ኢሳያሳ ቲንቢቴ 22 - Geeshsha Maxaafa

Yerusalaame Bolla Yootettida Tinbite

¹ Ajjuuta zulle bolla yootettida mino yo7o; Inttena aazi metiin ubbay pooqe bolla kezidetii?

² Hanne wocamay kumida katamayee! Shiroynne dirbbay kumida katamayee! Neeppe hayqqidayti mashshan hayqqibeettenna; woykko olan hayqqibeettenna.

³ Nena ayssizayti ubbay issife baqatida; wondafe denththontta dishe di7ettida; morkkey haahon dishin baqatida ubbatoo! Intte oykettidi issi bolla qashettideta.

⁴ Hessa gishshas tani, «Taappe haakkite; ane camo yeeho ta yeekkays; dhayda ta asaa gishshas tana minththeththana qoppofte» gadis.

⁵ GODAY Ubbaafe Wolqqama Xoossay Ajjuuta Zullen wocama, dirbbanne shiro, dirsata laaleththinne zumatakko waaso gallassi dees.

⁶ Elaamey wondafe yiishsha kooho, ba paratanne para-gaareta giigsides; Qiireykka ba gondalle oykkides.

⁷ Lo7o zulleti para-gaaretan kumida; toga asati katamay pengen eqqida.

⁸ Yuhuda miixata laallida; he wode wora giddon minjja keeththan diza ola massara ne xeelladasa.

⁹ Dawite katamay daro laalettidayssa be7ideta; duge baggara haath eelissideta.

¹⁰ Yerusalaamen diza keeththata qoodideta; dirsaa ooraththanaas keeththata laallideta.

¹¹ Kase gal7a eele haaththaa zaaridi, iza minjjizaso nam7u gimbetappe giddon giigsideta. Gido attiin intte hessa ooththiday oonakko eribeekketa; koyro halchchi ooththidayssa akeekibeekketa.

¹² He gallas GODAY Ubbaafe Wolqqama Xoossay intte yeekkana malanne waassana mala, intte hu7e binana buucana malanne maaqa may7ana mala xeygides.

¹³ Gido attiin injjenne ufays, booranne dharsho shukay, asho muussinne woyne ushshi dees; «Nuni wonto hayqqana gishshas ane moossinne uyoos» gideta.

¹⁴ GODAY Ubbaafe Wolqqama Xoossay hayssafe kaallizayssa taas qonccisides; izakka ta hayththan siyadis; «Hayssi ha nagarazi intte hayqqana gakkanaas wursiin wurenna.»

¹⁵ GODAY, GODAY Ubbaafe Wolqqama Xoossay, «Baada kawo keeththa alaafe Sheebina,

¹⁶ Hayssan ay ooththay? Hayssa nees duufo giigsanaas, dhoqqasohon ne moogettanaaso woocanaas, ne ahay uttanaaso zaalla woocanaas ooni nena azazidee?

¹⁷ Haysso mino addezoo! Naagetta; GODAY nena minththi oykkidi ba kushen cuucumi oykkidi olana hanees.

¹⁸ Nena yanbarsha mala yuushshidi aako biittan olana; ne godaa keeththas ne yeella gidadasa; ne heen hayqqana; ne bonchcho para-gaaretikka heen attana.

¹⁹ Ne bonchchettidasoppe ta nena kawushshana; alaafeteththaafekka ne goodettana» ga.

²⁰ «He gallas tani Kilqiyaasa naa ta ashkara Elyaaqeeme xeygana.

²¹ Ne seeloza ta iza mayzana; ne giththaa iza gixissana; ne daannateththaaka ta izas aaththa immana. Izi Yerusalaamen diza asaassinne Yuhuda asaas aawa gidana.

²² Tani Dawite keeththa qulpe iza hashen woththana; izi doyiin oonikka gordenna; izi gordiin oonikka doyenna.

²³ Tani iza ammanettizasohon dhishke mala essana; izi ba aawa keeththas bonchcho araata gidana.

²⁴ Qeeri xaaroppe biidi baath gakkanaas soon diza miish ubbaa kocan kaqqiza mala iza aawa keeththa bonchcho ubbay naytappe biidi naa naa gakkanaas iza bolla qaaphettana» gides.

²⁵ GODAY Ubbaafe Wolqqama Xoossay, «He gallas ammanththizason eqqida dhishkey shodettana; meqqi wodhdhana; iza bolla kaqettida ubbay kundidi meqerettana» gides; hayssa GODAY yootides.