy dalga shaafanne kanchche gidana; wogoloy iza bollara baanaas dandayenna; gita markabetikka iza bollara beettenna.

²² GODAY nuus pirdiza daanna; GODAY nuus woga immizaade; GODAY nuus kawo; nuna ashshanaykka iza.

²³ Ne tole wodoroy leppides; tuussay minni eqqibeenna; sharazi tolettibeenna; he wode di7ettida gita miishshi gishettana; wobbeyka attontta di7o ekkana.

²⁴ Xiyoonen dishe, «Ta sakettadis» gaana asi deenna; heen de7iza asata nagaray atto geetettana.