ሆሴኤ ቲንቢቴ 4 - Geeshsha Maxaafa

Isra7eele Bolla Dendida Mooto

¹ Hanno biittay bolla diza asa ubbaa bolla GODAY shiishshiza mootoy dees. Hessa gishshas Isra7eele asawu! Izi inttena gizayssa siyite; «Hanno biittay bollafe ammaneteththay, siiqoynne Xoos eroy dhaydes.

² Haan dizay qanggeth, wordo, shemppo wodho, laymateththinne caaqqida qaala muusi xalla dees. Geneynne shemppo wodhoy dari dari bees.

³ Hessa gaason biittay bolla koshay yees; izi bolla dizay wuri gilqees; meheti, do7ati, kafotinne Abba giddon diza moleti ubbay wureettes.»

Goday Qeeseta Bolla Hanqettides

⁴ GODAY, «Intteno qeeseto ta inttena mootiza miishshi dees; hessa gishshas oonikka hara asara palamettofo; qasse oonikka hara as mootoppo.

⁵ Intte omarsinne gallas dhuphetteeta; nabetikka inttenara dhuphetteettes. Hessa gishshas tani intte aayo Isra7eele dhayssana.

⁶ Ta derezas erateththi paccida gishshas dhaydes. Intte tana eranaas koyontta gishshas tanikka intte taas qeeseta gidi ooththana mala koykke. Intte ta woga balettida gishshas tanikka intte nayta balana.

⁷ Qeeseta qooday dari dari bishin istti ta bolla ooththida nagaray dari dari bides; bantta bonchchoka kawushshan laammida.

⁸ Ta dereza nagaray isttas muussas kiyides; hessa gishshas derey nagara ooththizayssa keehi dosida.

⁹ Intte qeesetikka deraappe dummatekketa; hessa gishshas ta ubbaaka izaade hano mala iza qaxxayana; iza ooso malakka izas immana.

¹⁰ Ta derey tana GODAA aggida gishshas istti maanashin kallettenna; laymatanashin corattettenna» gees.

Goday Eeqa Xoossatas Goyno Ixxees

¹¹ «Laymateththas, Caalida woyne ushshas, mal7o woyne ushsha suukes banttana aaththi immida; hessantti ta dereza wozina ekkida.

¹² Hessa gishshas miththafe oosettida eeqa xoossa zore oychcheettes; istti izan maroththiza guufezikka isttas zaaro immiza misatees; laymateththa qofay baleththides; bantta Xoossaas ammanettibeettenna.

¹³ Zumay dizason dizason yarsho yarsheettes; zumbullata bolla, gita daashsha miththata kuwa garsan xuugettiza yarsho yarsheettes. Hessa gaason intte macca nayti layman daana; intte nayta machcheti laymatana.

¹⁴ Intte macca naytinne intte nayta machcheti laymatishin tani istta qaxxaykke; gaasoykka intte attumasati layma maccassatara suuketeettes; eeqa xoossatas laymateththa yarsho shiishshizaytara intteka izaththo yarsheeta. Hessa gishshas akeekay baynda derey dhayana.

¹⁵ «Intteno Isra7eele asatoo! Intte laymatikkoka Yuhuda asay laymatana mala ooththofte; hessa gishshas taas goynnanaas Gelgela woykko Beeti-Awene geetettizaso boopite; ‹De7o GODAY beyiin› giidi ta sunththan caaqqofte.

¹⁶ Isra7eele derey makkallanchcha ussa mala makkallides; histtiin GODAY istta dorsa laaqqata mala lo7oson wostti heemmanee?

¹⁷ Efreemey eeqa xoossata goynon oykettida gishshas istta gede aggaagite.

¹⁸ Woyne ushshu uyidaappe guye laymateettes. Istta ayssizaytikka yeellachchiza miish doseettes.

¹⁹ Istta gote carkoy pitti efana; istta yarshoy istta bolla yeella ehana.