ኢሳያሳ ቲንቢቴ 14 - Geeshsha Maxaafa

Di7eteththafe Isra7eele Asaa Simo

¹ GODAY Yaaqoobes nam7anththo qadhettana; Isra7eelekka zaareththidi doorana. Istta istta biittan woththana; imaththati yiidi Yaaqoobeso asaara walakettana.

² Kawoteththati efidi istta istta biitta zaarana. Isra7eele asay kawoteththata baas oykkidi maccassaanne attumasaa aylle histtidi GODAA biittan haarana. Bana di7idayta zaari di7ana; bana un7eththidayta zaaridi haarana.

Baabiloone Kawoy Hayqqidayta Bolla Gujeteth

³ GODAY inttena intte waayeppe, metoppenne un7eteththafenne iita aylleteththafe nena shemppisida gallassi,

⁴ intte Baabiloone kawo bolla qilccishe, «Un7eththizayssas wodey waani wuridee? izas giirissizayssi waani eqqidee!

⁵ GODAY iita xam7anne haarizayta kawoteththa guufe menththides.

⁶ Kawoteththata pacey baynda shocidayssa qadhetay baynda gooddi gooddi qoxxidayssa menththides.

⁷ Biittaya saronne shempo demmadus; ufayssa mazamure yexxawus.

⁸ Haray attiin zigatikka, Libaanoose xiiddatikka ufayettida; Nekka kundadasa; mith qanxxizaadeyka hayssafe guye kaltta nu bolla denththenna.

⁹ «Neni yiza wode Si7ooley nena mokkanaas giigettadus; nena mokki ekkana mala moytilleta, alame bolla dere haarizayta ubbata denththeththadus; qasse kawoteththata bolla kawotida kawota istta araataappe denththa essadus.

¹⁰ Istti nees, ‹Nekka nu mala daaburadasa; nu malakka gidadasa.

¹¹ Ne bonchchoy diiththaa giirissara duge si7oole wodhdhides; badati nees garsara hiixettida; guxuneti nees bollara may7o gidana› gaana» geeta.

¹² Nenoo wontta naazoo, torojje xoolinttezoo, ne waanada saloppe duge kundadii? Kawoteththata kawushshida neni waanada duge yegettadii!

¹³ Neni ne wozinan, «Tani pude salo kezana; ta kawoteththaa araataakka Xoossaa xoolinttetappe bollara dhoqqan woththana; zuma bolla shiiqizason anjjettida zumaa bolla dhoqqasohon ta kawoteththa araata bolla uttana.

¹⁴ Tani shaarati diza dhoqqasohoppeka pude aadhdhana; tani tana Ubbaafe Dhoqqa Xoossa mala ooththana» gadasa.

¹⁵ Gido attiin neni si7oolen duge ciimma ollan yegettadasa.

¹⁶ Nena be7izayti ubbay tishshi histti xeellidi nena, «Biitta qaaththidayssinne kawoteththata kokkorisidayssi hayssee?

¹⁷ Sa7a bazzo kessidayssi, katamatakka laalliday, di7ettidayti ba dere simmi bontta mala diggiday hayssee?» gaana.

¹⁸ Kawoteththata kawoti ubbay bonchchon dhiskida; ba duufon duufon shempida.

¹⁹ Ne gidikko koyettontta hagga mala duufoppe wora olettadasa; mashshan cadettidaytan, duge ciimma shuchcha ollan wodhdhidaytan, asa kushen hayqqidaytan kamettadasa; neni tohon yedhettida aha mala gidadasa.

²⁰ Neni isttara duufon daakka; gaasoykka ne biittaa bashshadasa; ne dereza ne dhayssadasa; iita ooththizayta zereththi mulekka akeekettenna.

²¹ Istti dendidi biitta laattontta mala, alamen ba katama istti kunththontta mala kase istta aawata nagara gaason attuma nayti siifettanaasoho giigsite.

²² Ubbaafe Wolqqama GODAY, «Tani istta bolla dendana; histtada istta sunththaa, isttafe attidayta, istta zereththaanne yeletaa Baabilooneppe dhayssana.

²³ Tani Baabiloone quxarsa aqosonne care kessana; bashsha peyxan tani izo pitta dhayssana» gees.

Asoore Bolla Yootettida Tinbite

²⁴ Ubbaafe Wolqqama GODAY, «Tani halchchida mala polettana; ta qoppida malakka hanana.

²⁵ Tani Asoore ta biitta bolla liiqisana; tani iza ta zuma bolla yedhdhana; iza qambaray ta dereza bollafe dendana; iza toohoykka istta hasheppe kichchana» gi caaqqides.

²⁶ Sa7a ubbaas qofettida qofay hayssa; kawoteththata ubbaa bollan micettida kushey hayssa.

²⁷ Ubbaafe Wolqqama GODAY hayssa qoppides; hessa iza oonee digganay? Izi ba kushe denththides; hessa zaaranay oonee?

Filisxeemeta Bolla Yootettida Tinbite

²⁸ Kawo Akaazey hayqqida layth hizgiza qaalay yides;

²⁹ Intteno Filisxeeme asatoo, inttena shocida guufey meqqida gishshas ubbati ufayettofte; shooshshaa garsafe haso shooshshi kezana; iza zereththika xongettiza marzera diza haso shoosh gidana.

³⁰ Putteesa manqoti duussaso demmana; metotanchchati woppu giidi ichchana. Gido attiin tani ne zare koshan wursana; qasse neeppe attidaytakka dippi histtana.

³¹ «Nenoo pengezoo! Wuu! Wuy ga; Nenoo katamazoo! Waassa; Intteno Filisxeeme asatoo! Intte ubbayka hirgan seerite! Gaasoykka pudeha baggafe cuway intte bolla yides; he cifraappe duuxxi attanay deenna.

³² He kawoteththatappe kiitetti yiza qasttannetas ay gi zaaranee? ‹GODAY Xiyoone minththi essides; waaye ekkida derey izi garsan shemposo demmides› gi zaaro.»