ሆሴኤ ቲንቢቴ 5 - Geeshsha Maxaafa

¹ Intteno qeeseto hayssa siyite! Isra7eele asatoo akeekite! Kawo keeththa asatoo hayssa ezgite! Hekko pirday intte bolla yides; Gaasoykka intte Mixiphphan narxa, Taaboore zuman gite gidideta.

² Makkallanchchati shemppo wodho kaseppe haa darssida; hessa gishshas tani istta ubbaaka qaxxayana.

³ Tani Isra7eele asa ubbaa erays. Isra7eeley ta ayfeppe geemmabeekku; Efreeme, neni laymateththa goynon tunadasa.

⁴ Isra7eele asay ooththida mooroy istti ba Xoossaako simmontta mala diggides. Laymateththa ayanay istta wozina kumides. Hessa gishshas istti GODAA erettenna.

⁵ Isra7eele asaa otoroy istta bolla simmi markkattees. Istti bantta nagaran dhuphettana. Yuhudaykka isttara issife dhuphetti kundana.

⁶ Istti GODAA koyanaas bantta wude mehetanne miizatakka laaggi efana; gido attiin izi isttafe shaakettida gishshas istti iza demmettenna.

⁷ Istti eeqa xoossatas goynniza gishshas GODAAS ammanettibeettenna; istti layman nayta yelida. Hessa gishshas istti agina xeeron bonchchiza ba7aaley isttanne istta nayta issife dhayssana.

Isra7eeleninne Yuhuda Giddon Dendana Ola

⁸ Asay olas kezana mala Gibi7an zaye zayite; Eraaman xurumba punnite. Beeti-Awenen, ‹Biniyaame baggatoo! Nu inttenara doos› gishe waassite.

⁹ Qixaatey yiza wode Efreemey bula gidana; hayssi Isra7eele bolla gakkanayssa ta lo7eththa erisays» gees.

¹⁰ GODAY, «Yuhuda kaaleththizayti dhas shoddiza asa mala gidida gishshas tani ta hanqo haaththa di7o mala istta bolla yeddana.

¹¹ Isra7eele asay hada xoos kaalon minnides. Hessa gaason naaqettidetanne pirdan qohettideta.

¹² Hessa gishshas tani Isra7eele asaa piinno mala, Yuhuda asas qasse quno mala gidana.

¹³ Isra7eeley ba sakoza; Yuhudaykka ba madunththa be7idi Isra7eeley Asoorekko ba ayfso zaaradus; Isra7eeley maado demmanaas gita Asoore kawookko qasttanne kiittadus. Gido attiin izi inttena ashshanaas woykko intte madunththa paththanaas dandaybeenna.

¹⁴ Hessafe dendidayssan tani Isra7eeles gaammo mala Yuhudaska wodalla gaammo mala gidana; ta istta nififi histta menththereththa yeggana; bonqqa ekkada baana; oonikka istta ta kusheppe ashshanaas dandayenna.

¹⁵ Istti ba bala eridi taakko simmana gakkanaas tani isttafe haakkana. Istta bolla metoy dariza wode istti tana minththi koyana» gees.