ኢሳያሳ ቲንቢቴ 31 - Geeshsha Maxaafa

Gibxen Ammanettizaytas Aayye Ana

¹ Pude Isra7eele geeshshaako xeellonttaytas, GODAAPPE maado koyonttaytas, maado demmanaas duge Gibxe wodhdhizaytas, para-gaareta daroteththaninne ba para minoteththan ceeqettizaytas aayye ana.

² Izi gidikko aadho eranchcha; izi bash ehana; ba qaalakka laammenna; iita ooththizayta bollanne qoho ooththizayta maaddizayta bolla izi dendana.

³ Gibxe asay asappe attiin Xoos deettenna; istta paratikka ashoppe attiin ayana gidettenna. GODAY ba kushe micciza wode iza maaddizaadey dhuphettana; maadettizaadeyka kundana; nam7ayka issife dhayana.

⁴ GODAY taas, «Gaammoy woykko wodalla gaammoy mehe oykkidi daro heenththanchchati xeygetti shiiqidi iza bolla yiikko istta waasoy iza yashisonttayssa istta waasoy iza daganththonttayssa mala Ubbaafe Wolqqama GODAY zumaa bollanne zumbullata bolla olas wodhdhana.

⁵ Kafoy bollara aalanththiza mala Ubbaafe Wolqqama GODAY Yerusalaame kammana, naagananne ashshana; izi bollara aadhdhidi izo ashshana» gees.

⁶ Intteno Isra7eele asazoo! Intte keehippe makkallidayssaako simmite.

⁷ He wode nagaray kumida intte kusheti birappenne worqqafe ooththida eeqa xoossata intte ubbayka wora yeggana.

⁸ «Asoorey asa mashsha gidontta mashshan hayqqana; asho may7idaade mashsha gidontta hara mashshay iza maana; izi giththa mashsha sinththafe baqatana; naateththati dosay baynda wolqqaththon ooththana.

⁹ Mino miixay shiro gaason kundana; ola gadawatikka ola bandira be7idi dagaman kumana» gees tamay Xiyoonen, tama coocey Yerusalaamen diza GODAY.