ኢሳያሳ ቲንቢቴ 26 - Geeshsha Maxaafa

Galata Yeth

¹ He gallas ha yeththay Yuhuda biittan yexettana. Nuus mino katamay dees; Xoossi iza gimbetanne miixata atoteththas ooththides.

² Ba ammano naagida, xillo kawoteththati gelana mala pengeta doyte.

³ Nenan ammanettida gishshas nenan zemppida shemppoyo neni kumeththa saroteththan naagaasa.

⁴ Mernaas GODAAN ammanettite; GODAY nuus mernaa Zaalla.

⁵ Dhoqqasohon dizayta ziqqi ooththana; dhoqqu gida katama kawushshana; duge biittan olana; gudullara walakkana.

⁶ Tohon yedhettana; un7ettidayta tohoynne manqota tohoy iza yedhdhana.

⁷ Xillota ogey moole. Nenoo Suurezoo, neni xillota oge moolisaasa.

⁸ Abeet GODAWU! Ne woga ogera hemettishe nuni nena hidota ooththidos; ne sunththinne ne gitateththi nu wozinas amo.

⁹ Ta shemppoya omarsi nena laamotawus; ta ayanay maalado nena koyawus; ne pirday biitta bolla yida wode sa7an de7iza asay xilloteth tamaarees.

¹⁰ Iita asatas kiya ooththikokka, istti xilloteth tamaarettenna. Suure biittan iita ooththeettes; GODAA gitateththaaka akeekettenna.

¹¹ Abeet GODAWU! Ne qesey dhoqqu dhoqqu gides. Istti gidikko be7ettenna; Ne asaas ne mishettizayssa be7ettonne yeellatetto; Ne morkketas giigida tamay istta mo.

¹² Abeet GODAWU! Neni nuus saroteth yoch ooththadasa; nu ooso ubbaa neni ooththadasa.

¹³ Abeet GODAWU Nu Xoossawu! neeppe hara allaga xoossati nuna haarida; nuni gidikko ne sunththaa xalla bonchchoos.

¹⁴ Istti hayqqida; simmidi shemppora paxa de7ettenna; istta shemppoy simmi yeenna; neni istta qaxxayadasanne dhayssadasa; istta hassa7issiza miish ubbaa pitta dhayssadasa.

¹⁵ Abeet GODAWU! Neni kawoteththaa darsadasa; Neni deraa darsadasa. Neni bonchchettadasa; biittaa zawa ubbaaka aassadasa.

¹⁶ Abeet GODAWU! Istti metotida wode neekko yida; Neni istta seerida wode, saasuki nena woosseettes.

¹⁷ Abeet GODAWU! Shaara maccassi miixan metotiza malanne waassiza mala nunikka ne sinththan metotidi waassoos.

¹⁸ Nuni shaaridos; miixankka un7ettidos; gido attiin carko yelidos. Nuni sa7as atoteth ehibookko; sa7an diza deraakka yelibookko.

¹⁹ Gido attiin hayqqida ne asay paxana; istta ahaykka dendana. Intteno biitta garsan dizaytoo! Dendite ufayssan yexxite; ne xaazay biitta yakkissiza maalado xaaza mala sa7ay mittidayta zaara cuttana.

²⁰ Ta derezoo! Ba ne keeth gela; ne penge ne bolla gorda; iza hanqoy aadhdhana gakkanaas guuththa wodes qotetaashsha.

²¹ Biittaa bollan diza asaa istta nagaraa gishshas qaxxayanaas, GODAY ba de7izasoppe kezidi yees. Biittayka ba bollan gukkida suuththaa qonccisana; hayqqidaytakka hayssafe guye qottuku.