Ibirawe 3 - Geeshsha Maxaafa

Yesusi Museppe Aadhdhees

¹ Hessa gishshas saloppe xeyssi inttena gakkiin ammaniza nu ishatoo! Nu ammanos Hawaarenne qeeseta halaqa gidida Yesusa qopite.

² Musey Xoossa Keeth ubbaa bolla ammanettidaade gidida mala Yesusikka bana shuumidaades ammanettidaade.

³ Keeththe keexxidaades keeththaafe bollara bonchchoy diza mala Yesusaska Museppe aadhdhiza bonchchoy bessizaade gidanaas bessees.

⁴ Keeththe ubbaasikka keexxidaadey dees; gido attiin wursika ooththiday Xoossa.

⁵ Musey tinbite markkattishe Xoossa Keeth ubba bolla issi ammanettida oosanchcha mala gidi de7ides.

⁶ Kirstoosi gidikko Xoossa Keeththaa bolla ammanettida naa mala. Nunikka iza bolla ammanettiza ufayssaynne ceeqettiza hidotaa lo7eththi oykkiko nu izas duussa keeththa.

Xoossa Asas Imettida Qofiso Qaala

⁷ Hessa gishshas Xillo Ayanay giza mala, «Intte hach iza qaala siyikko

⁸ bazzo biittan intte tana paaccida wode makkallidayssaththo intte wozina muumisopite.

⁹ Intte aawati kase heen tana paaccidanne tanara eqettida. Ta ooththidayssa wursi oyddu tammu layth gakkanaas be7ida.

¹⁰ He wode yeletata bolla ta hanqettin istta wozinay ubba wode balettees; istti ta oge eribeettenna.

¹¹ Qasse, ‹Ta isttas immiza shemposo istti mulekka gelettenna!› gaada tani ta hanqon caaqqadis» gees.

¹² Ta ishatoo! Inttefe oonikka de7o Xoossaafe haraso inttena haassiza iitanne ammanontta wozinay dontta mala naagettite.

¹³ Harappeka intte garsafe oonikka nagaran balettidi ba wozina muumisontta mala, «Hach» geetettishin hach hach intte intte garsan minettite.

¹⁴ Nuus kase koyroppe diza ammano nuni wurseth gakkanaas lo7eththi minththi oykkiko nuni Kirstoosara issife laattana.

¹⁵ Hessika, «Intte hach iza qaalaa siyikko kase makkallidaytayssa mala ha7ikka intte wozina intte minththontta mala» geetetti Geeshsha Maxaafan xaafettidayssaththo hanides.

¹⁶ Siyidi makkallidayti istti oonanttee? Musey Gibxeppe kaaleththi kessidayta ubbata gidettennee?

¹⁷ Xoossi istta bolla oyddu tammu layth hanqettidayti istti oonanttee? Nagara ooththiin istta ahay bazzo biittan kundi attidayta gidettennee?

¹⁸ Izas azazettontta ixxidaytappe attiin iza shemposo gelontta mala izi caaqqi diggiday haray oonanttee?

¹⁹ Hessa gishshas istti gelontta attiday ammanoy baynda gishshas gididayssa nu eroos.