ኢሳያሳ ቲንቢቴ 24 - Geeshsha Maxaafa

Goday Sa7a Bolla Ehana Qixaate

¹ Be7ite! GODAY biittaa bula kessana; mulera dhayssana; budheththa doore histtana; izin diza asaa laallana.

² Ubbaa miishshika issi mala gidana; dereza bolla hanzayssi qeeseza bolla hanana; aylle bolla hanzayssi godaa bolla hanana; ashkaray bolla hanzayssi godattey bolla hanana; shammizayssa bolla hanzayssi bayzizayssa bolla hanana; tal7e ekkizayssa bolla hanzayssi tal7e immizayssa bolla hanana; aco ciggizayssa bolla hanzayssi aco cigissizayssa bolla hanana.

³ Biittay mulera bula gidana; mulera bonqqettana; ha qaalaa GODAY haasaydes.

⁴ Biittaya melana; izin diza ubbay qokkana; alamey daaburana; biitta bolla erettida gita asati daaburana.

⁵ Biittay ba asaan tunadus; istti woga menththida; maaraa moorida; mernaa caaqo qaala menththida.

⁶ Hessa gishshas qanggeththi biittaa mees; izin de7iza dereti bantta mooron qaxxayettana bessees; Hessa gishshas sa7a bolla diza asati xuugettida; isttafe qoodan guuththa asati attida.

⁷ Woyne turay meliin woyne ushshi wurides; kase ufayettiza ubbay ceecides.

⁸ Ufayssan karabe baqay co7u gides; kaa7izayta hombocaykka eqqides; ufayssiza diiththa giirissi co7u gides.

⁹ Hayssafe guye istti yexxishe woyne ushshu uyettenna; ushshayka uyizayta cammana.

¹⁰ Laalettida katamaya kayzadus; keeththa pengetikka gordettida.

¹¹ Woyne ushsha gishshas dubbushan waasseettes; ufayssi ubbay ceecen laamettana; homboca kaassi biitta bollafe dhaydes.

¹² Katamaya mulera laalettadus; pengetikka meqeretti kundida.

¹³ Wogara miththa ayfe shoci qoqofiin woyne miththa qanxxi ekkiin attiza attida pushulo mala biittaa bolla, kawoteththata bolla hessaththo hanana.

¹⁴ Istti bantta qaalaa dhoqqu histtidi ufayssan yexxana; arshey wulliza baggafe GODAA gitateththa yootana.

¹⁵ Hessa gishshas arshey mokkiza baggara dizaytoo, abban diza haruroti GODAA Isra7eele Xoossaa, sunththaa dhoqqu dhoqqu histtite.

¹⁶ Biittaa gaxaappe, «Xillozas bonchchoy gido» giza mazamure nu siyidos; «Tani gidikko gilqada meqeth attadis; Tana aayye ana! Kaddizayti kaddeettes; aaththi immizayti aaththi immeettes» gadis.

¹⁷ Intteno sa7a bollan diza asatoo, dagamay, ollaynne woximadey inttena naagees.

¹⁸ Salo maskooteti doyettida gishshas, biitta yochchatikka qaaxxida; shiroppe baqatizay ollan kundana; ollafe kessi ekkidaykka woximaden oykettana.

¹⁹ Biittay qaaxxides; za7idessinne phalqetti wodhdhides.

²⁰ Biittay maththottida asa mala yiicotides; carkoy sugida gaabba mala gidadus. Biitta makkallateththay deexo gidida gishshas kundana; nam7anththoka simmi dendenna.

²¹ He gallas GODAY bolla salon diza wolqqamata gars biitta bolla diza kawotakka qaxxayana.

²² Istti ollan diza qasho asa mala issi bolla uucettana; istti qasho keeththan gordetti uttana; daro wodeppe guye istti pirda ekkana shiiqana.

²³ Ubbaafe Wolqqama GODAY Xiyoone zumaninne Yerusalaamen cimata sinththan bonchchon kawotana; he wode aginay shaaphettana; awa ayfeykka yeellatana.