ኢሳያሳ ቲንቢቴ 1 - Geeshsha Maxaafa

¹ Yuhuda kawota Ooziya, Iyo7aatame, Akaazenne Hizqiyaasa kawoteththa wode Amoxe naa Isayaasi Yuhuda gishshassinne Yerusalaame gishshas be7ida ajjuuta.

Xoossay Ba Dereza Seerida Seera

² GODAY, «Salotoo siyite! biittayee nekka ezga siya! Tani nayta yelada dichcha gaththiin istti ta bolla makkallida.

³ Booray ba godaa erees; harey iza goday izas giigsida zedhekka erees; Isra7eeley gidikko tana erenna; ta dereykka akeekenna» gides.

⁴ Intteno nagaranchcha kawoteththatoo! Qohon kumidaytoo! Iita ooththiza zereththatoo! Intte aawata tunateththaa kaalliza naytoo! Inttena aayye ana! GODAA aggaagideta; Isra7eele geeshshaza yeggi aggideta; zokkoka izas zaarideta.

⁵ Makkalla bolla makkalla gujjidi intte ays zaari zaari qaxxayetteetii? Intte hu7ey mule sakettides; intte wozinaykka daaburdes.

⁶ Hessa gaason hirki toho xugunththafe biidi hu7e iske gakkanaas paxateththi inttes baawa. Madunth, kixanne uzas xalla gidides. He madunththay meecettibeenna; qashettibeenna; zaytenkka shuggibeenna.

⁷ Intte derey aykkoy baynda bazzo gidana; intte katamati taman xuugettana; intte ayfey xeellishin intte biitta allagay bonqqi ekkana; istti intte biitta bula kessana.

⁸ Xiyoone naya woyne miththa giddon diza gaabba mala, lelehe giddon diza qeeri keeththa malanne morkkey giddoththida katama mala gidadus.

⁹ Ubbaafe Wolqqama GODAY nuus zereth ashshonttaakko, nuni Sodoome malanne Gamoora mala gidanakkoshin.

¹⁰ Intteno Sodoome ayssizaytoo! GODAA qaala siyite; intteno Gamoora deretoo! Nu Xoossa timirte ezgi siyite.

¹¹ «Intte yarsho daroy taas ay ooththanee? Hanno gakkanaas intte taas shiishshida xuugetti shiiqiza dharsho ashonne modhdho meheta asho kalladis; tani boora suuththan, dorsa suuththaninne deysha suuththan ufayettike.

¹² Intte taas goynnanaas yiza wode hessa ubbaa intte ekki yaana malanne ta Keeththa zago intte yedhdhana mala ooni oychchidee?

¹³ Hayssafe guye hayssa misatiza hada yarsho nam7anththo shiishshofte; intte cuwasiza exaaney tana shaattees; agina xeeron, sambata gallassataninne intte goynos shiiqiza gallassatan intte bonchchiza ba7aaleti iitateththan kumida gishshas tani heyta gencca aadhdhanaas dandaykke.

¹⁴ Agina xeeron intte bonchchiza gallassatanne kase intte woththida ba7aale gallassata ta shemppoya harasettadus; heyti taas daro deexo tooho gidida gishshas ta istta tookkanaas dandaykke.

¹⁵ Intte intte kushe woosas taakko micciko tani ta ayfe inttefe haraso zaarana; intte kushen suuththi kumida gishshas intte keehi woossikokka ta intte woosa siyikke.

¹⁶ Meecettite; inttena geeshshite; intte iita oosoza ta sinththafe diggite; iita oosokka aggite.

¹⁷ Lo7o ooso tamaarte; suure pirda koyite; qohettidayta minththeththite; yi7otas eqqite; am7etas mootettite» gides.

¹⁸ Qasseka GODAY, «Haa yiite issoy issaara ane buuxettoos; intte nagaray xeeqa zo7o gidikkoka shachcha mala boottana; suuththa mala zo7ikkoka puutto mala puqqa booth gidana.

¹⁹ Intte taas eeno gi azazettiko biitta anjjo maana.

²⁰ Intte taas akkay gi makkalliko mashshay inttena maana; hayssa yootiday tana GODAA» gides.

Nagaray Kumida Katamayo

²¹ Kase ammanettida katamaya waanada layma gidadee? Kase izin suure pirday kumidaaranne xilloteththi izin kumidaara ha7i gidikko shemppo wodhizaytas duussaso gidadus.

²² Hanne ne biray shiydes; ne woyne ushshay haaththan yeellettides.

²³ Nena kaaleththizayti makkallanchchataranne kaysotara laggetida; istti ubbayka maganxo doseettes. Matta7ekka keehi koyeettes; yi7otas aadhdhi eqqettenna; am7eta magana siyettenna.

²⁴ Hessa gishshas GODAY, Ubbaafe Wolqqama GODAA Isra7eele Xoossay, «Tani ta morkketa bolla ta hanqo gussana; tana komizayta bollaka tani halo kessana.

²⁵ Tani ta kushe ne bolla denththana; ne bolla diza kinththaka ta geeshshana; ne qitaakka ne bollafe diggana.

²⁶ Kase nena ayssizayta mala hara nena ayssanaytanne zoranayta tani nees denththana; hessafe guye neni, ‹Xilloteththi diza ammanettida katamayo› geetettana.

²⁷ Xiyoona suure pirdan, maaroteththan simmizayti xilloteththan wozzettana.

²⁸ Gido attiin makkallanchchatinne nagaranchchati issi bolla liiqana; Xoossa aggizayti wurikka dhayana.

²⁹ Kase intte dosiza kaashshatan intte yeellatana; kase intte doorida atakiltesohotan intte kawuyana.

³⁰ Wurseththan intte bonccoy qokkida wola mala, haaththi baynda atakiltesohota mala gidana.

³¹ Mino asi happa mala; iza oosoykka pil7i giza laco mala gidana; nam7ayka issi bolla xuugettana; he tamaa toyssana asikka deenna» gides.