ኢሳያሳ ቲንቢቴ 11 - Geeshsha Maxaafa

Saroteththi Kumida Kawoteth

¹ Isseye durumappe aacay purccana; iza xaphotappe issi haggay ayfe immana.

² GODAA Ayanay, aadho erateththinne akeeka Ayanay, zore Ayanaynne wolqqa Ayanay, erateththa Ayanaynne GODAAS yashissiza Ayanay iza bolla shemppana.

³ GODAAS yashshan izi ufayettana; ba ayfen be7ida malanne ba hayththan siyida mala pirdenna.

⁴ Gido attiin hiyeesatas xillo pirdana; sa7a bolla manqotas suure pirdana; ba inxarsaa xam7an sa7a shocana; ba doona peenon iitata wodhana.

⁵ Xilloteththi izas xeessa dancco gidana; ammaneteththay izas dabala dancco gidana.

⁶ Kana suytey dorsa laaqqara issife daana; maaheykka deysha laaqqara issife ichchana; miiza mari, gaammo marinne modhdho mehey issife heemettana; guuththa nay istta heemmana.

⁷ Miizinne zardoy issife heemettana; istta maratikka issife ichchana; gaammoy boora mala happa maana.

⁸ Dhammiza nay iita shooshsha ollan kaa7ana; dhanth duuththontta nay ba kushe goppe shooshsha ollan yeddana.

⁹ Geeshshi gidida ta zumaa bolla qohettenna woykko oonikka dhayenna; haaththi abba kumiza mala sa7a ubbay GODAA eron kumana.

Di7etti Bidayta Simo

¹⁰ He wode Isseye zereththi kawoteththatas malaata gidi eqqana; kawoteththati izakko yaana; iza shemposoy bonchchettana.

¹¹ He wode GODAY nam7anththo ba kushe miccidi attida asaa Asooreppe, pudeha Gibxeppe, dugeha Gibxeppe, Tophphiyappe, Elaameppe, Sana7ooreppe, Hamaateppenne abba gaxan diza deretappe shiishshana.

¹² Kawoteththatas malaata essana; dhoqqu ooththidi denththana; Isra7eeleppe goodetti bidayta zaari ehana; laalettida Yuhuda asaa oyddu bagga biitta gaxappe izi shiishshana.

¹³ Efreeme qanaateteththi eqqana; Yuhuda morkketikka qanxxettana; Efreemey Yuhuda bolla qanaatenna; Yuhudaykka Efreeme ixxenna.

¹⁴ Istti arshey wulliza baggara Filisxeemeta dugunththaa wodhdhana; nam7ayka issife gididi arshey mokkiza dereza bonqqana; istti Eedoome bollanne Mo7aabe bolla bantta kushe denththana; Amoone asay isttas haarettana.

¹⁵ GODAY iita carkon Gibxe abba melissana; izi ba kushe Efiraaxise shaafa bolla yeddana; laappun kessi shaakereththi yeggana; hessa gishshas asay tohoppe caamma kessontta pinnana.

¹⁶ Kase Isra7eeley Gibxeppe kezishin hanidayssaththo Asooren attida asay kezana oge isttas giigsana.