ኢሳያሳ ቲንቢቴ 28 - Geeshsha Maxaafa

Efreemes Imettida Seera

¹ Efreemen diza maththottizaytas, otoreteththas, kallachcha gididaaris, cilila shoobba hu7en kippi ga uttida, izas bonchcho seelo gidida shulla ciishshays, woyne ushshay istta zereththas otoreteththas gidida katamays aayye ana!

² Be7ite, Godaas wolqqamanne mino gidida issoy dees; hessika shachcha uusho mala, dhayssiza gote carko mala, wolqqama dambala malanne wolqqama ira mala wolqqan izi izo duge biittan yeggana.

³ Maththottiza Efreeme asata otoro kallachchay tohon yedhettana.

⁴ Cilila shoobba hu7en kippi ga uttida izas bonchcho seelo gidida shulla ciishshaya, kaththa shiishoppe sinththan gakkiin asi be7ida mala xuphi ekkidi heerakka mittiza balase mala gidana.

⁵ He gallas Ubbaafe Wolqqama GODAY ba asaappe casha attidaytas bonchcho kallachchanne puula akilile gidana.

⁶ Izi pirdizaytas suure pirda pirdiza ayana olaa katama pengefe zaarizaytas wolqqa gidana.

Maththottiza Yuhuda Nabetanne Qeeseta,

⁷ Hayti woyne ushshu uyidi yiicoteettes; maththosiza ushshan gandigareettes. Qeesetinne nabeti maththosiza ushshan gandigarda; woyne ushsha gaason yo7oy isttafe balettides; maththosiza ushshan gandigarda; ajjuutaa likkera be7ettenna; pirda pirdishe dhuphetteettes.

⁸ Istta maadda ubbay coosh xalla; cooshshan moorettonttasoy deenna.

⁹ Istti, «Izi oona tamaarsizee? Kiitaakka oos qonccisizee? Maath aggida naytasseyee dhanththa duuso naytassee?

¹⁰ Azazo bolla azazo, azazo bolla azazo woga bolla woga, wogaa bolla woga, haankka guuththara, heenkka guuththara ooththees» gaana.

¹¹ Histtiko sinththafe Xoossay allagata qaalaninne imaththata doonan ha asaas haasayana.

¹² Izi isttas, «Hanna shemposo; daaburday shemppo; hanna shemposo» giday oonassee? Istti gidikko siyana koyibeettenna.

¹³ Hessa gishshas GODAA qaalay istti biidi guye kundana mala, madunxana malanne woximaden oykettana mala, di7ettana mala azazo bolla azazo, azazo bolla azazo, woga bolla woga, woga bolla woga gididi, haan guuththara, heen guuththara hanana.

Xiyoonen Gula Shuch

¹⁴ Hessa gishshas intteno Yerusalaamen diza asaa haariza qilccizaytoo! GODAA qaalaa siyite.

¹⁵ Intte, «Nuni hayqora caaqettidos; duuforakka sigettidos; wordo nuus zempposonne qotettizaso ooththidos; wolqqama boshay pitti ekki bishe nuna bochchanaas dandayenna» gi otorettideta.

¹⁶ Hessa gishshas Ubbaa Haariza GODAY, «Be7ite! Tani Xiyoonen paacettida shuch, yochcha shuch, mino yochchas gidiza bonchchettida gula shuch woththana; izan ammanizay yeellatenna.

¹⁷ Tani suure pirda wadha wodoro, xilloteththika tumbe mala ooththana; intte wordo zempposo ooththidayssa shachcha iray meeccana; intte qotetti attizasozakka haaththi mittana» gees.

¹⁸ Intte hayqora caaqettida caaqoy attana; intte duufora sigettida sigay laalettana; wolqqama boshay pitti ekki bishe inttenakka pitti ekki baana.

¹⁹ Izi yida wode wode inttena ekki baana; maalado maalado, qammanne gallas inttena pitti efana; ha qaalaa intte akeekizaa gidikko shiro bolla shiro ehana.

²⁰ Toho cogotti ichchontta mala hiixay qaanththa; gaththi may7anaas afalaykka guuththa.

²¹ GODAY Paraaxime zuman ooththida mala, ba ooso, ba imaththa ooso, hessika ba ooraththa ooso ooththanaas dendana. Qasse Geba7oone zullen ooththida malakka ooththana.

²² GODAY, Ubbaafe Wolqqama GODAY izi boshaa biitta ubbaa bolla ehanaas awajjidayssa tani siyida gishshas ha7i intte qilccizayssa aggite; akkay giikko intte bolla qashoy minnana.

Xoossa Aadho Erateth

²³ Ezgidi ta yootizayssa siyite; akeekidi ta qaala siyite.

²⁴ Goshshanchchay kath zeranaas ubba wode he soho goyishe de7izee? Qasse izi hem7e liiqisishenne ubbato pixishe de7izee?

²⁵ Goshshaa liiqisidi aasutanne aanuga zerennee? Gistteza izas giigidasohon, banggaa izas giigidasohon arddaa izas giigidasohon zerennee?

²⁶ Iza Xoossay iza tamaarssees; suure ogekka iza bessees.

²⁷ Aasutay lodan bukettenna; aanugay para-gaaren bukettenna; aasutay guufen, aanugay qeeri lodan bukettees.

²⁸ Sollo uukkanaas kaththi gaacettees; hessa gishshas issi asi mernaas kath bukkenna; kath bukkiza para-gaareta iza bollara laaggikokka kaththaa gaacettenna.

²⁹ Hayssi ubbay ba zoren malalisizaaz, ba aadho erateththan malalisizaaz gidida Ubbaafe Wolqqama GODAAPPE hanees.