ኢሳያሳ ቲንቢቴ 10 - Geeshsha Maxaafa

¹ Geella woganne as un7eththiza awajja kessizaytas aayye ana!

² Manqota pirda geellasizaytas, un7ettida ta dereza pirda bokkasizaytas, am7eta aqota bonqqizaytas, yi7ota aqota dhechchi mizaytas aayye ana!

³ Inttena xomosiza wode intte awa gelandetii? Haakoppe bashshi yiza wode ay hanandetii? Maado demmanaas oonakko baqatandetii? Intte aqota awan qottandetii?

⁴ Qashettida asaara issife qasheteththafe shukettiza asaara issife shuketeththafe attiin haray inttes attanaasoy deenna. Hessi ubbay haniinkka GODAA hanqoy dochchibeenna; qaxxayanaas izi ba kushe denththi woththides.

Asoore Bolla Yaana Xoossa Pirda

⁵ GODAY, «Ta hanqos guufe, ta ehiza bashshas xam7a gidida Asoore biitta asaas aayye ana!

⁶ Istta aqota bonqqana mala, banttas di7o buuri shiishshana mala, istti oge urqqaththo yedhettana mala, Xoos erontta kawoteththa bolla kiittana. Tana hanqeththida asaa bolla tani Asooreta yeddana.

⁷ Gido attiin Asoore kawoy hayssa halchchibeenna; iza wozinan hayssa mala qofay deenna; iza halchchoy daro kawoteththata bashshanaassinne mulera dhayssanaassa.

⁸ Izi, ‹Ta ola gadawati ubbati kawo gidettennee?› gi ceeqettees.

⁹ ‹Kalnnoy Karkamishe mala, Hamaatey Arfaade mala, Samaariyaykka Damasqo mala gidettennee?

¹⁰ Yerusalaameninne Samaariyan de7iza eeqa misletappe dariza misleta goynniza kawoteththata seeranaas tani ta kushe yeddadis.

¹¹ Samaariya bollaninne izi misleta bolla ta ooththoyssaththo Yerusalaame bollanne izi misleta bolla ta ooththikinaa?› gees» gides.

¹² GODAY Xiyoone zuma bollanne Yerusalaame bolla ba ooththana ooso ubbaa polidaappe guye, «Asoore kawo iza wozina otoreteththaa gishshassinne izi kadhe ayfen xeelliza gishshas ta iza qaxxayana» gees.

¹³ Asoore kawoy, «Hayssa ubbaa tani mino qesen ooththadis; qasseka tani aadho eranchchanne akeekanchcha; tani kawoteththata zawa laalladis; tani istta aqota bonqqa ekkadis; ta qarateththan istta kawota kawushshadis.

¹⁴ Asi ba kushe kafo keeththan yeddiza mala tanikka ta kushe kawoteththata aqotan yeddadis. Qasse asi dogetti attida phuuphphulleta shiishshiza mala tanikka dere ubbaa shiishshadis. Paallanaas ba qefe micciday deenna; waassanaas ba doona doyday deenna» gides.

¹⁵ Kalttay banan qanxxizaade bolla ceeqettizee? Magaazey bana goochchizaade bolla otorettizee? Xam7ay bana oykkida asa bolla ba hu7e qaaththana dandayzee? guufey asi baynda barkka hemetti erizee?

¹⁶ Hessa gishshas GODAY, Ubbaafe Wolqqama GODAY, modhdhida iza olanchchata bolla gilqisiza harge yeddana; iza bonchchozappe garsara laciza tama yeddana.

¹⁷ Isra7eele Poo7oy tama gidana; Geeshshazikka tama laco gidana; issi gallassan iza agunththaanne kindichchoza tamay maana.

¹⁸ Harganchchay gilqidi hayqqiza mala ba woraa bonchchonne aradda biitta, ashonne shemppo mulera dhayssana.

¹⁹ Iza woran guuththa miththati casha attana; heytakka qeeri nay qoodi wursana dadayees.

Casha Attida Isra7eele Zareta

²⁰ He wode Isra7eele zareppe casha attidayti, Yaaqoobe keeththafe attidayti hayssafe guye banttana shocidayta bolla zemppettenna; gido attiin GODAAN Isra7eele Geeshshan tumappe ammanettana.

²¹ Casha attidayti simmana; Yaaqoobe keeththafe casha attidayti Ubbaafe Wolqqama Xoossaako simmana.

²² Nenoo Isra7eele! Ne asay abba shaamintta mala gidikkoka casha attidayti xalla simmana. Xilloteththan kumida gita bashshi awajettides.

²³ GODAY, Ubbaafe Wolqqama GODAY sa7a ubbaa bollan ehana qachchida bash ehana.

Asoore Bolla Yaana Xoossa Pirda

²⁴ Hessa gishshas GODAY, Ubbaafe Wolqqama GODAY, «Xiyoonen diza ta derezoo! Gibxeti ne bolla ooththidayssaththo guufe ne bolla denththidayta durqqan nena qoxxida Asoore asaas babbofa.

²⁵ Ta ne bolla ehida qixaateza guuththa wode garsan ta essana; ta istta bollaka bosha ehana» gees.

²⁶ Ubbaafe Wolqqama GODAY, «Midiyaame asaa Hereebe zaalla achchan shocoyssaththo izi istta xurqafera wadhdhana; izi Gibxeta bolla ooththidayssaththo ba guufeza abba bolla denththana.

²⁷ He gallas istta toohoy ne hasheppe, istta qambaray ne morgefe kichchana; ne ordeteththafe dendidayssan iza qambaray meqqana» gees.

Worajjizayti Yeggida Ola

²⁸ Istti Ayaatera biidi Migeroone kanththi beettes; baas diza miishshaa Makimaasen shiishsheettes.

²⁹ Istti pinnizasora aadhdhi biidi, nuni Geeban dunkaani aqana; Eraamay dagammadus; Sa7oole katama Gibi7ay baqatadus.

³⁰ Gaalime nayee ne waassa! Laysha ezga siya! Manqo gidida Anatoote, ne izis zaaro imma.

³¹ Madimeenaha baqata bolla dawus; Geeba derey qotettana woththan dees.

³² Istti hach Noobe gakkana; istti bantta kushe Yerusalaame zumbulla bolla, Xiyoone macca nay zuma bolla ceeqeteththan mandana.

³³ Be7ite GODAY, Ubbaafe Wolqqama GODAY ba gita wolqqan haggata qanxxereththana; adussa miththatikka shiretti wodhdhana; dhoqqu dhoqqu gidaytikka kundana.

³⁴ Girdi gida woraakka kalttara qeexana; Libaanoose zigatikka Wolqqamaza sinththan kundana.