ኢሳያሳ ቲንቢቴ 32 - Geeshsha Maxaafa

Xilloteththan Ayssiza Kawo

¹ Be7ite, kawoy xilloteththan kawotana; haarizaytikka suure pirdan haarana.

² Asi hu7en hu7en carkofe geemmizasoho, goteppeka baqati attizasoho gidana; bazzo biittan haaththa pultto mala, saamettida biittan wogga zaalla kuwa mala gidana.

³ Xeelliza asata ayfey hayssafe guye qilim7enna; siyizayta hayththi beeggidi ezgana.

⁴ Tapitapizayta wozinay erananne akeekana; Deddotizayta inxarsika birshettana; geeshshidikka haasayana.

⁵ Hayssafe guyen eeyay gita as geetettenna; wogay baynda asi bonchchettenna.

⁶ Eeyay eeyateth haasayees; iza wozinay iitateth yuushshi qoppees; Xoossas yashshateththi baynda miish ooththees; GODAA bolla bala qaala haasayees; gafidayssas kath immenna; saamettidayssas haath immenna.

⁷ Wogay baynda asata hiillateththi iita; metotanchchata maganay suure gidikkoka hiyeesata wordora dhayssanaas iitateththan yuushshi qoppees.

⁸ Gita asas qofaykka gita; ba gitateththa ooson minni de7ees.

Pirdafe Guye Yaana Injje De7o

⁹ Intteno otoroy tuccida maccassatoo! Dendite; ta gizaaz siyite; intteno badhdhi gi uttida macca naytoo! tani inttes yootizayssa ezgite.

¹⁰ Layththay buro aadhdhida mala, intte badhdhi gi uttidayti kokkorana; woyne turay ayfe immenna dumma dumma ayfe intte shiishshiza wodey yeenna.

¹¹ Intteno otoroy tuccida maccassatoo! Kokkorite. Intteno badhdhi gida macca naytoo! Hirgan gajigajite. Intte may7ida may7o qaari yeggite; intte xeessan maaqa danccite.

¹² Aradda biitta gishshas intte tiraa iccite; ayfiza woyne miththaa gishshas ceecite;

¹³ Ta deraa biittaa gishshas, agunththinne kindichchoy mokkida biittaa gishshas, homboceththan isttan guppiza keeththata ubbaa gishshas, homboceththan izin guppiza katamays yeekkite.

¹⁴ Miixati kayzana; daro shirotiza katamaya dimmi gaana; miixatinne qatoti mernaas gongolo, hardidati guppizasohonne wudey heemettizaso gidana.

¹⁵ Hessika hananay Ayanay nuus bollafe gukkanaashe, bazzo biittay aradda gidanaashe, aradda biittay wora misatanaashe gakkanaassa.

¹⁶ Hessafe guye bazzo biittan suure pirday de7ana; aradda biittankka xilloteththi daana.

¹⁷ Xilloteththa ayfey saroteth; xilloteththa oosoy woppanne mernaas ammaneteth gidana.

¹⁸ Ta derey saroy dizason, ammanththizason, woppay dizason woppu gi daana.

¹⁹ Shachchi woraa kurakkiko, katamaykka mulera kundiko,

²⁰ shaafay dizason dizason kath zerizaytoo, intte booratanne hareta hirgay baynda heemmizaytoo, intte ay mala anjjettidayta gidandetii!