ኢሳያሳ ቲንቢቴ 15 - Geeshsha Maxaafa

Mo7aabe Bolla Yootettida Tinbite

¹ Mo7aabe biitta gishshas GODAY yootida qaalay hayssa; Qiire-Mo7aaben diza Eerey laalettadus; issi gallassa omarsan dippi gadus; qasse Qiire-Mo7aaben diza Qiirey laalettadus; issi gallassa omars dippi gadus.

² Diboone asay Xoossa keeth kezides; yeekkanaas pude zumbullata bolla kezides; Mo7aabe asay Nebo gishshassinne Medeba gishshas waassees; hu7eynne buuchchay milxi gi meedettides.

³ Ogey dizaso ubbaan maaqa may7eettes; pooqeta bollaninne dabaabay dizason yeekkeettes; afunth gusseettes.

⁴ Hasebooneynne El7eeley waassida; istta waasoykka Yahaaxe gakkanaas seetettides. Hessa gishshas Mo7aabe olanchchati waassida; istta wozinaykka kokkorides.

⁵ Ta wozinay Mo7aabe gishshas yeekkides; izippe goodettida asati Zo7aare gakkanaas, Egilaate-Shalishiya gakkanaas baqatida; istti afunth gussishe pude Luhite kezida; qasse Horonayme efiza ogera bishe bantti dhayanayssas waassida.

⁶ Nimiriime haaththati miccida; maatay shullides; caarechchayka dhaydes; cilila miishshika beettenna.

⁷ Hessa gishshas istti haarida aqotanne istti shiishshida haaro Ahaya shaafa tookki pinththeettes.

⁸ Istta waasoy Mo7aabe zawa gakkanaas seetettees; istta waasoy Egilayme gakkanaas istta zilasaykka Bi7eeri-Eelime gakkees.

⁹ Dimoona shaafati suuththan kumida; gidikkoka tani Dimoona bolla hessafe aadhdhizaaz ehana. Mo7aabeppe baqatizayta bolla biittayn casha attidayta bolla gaammo yeddana.