ኢሳያሳ ቲንቢቴ 2 - Geeshsha Maxaafa

Mernaa Saro

¹ Amoxe naa Isayaasi Yuhuda dere gishshassinne Yerusalaame katama gishshas be7ida ajjuutay hayssa.

² Wode wurseththan Xoossa keeththi iza bolla keexettida zumay hara zuma ubbaafe dhoqqi beettana. Zumbullata ubbaafe dhoqqu dhoqqu gaana; ubbaa kawoteththati hee goochchana.

³ Daro asay yiidi, «Wogay Xiyooneppe, GODAA qaalay Yerusalaameppe keziza gishshas haa yiite! GODAA zumaa, Yaaqoobe Xoossaa Keeth ane pude kezoos. Izi koyzayssaththo nuni baana mala izi nuna ba oge tamaarsana» gaana.

⁴ Izi kawoteththata giddon pirdana; daro asata garsan diza palama izi diggana. Istti bantta giththa mashsha maarasha, bantta toorakka baaca qoxxi kessana. Derey dere bolla mashsha denththenna; hessafe guye istti ola tamaarettenna.

⁵ Intteno Yaaqoobe zaretoo! Haa yiite! Ane GODAA poo7on simerettoos.

Godaa Gallas

⁶ GODAWU! Neni ne asaa Yaaqoobe zareta aggadasa. Istti arshey mokkiza baggara diza asata mala bitan kumida; Filisxeeme asaa mala muurenneettes. Istti allagara issife zuppeteettes.

⁷ Istta biittan biraynne worqqay kumides; istta dureteththas zaway baawa; istta biittan paray kumides; istta para-gaaretas zaway deenna.

⁸ Istta biittan eeqa xoossati kumida; bantta kushen ooththi kessida miishshas goynneettes.

⁹ Hessa gishshas asi ubbay ziqqi gaananne kawuyana. Istta qoho atto gooppa.

¹⁰ Yashissiza GODAA hanqofenne iza teemappe attanaas zaallatakko biidi biitta giddon qotettite!

¹¹ Otoranchcha ayfey gukkana; moodhettizayti kawuyana; he wode GODAY xalla dhoqqu dhoqqu gaana.

¹² Ubbaafe wolqqama GODAY Otoranchchata, moodhettizaytanne ceeqettizayta kawushshanaas gallas bari woththides.

¹³ Adussinne dhoqqa gidida Libaanoose zigatanne Baasaane wolata ubbaa,

¹⁴ Gita zumatanne dhoqqa zumbullata ubbaa,

¹⁵ katama naagiza adussa miixatanne katamaa yuushon diza mino gimbeta ubbaa,

¹⁶ Tarseese markabetanne bonchcho wogolota ubbaa izi kawushshana wodey dees.

¹⁷ Moodhettizaadey kawuyana; otoranchchay kundana; he gallas GODAY xalla dhoqqu dhoqqu gaana;

¹⁸ Eeqa xoossati ubbay mulera dhayana.

¹⁹ GODAY hayssa biittaa qaaththanaas dendiza wode Yashissiza GODAA hanqofenne iza teemappe attanaas asay qotettanaas shuchcha garsinne ollay dizaso baqatana.

²⁰ He gallas asay goynnanaas medhdhida bantta bira, worqqa misleta girossinne kafotas olana.

²¹ GODAY ha biittaa qaaththanaas dendiza wode iza yashiseththaafenne iza teemaappe dendidayssan shuchcha gongoloynne zaalla za7ay dizaso baqatana.

²² Shemppoy siidhera keziin aha gidiza asan ammanettofte; asi ay maaddanee?