ኢሳያሳ ቲንቢቴ 21 - Geeshsha Maxaafa

Baabiloone Bolla Yootettida Tinbite

¹ Abba lanqen diza bazzo biittas yootettida GODAA qaalay hayssafe kaallizayssa. Dugeha baggafe gote carkoy pitti ekki yiza mala worajjizay shiro denththeththiza bazzo biittafe yees.

² Yashshiza ajjuuta ta be7adis; aaththi immizayssi aaththi immees; di7izayssi di7ees. Elaame denda! Meedoone giddoththa! iza gaththida waaye ubbaa ta essana.

³ Hessa gishshas ta xeessay sako xalala gidides; miixay oykkida maccassa mala tana leessoy oykkides; tani siyida yo7oy tana gadigadissides; ta be7ida yo7on shirotadis.

⁴ Ta wozinay poddu gides; tana yashshi kokkorisides; ta ufayssan naagida omarsay ta bolla hirga yeggides.

⁵ Istti maadda giigsida; uttizaso giigsida; midanne uyida. Intteno shuumetoo dendite! gondalleza zayten quccite!

⁶ GODAY tana, «Ba; wochchiza as woththa; izi ba be7idayssa yooto.

⁷ Paran gooshettiza para-gaareta be7iza wode hare toggizayta gaamella toggizayta be7iza wode izi yuushshi qoppo; lo7eththi wochcho» gides.

⁸ Naagizayssika waassishe, «Godawu, tani gallas gallas pacey baynda shakko bolla eqqadis; omars ubbaan ta naagizasohon eqqadis.

⁹ Be7ite, issi asi paratan gooshettiza para-gaaretan yides; histtidi, ‹Baabilooney kundadus! Kundadus! izi eeqa xoossa misletikka meqeretti gaden kundida› gi zaarides» gi waassides.

¹⁰ Balen bukettida ta derezoo! Ubbaafe Wolqqama GODAA Isra7eele Xoossafe ta siyida qaala nees yootays.

Eedoome Bolla Yootettida Tinbite

¹¹ Eedoome gishshas yootettida mino yo7o; issi asi Seyreppe tana xeygidi «Naagizayssoo! Gadey wonttanaas ay keena saatey attidee? Naagizayssoo! Gadey wonttanaas ay keena saatey attidee?» gides.

¹² Naagizayssi zaaridi, «Wonttana; gido attiin simmidi qammana; oychchana koykko oychchite; gido attiin simmidi haa yiite» gides.

Arabe Bolla Yootettida Tinbite

¹³ Arabe gishshas yootettida mino yo7o; Intteno Dadaane zal7anchchatoo! intte intte caana gaamellatara Arabe bazzon aqana.

¹⁴ Saamettidaytas haath ehite; intteno Temaanen dizaytoo! Bete asatas kath ehite.

¹⁵ Istti giththa mashshafenne koohoppe shodettida giththa mashshafe, waaxettida wondafeppenne suullida olappe baqatida.

¹⁶ GODAY tana, «Konttiraate oosanchcha ooso gallassi wuriza mala issi layththa giddon Qeedaare bonchchoy ubbay wurana.

¹⁷ Qeedaare biittan wondafen dukkiza wolqqama olanchchatappe guuththati attana; hessa GODAA Isra7eele Xoossay yootides» gides.