ኢሳያሳ ቲንቢቴ 3 - Geeshsha Maxaafa

Yerusalaame Bollanne Yuhuda Bolla Yaana Pirda

¹ Be7ite, GODAY Ubbaafe Wolqqama GODAY asas koshshiza kath, haaththinne maado ubbaa Yerusalaameppenne Yuhudappe diggana.

² Qaratanne olanchchata, pirdizaytanne nabeta, muurennizaytanne cimata,

³ hamsa halaqatanne ola gadawata, zoranchchatanne hiillanchchata, cinccateththan bitizayta ubbaa dhayssana.

⁴ Tani yelaga nayta istta bolla shuumana; qeeri nayti istta haarana.

⁵ Derey dere bolla, asi issoy issaa bolla, shooroy shooro bolla, yelaga nayti cimata bolla, shufuroy bonchchettidayta bolla dendana.

⁶ Asi ba aawa keeththan ba ishanttafe oykkidi, «Nees may7oy diza gishshas nuna kaaleththizayssa gida; ha laalettida sohoza aawateth ne ekka» gaana.

⁷ Histtiin izi he wode ba qaala dhoqqu histtidi, «Tani aykkoka maaddike; tason may7oynne miza kaththi baynda gishshas tana dere kaaleththizaade histtofte» gaana.

⁸ Yerusalaamey gandigarawus; Yuhudaykka kundana matadus; gaasoykka istti bantta haasayaninne ooson GODAARA eqettishe iza bonchchoza toochcheettes.

⁹ Istta ayfesoy istta bolla markkattees; istti Sodoome asaa mala bantta nagaraa qottontta qonccen haasayeettes; istti bantta bolla iita miish ehiza gishshas isttas aayye ana!

¹⁰ Xillotas, «Xilloti ba lo7o ooso ayfe maana; hessa gishshas isttas lo7o gidana» ga yoota.

¹¹ Iitatas aayye ana! Istta bolla iita miishshi yaana; ays giikko istti bantta ooso mala ekkana.

¹² Yelagati ta deraa un7eththeettes; maccassatikka istta haareettes; Ta derezoo! Inttena kaaleththizayti inttena baleththida; intte biza ogeppeka inttena kare kessida.

Goday Ba Asaa Bolla Pirdana Pirda

¹³ GODAY pirdanaas shilotan uttides; deraa bolla pirdanaas dendides.

¹⁴ GODAY dere cimatanne kaaleththizayta pirdanaas issi bolla shiishshidi, «Tani woyne tokkizasohoza iissideta; manqotappe intte bonqqidayssi intte qol7an dees.

¹⁵ Ta deraa ays meton liiqisidetii? Manqota ays yeesseetii? Hayssa yootiday tana Goda, Ubbaafe Wolqqama GODAA Xoossaa» gees.

Xiyoone Maccassatas Imettida Seera

¹⁶ GODAY, «Xiyoone maccassati otorettida; bantta qoodhe warxi histtishe, bantta ayfen som7i bessishe, bantta duca qaaththishe, bantta tohon diza sagayo giirissishe hemetteettes.

¹⁷ Hessa gishshas tani GODAY Xiyoone maccassata hu7e citton goo7issana; tani GODAY istta hu7e bo7asana» gees.

¹⁸ He gallas GODAY Xiyoone maccassata alleqo miishshata, heytikka toho sagayota, hu7e alleqota, qoodhe gozdata,

¹⁹ hayththa gutichchata, kushe sagayota, ayfeso kammiza quraaceta,

²⁰ hu7e goosseta, sagayota, hu7e alleqota, xeessan dancciza danccota, shitto bilqaaxeta, ashenkitaabeta,

²¹ siidhe midigata, biradhdhe midigata,

²² seelo may7ota, garsara may7iza may7ota, kaabbata, kushe karaxiiteta,

²³ Heregata, laynota, giddora may7iza may7ota, binana qachchiza alleqotanne ayfeso kammiza qolleta ubbaa dafi ekkana.

²⁴ Shitto xinqqon, dancco wodoron, goofare bo7an, seelo may7o maaqan, puulateth pigen laammana.

²⁵ Inttes attuma asati giththa mashshan, olanchchati olan hayqqana.

²⁶ Xiyoone pengeti kallo gaden wodhdha uttada yeekkiza maccassa mala yeekkananne zilalana.