ኢሳያሳ ቲንቢቴ 17 - Geeshsha Maxaafa

Damasqo Bollanne Isra7eele Bolla Xoossa Qixaate

¹ Damasqo gishshas, «Be7ite, hayssafe sinththan Damasqo katamateththi attana; laaleththa doore gidana.

² Aaro7eere katamati kays gidana; mehe heenththasoho gidana; istta babisiza miishshika deenna.

³ Gimbettida katamay Efreemeppe, kawoteththa maatay Damasqofe dhayana; Aaraameppe casha attidayta bonchchoy Isra7eeletayssa mala kawuyana» gees Ubbaafe Wolqqama GODAY.

⁴ «He wode Yaaqoobe bonchchoy shaarumatana; iza modhdhoteththaykka shuumana.

⁵ Kath maxizaadey eqqida kaththaa shiishshidi modhe ba kushen maxiza mala Erafayme shoobbafe maxettiza pushulo mala gidana.

⁶ Wogara mith shociin nam7u woykko heedzdzu ayfeti hagga xeera bolla attiza mala oyddu woykko ichchash ayfeti dhippi gida haggata bolla attiza mala guuththa haggati attana» gi GODAA Isra7eele Xoossay haasaydes.

⁷ He wode asay bana Medhdhidayssako xeellana; istta ayfey Isra7eele Geeshshaako xeellana.

⁸ Istti bantta kushen ooththida yarshosohota xeellettenna; istti bantta eeqatas exaane cu7asizasohotassinne Asheeris goynnana essida tuussatas bonchcho imettenna.

⁹ He wode Isra7eele asaa gaason boshettontta attida mino katamati woranne aykkoy bayndaso gidana.

¹⁰ Nena ashshiza Xoossaa baladasa; ne izan qotetta attiza ne zaallaka akeekabeekka; hessa neni doorettida atakilte tokkikokka, ooraththa zereth ne zerikkoka,

¹¹ ne tokkida gallas izi mokkana mala ne ooththikokka, ne zerida wonteththa gallas izi ciiyana mala ne ooththikokka he kaththay hargeninne paxontta sakon mulera dhayana.

Morkke Kawoteththata Xooneteth

¹² Be7a, daro asaa hanqo giirissi abba dambala mala giirees; be7a, asaa waaso daroy wolqqama haaththa mala guummees.

¹³ Asay wolqqama haaththa mala guummikkoka, izi istta seerikko zumbulla bollara carkon biza gudulla mala gote carkoy laalliza happa mala laalettana.

¹⁴ Hekko Sa7ay qammishin qofay baynda shiro gidides; sa7ay wonttanaappe kasetidi oonikka beettibeenna. Nu aqota bonqqidayta, ubbaa wolqqan ekkizayta qaaday hessa.