ኢሳያሳ ቲንቢቴ 19 - Geeshsha Maxaafa

Gibxe Bolla Yootettida Tinbite

¹ Gibxe gishshas yootettida qaalay, «Be7ite, GODAY eesotiza shaara toggidi Gibxe yees. Gibxe eeqa xoossati iza sinththan kokkoreettes; Gibxe wozinay istta giddon seerees» gees.

² «Tani Gibxeta issaa issaa bolla denththana; ishay ishara, shooroy shoorora, katamay katamara, kawoy kawora olettana.

³ Gibxeta wozinay labettana; tani istta halchcho hada ooththana. Istta eeqa xoossatanne moytilleta, tuna ayana xeygizaytanne marota zore oychchana.

⁴ Qasse menxe iita asa kushen ta Gibxeta aaththa immana; babisiza kawoy istta haarana» gees GODAY, Ubbaafe Wolqqama Xoossay.

⁵ Abbaye shaafa haaththi paccana; haaththi guuxxi guuxxi melana.

⁶ Zara haaththati xinqqana; Gibxe kanchcheti micci dhayana; shaccatinne care maatati shullana.

⁷ Abbaye shaafa lanqen haaththa matan diza miththati shullana; shaafaa matan zerettida kath ubbay carkon pitetti dhayana; aykkoyka attenna.

⁸ Mole oykkizayti ceecana; Abbaye shaafan gaattile yeggizayti ubbay yeekkana; haaththa bolla bantta gite yeggizayta ubbaa wolqqay ixxana.

⁹ Paatettida talbba suqizayti dhayana; qasse booththa puuttofe may7o dadizayti hidota qanxxana.

¹⁰ May7o dadizayti ceecana; damozan aqizayta wozinay meqqana.

¹¹ Xaanoose biitta halaqati keehi eeya; aadho eranchcha gidida kawo Paaroone aadho eranchchata zorey hada. Paaroones, «Tani aadho eranchchatappe issaa; tani kase kawota kaallizaade» waanidi geetii?

¹² Intte aadho eranchchati ha7i awan dizoo? Ubbaafe Wolqqama GODAY Gibxe bolla ooththana qoppidayssa ane inttena bessettonne erisetto.

¹³ Xaanoose halaqati eeyda; Memppisa shuumeti balettida; izi dere kaaleththiza erettidayti Gibxe asaa baleththida.

¹⁴ GODAY istta bolla dochchiza ayana gussides; maththottida asi ba cooshshan gandigarza mala Gibxey ba ooso ubbaan gandigarana mala ooththida.

¹⁵ Kace woykko goyna, zamba woykko shacca heyti ubbay Gibxes aykkoka maadettenna.

¹⁶ He wode Gibxe asay maccassa mala gidana. Qasse Ubbaafe Wolqqama GODAY istta bolla ba qese denththiza wode istti yashshan kokkorana.

¹⁷ Yuhuda asay Gibxe asaa bolla shiro denththeththana; Ubbaafe Wolqqama GODAY istta bollan ooththana halchchida halchchofe dendidayssan Yuhuda gishshas siyida ubbay shirotana.

¹⁸ He wode Gibxe biittan diza ichchash katamati Kanaane qaalan haasayana; Ubbaafe Wolqqama GODAA bagga gidanaas caaqqana. He katamatappe issiniya Bashsha Katama geetetta xeygettana.

¹⁹ He wode Gibxe biittan GODAAS yarshosoy oosettana; qasse Gibxe biitta zawan GODAAS tuussi eqqana.

²⁰ Hessi Ubbaafe Wolqqama GODAAS Gibxe biittan malatanne markka gidana; istti banttana un7eththizaytappe dendidayssan GODAAKKO waassiza wode izi istta ashshizaadenne maaddizaade kiittidi istta ashshana.

²¹ GODAY bana Gibxetas qonccisana; isttika he gallas GODAA erana; yarshoninne kaththa yarshon iza goynnana. Istti GODAAS adinettana; ba adinettidayssaka gaththana.

²² GODAY Gibxe boshan shocana; zaaridikka istta paththana; isttika GODAAKKO simmana; izikka istta woosa siyidi istta paththana.

²³ He wode Gibxeppe Asoore gakkanaas wogga ogey oosettana; Asooreti Gibxe, Gibxe asay Asoore baana; qasse Gibxetinne Asooreti issi bolla goynnana.

²⁴ He wode Isra7eeley biittas anjjo gidanaas heedzdzanththo maaran Gibxeranne Asoorera issife qoodettana.

²⁵ Ubbaafe Wolqqama GODAY isttas, «Ta dere Gibxey, ta kushey medhdhida Asoorey, ta xinxxo Isra7eeley anjjettidayta gidetto» gi anjjana.