ሆሴኤ ቲንቢቴ 7 - Geeshsha Maxaafa

¹ «Tani ta dere Isra7eele asa paththanaassinne zaarada duresanaas koyza wode; Efreeme nagaraynne Samaariya asa iitateththi keehi dari beettides. Istti issoy issaas wordoteettes, kaysoti keeththe bookki gelidi kaysoteettes, pangati oge bolla aadhdhooson aadhdhooson bonqqeettes.

² Gido attiin tani hayssa istta iitateththaa wursa erizayssa istti akeekibeettenna. Hessa gishshas istta istta nagaray giddoththi woththides; istta iita oosoy taappe geemmibeenna» gees.

Kawo Keeththan Dendida Iita Maqqo

³ GODAY, «Istti kawoza ba iitateththan halaqatakka bantta wordon baleththeettes.

⁴ Istti wurikka laymatizayta, bukeesoy dendana gakkanaas daabbo uukkizaadey tama eeththanaas koshshontta seelisida cooce mala.

⁵ Nu kawoza ba7aale gallas halaqati woyne ushshan maththo leelaa gida. Izikka qidhizaytara zuppetides.

⁶ Istta wozinay cooce tama mala seellides; genen izakko shiiqeettes. Istti omarsi kumeththi hanqo cuwattishe aqeettes wonteththa gallas eexxiza tama mala popol7u geettes.

⁷ Wurikka tama cooce mala seellidayta; banttana ayssizayta dippi histti wursida. Istta kawotikka kundida; isttafe oonikka taakko shiiqibeenna.

Isra7eele Asay Hara Kawoteththatara Walakettides

⁸ «Efreemey hara kawoteththatara walakettides; izi shirettontta attida ukeththa mala.

⁹ Allagati istta wolqqa mida; gido attiin istti hessa eribeettenna. Iza hu7ey puulunth caddides; gido attiin izi hessa eribeenna.

¹⁰ Isra7eele asaa otoreteththi istta bolla markkattees; hessi wuri haniinkka istti GODAA bantta Xoossako simmibeettenna; izakka koyibeettenna.

¹¹ «Isra7eele asay elle balettizanne qofay baynda haraphphe kafo mala. Issito Gibxe xeygees; hara wode qasse Asoorekko simmees;

¹² Istti piradhdhishin ta gite istta bolla yeggana; salo kafota mala duge goochcha woththana; istti ooththida iita ooso gishshas ta istta dere sinththan qaxxayana.

¹³ Istti taappe haakki bida gishshas isttas aayye ana! Ta bolla istti makkallida gishshas istta bolla dhayssizaazi yo; Tani istta wozzana koyadis; istti gidikko ta bolla wordo haasayeettes.

¹⁴ Istti ba hiixa bolla ichchidi yeekkeettes; gido attiin wozinappe taakko woosettenna; kaththassinne ushshas shiiqeettes; gido attiin taappe sher7i gida.

¹⁵ Tani istta tamaarsadissinne istta minththadis; istti gidikko ta bolla dendida.

¹⁶ Taappe haakkidi hada miishshako simmida; Istti caddana xongiin wora biza toora mala. Istta kaaleththizaytikka bantti haasayza iita qaala gaason mashshan wurana; hessafe dendoyssan istti Gibxe biittan qidhes attana.