ሆሴኤ ቲንቢቴ 8 - Geeshsha Maxaafa

Isra7eele Asaa Bolla Yida Godaa Hanqo

¹ «Asay tanara diza caaqo qaala laallides; ta woga bollaka makkallides. Hessa gaason morkkey arganththa mala GODAA keeththa bolla alaanththees. Hessa gishshas istti naagettana mala zaye punna!

² Isttika, ‹Xoossawu! Nu nena eroos› gishe taakko waasseettes.

³ Gido attiin Isra7eele asay lo7o miish ixxida gishshas morkkey istta gooddana.

⁴ «Ta sheney baynda istti baas kawota kawoththida; tana oychchontta dishe daannata doorida; ba birappenne ba worqqafe bana dhayssana eeqa xoossata baas ooththida.

⁵ Samaariya dere asatoo! mari misatissi intte medhdhida eeqa xoossati tana shaatteettes. Ta hanqoy intte bolla tama mala eexxees; intte mooro ooson ayde gakkanaas intte gam7anee?

⁶ Hiillanchchay mara misle medhdhida eeqa xoossati Xoos gidanaas dandayettenna. Hessa gishshas mar misati oosettida Samaariya eeqa xoossati meqeretti wodhdhana.

⁷ Istti carko zeridi gote shiishshana; buuxa bolla ayfey deenna; dhiilleyka beettenna; ayfikkoka allagati maana.

⁸ Isra7eeley hara kawoteththata giddon hiraysso miishsha mala gidida.

⁹ Barkka bazzo biittan toylattiza hardida mala gede Asoore dere bida. Bana maaddana mala kawotas miishshe immidi baas dabbo shammida.

¹⁰ Istti bana kawotas aaththi bayzikkoka ha7i ta istta shiishshana; kawotinne daannati istta bolla gaththiza metoppe dendidayssan istti guuxxi guuxxi baana.

¹¹ «Efreemey nagara wursanaas daro yarshosoho ooththides; gido attiin he yarshosohoti nagara ooththizaso gidida.

¹² Ta isttas ta wogaa garsan diza daro miishshata xaafadis. Istti gidikko hada miishsha mala qoodida.

¹³ Istti lo7o yarsho shiishsheettes he yarsho ashozakka meettes; gido attiin GODAY isttan ufayettibeenna. Hessa gishshas izi istta iitateththaa zaari qoppana; istta nagara gishshas qaxxayana. Isttika Gibxe simmana.

¹⁴ «Isra7eele derey baas gita kawoteththa keeththata keexxides; gido attiin bana medhdhidayssa balides. Yuhuda dereykka daro mino katamata ooththides; gido attiin tani he katamata bolla tama yeddana; istta miixataka tamay maana» gides.