ኢሳያሳ ቲንቢቴ 29 - Geeshsha Maxaafa

Dawite Katamaas Aayye Ana

¹ Hanne Dawiti nenan de7ida Ar7eele katamayee! Nena aayye ana! Layththa bolla layth gujja; ba7aaletakka zaara zaarada bonchcha.

² Gido attiin tani Ar7eele katamayo giddoththana; iza yeekkananne waassana; iza taas yarsho yarshizaso gidana.

³ Tani ne yuushon dunkaanana; ta ne yuushon gimbe yuushsha aaththana; ne yuushon shakko ooththada ta nena un7eththana.

⁴ Neni duge wodhdhana; biitta garsafe pude haasayana; ne haasayay gudullaa giddofe kezana; ne cenggurssi moytille cenggurssa mala biitta garsafe pude kezana; ne haasayaykka gudulla giddofe saasukettana.

⁵ Gido attiin daro ne morkketi gudulla suulla mala, menxe iitati carkon biza happa mala gidana; qofay baynda dishin,

⁶ Ubbaafe Wolqqama GODAY dadan, biittaa qaaththan, gita cenggurssan, gote carkoninne wolqqama abba dambalan ubbaa miza tama lacon yaana.

⁷ Ar7eele oliza kawoteththata ubbaa wudey izi bollanne izi shakko bolla daafa yeggizaytinne dooddizayti, agumo malanne omars beettiza ajjuuta mala gidana.

⁸ Gafida asi agumora mishe aqees; gido attiin izi dhiskofe dendishin gafay aggonttayssa mala, saamettida asi agumora uyishe aqees; gido attiin beeggishin daaburaynne saamoy iza aggonttayssa mala Xiyoone zuma oliza kawoteththata ubbaa wudey hessaththo hanana.

Xoossa Azazo Ixoy Ehiza Qixaate

⁹ Dammattidi malalettite; inttena intterkka qooqisidi qooqe gidite. Gido attiin woyne ushshu uyontta coo maththottite; maththosiza ushshu uyontta dishe gandigarite.

¹⁰ GODAY intte bolla wolqqama dhisko yeggides; intte nabeta ayfe goozides; ajjuuta be7izayta hu7e gullunttissides.

¹¹ Ha ajjuutay isttas xaaththa maxaafa giddon gordetti diza qaala mala gidides. Ha xaaththa maxaafa nababanaas dandayza asi, «Shoobbe nuus nababa» giidi intte immiko, izi inttes, «Gordettida gishshas tani nababanaas dandaykke» gaana.

¹² Qasse xaaththa maxaafaa nababo dandayontta asas, «Shoobbe nuus nababa» giidi intte izas immiko izi inttes, «Ta nababo dandaykke» gaana.

¹³ GODAY, «Hayssi derey doonan xalla taakko shiiqees; ba metershan xalla tana bonchchees; gido attiin iza wozinay taappe haakon dees. Istti asi tamaarsidanne asi woththida wogan taas goynneettes.

¹⁴ Hessa gishshas tani ha asaa bolla malalisiza miishsha bolla malalisiza miish ooththashe zaara zaara istta malalissana; aadho eranchchata erateththi dhayana; akeekanchchata akeekaykka pentti baana» gides.

Sinththafe Yaana Hidota

¹⁵ Bantta halchcho GODAAPPE genththanaas duge ciimma ollan wodhdhizaytas bantta ooso dhuman ooththizaytas «Nuna ooni be7anee? Nuna ooni eranee?» gizaytas aayye ana!

¹⁶ Intte yo7ota laammi yeggeeta; manata urqqa mala xeelleeta! Medhettidayssi medhdhidayssa, «Izi tana medhdhibeenna» gizee? Mana miishshi bana medhdhidayssa, «Izi aykkoka erenna» gizee?

¹⁷ Libaanoosey laamettidi aradda gade gidanaas, aradda biittay laamettidi wora gidanaas guuththa wodey attides gidennee?

¹⁸ He gallas tulley xaaththa maxaafa qaala siyana; qooqe ayfetikka shaarumappenne dhumappe shaakettidi xeellana.

¹⁹ Ashketi GODAAN, hiyeesati Isra7eele Geeshshan zaari zaari ufayettana.

²⁰ Menxe iitati ubbay wurana; qilccizayti tim7i gaana; Iita ooththanaas zamadi uttidayti dhayana.

²¹ As yo7on mooranchcha kessizayti, shilotan mootettizayssa bolla woximade waaxizayti, wordo markkan tumateththa xillotappe bonqqizayti dhayana.

²² Hessa gishshas Abrahaame wozzida GODAY Yaaqoobesos, «Yaaqoobey hayssafe guye yeellatenna; iza sinththika laamettenna.

²³ Bantta giddon ta kushe ooso gidida bantta nayta be7ishe ta sunththaa geeshshateththan naagana; istti Yaaqoobe Geeshshaza geeshshateth erana; Isra7eele Xoossaa sinththan yashshateththan eqqana.

²⁴ Ayanan balidayti simmidi akeekana; zuuzumizaytikka timirte ekkana» gees.