ሆሴኤ ቲንቢቴ 2 - Geeshsha Maxaafa

¹ Hessa gishshas intte intte ishata Isra7eele nayta, «Aami» intte michchetakka «Uruhaama» gi sunththite.

Ammanettontta Ixxida Isra7eele Asaa Qaxxayeteth

² «Ta naytoo! Intte aayo zorite; hayssafe guye iza taas machcho gidukku; tanikka izis azina gidikke; ba sinththafe layma suuke hano, ba wodira giddofe laymateth diggu.

³ Iza simmontta ixxiko iza ba aayey uloppe kallo yelettida mala ta izo xiire kallo ashshana. Bazzo malanne mela biitta mala ta izo ooththana. Ta izo haaththa saamon wodhana.

⁴ Layma maccassafe yelettida gishshas izi naytas ta mishettike.

⁵ Istta aaya layma; kawushsha hanon shaaradus. Iza ba doonara, ‹Tani ta laggeththotaakko bays; istti taas kaththinne haaththe, suufeppenne lee7e haareppe dadettida may7o, wogara zaytenne woyne ushshu immana› gadus.

⁶ Hessa gishshas tani izi oge agunththara gordana; iza kezana penge demmontta mala tani gimbe yuushsha aaththa gordana.

⁷ Iza ba laggeththota demmanaas woxxana shin isttako gakkanaas dandayukku. Iza istta daro koyana shin demmuku; hayssafe guye, ‹Hayssa ha duussafe taas kase duussay lo7o; hessa gishshas beni ta azinaakko ta simma baana› gaana.

⁸ Tani izis kase kath, woyne ushshinne wogara zayte immidayssanne qasseka iza ba7aale geetettiza eeqa xoossas yarsho biranne worqqa izis darssiday tana gididayssa iza shaakka erabeekku.

⁹ Hessa gishshas kaththi kaxxiza wode ha kaxxiza kaththaa, woyne ayfey teeriza wode woyne ushshaa, tani izippe woththa ekkana. Hessaththoka iza ba kalloteththa kammontta mala suufeppenne lee7e haareppe dadettida may7oza ta izippe qaara ekkana.

¹⁰ Izi laggeththota sinththan ta izo kallo ashshana; izo ta kusheppe ashshanay deenna.

¹¹ Iza ba ufayssa ba7aaleta ubbaa, layththan layththan bonchchiza ba7aaleta, agina xeeron xeeron bonchchiza ba7aaleta, Sambatatanne hara iza dumma dumma doora bonchchiza ba7aaleta nam7anththo ooththontta mala ta diggana.

¹² Iza ba laggeththotappe baas waaga gaada ekkida woyne miththatanne balase miththata ta dhoqallana. Isttaka wora do7ati maana.

¹³ Ba7aale geetettiza eeqa xoossas exaane cuwasanaassinne lo7o geexe woththada iza ba laggeththota kaallada tana aggida gishshas ta izo qaxxayana.

Xoossi Ba Deraa Siiqiza Siiqo

¹⁴ «Hessa gishshas ta izo maqqada bazzo efana; heen ta izira siiqo qaalan haasayssana.

¹⁵ Kase izi woyne atakilteza ta izis zaarana; meto shoobba ta izis hidota penge histtana; heen iza Gibxeppe kezida gallas naateththan dashe yexxida mala yexxana.

¹⁶ Iza he gallassi tana, ‹Ta azinazoo› ga xeygana attiin hayssafe guye, ‹Ba7aale› geetettiza eeqa xoossa sunththan tana xeygukku.

¹⁷ Ba7aale geetettiza eeqa xoossata sunththaa ta izi doonappe diggana; hayssafe guye istta sunththi dendenna.

¹⁸ He wode do7atara, kafotaranne biitta bolla gooshettiza medheteth ubbatara ta intte gishshas caaqettana. Ubbayka saron daana mala ola, tooranne, Mashsha biitta bollafe ta diggana.

¹⁹ Hanne Isra7eele! Ta nena mernaas taas giigsana; Ta nees xilloteththaninne suureteththan pirdana; aggontta siiqoninne qadhetan ta nena taas oychcha giigsana.

²⁰ Tani ammanettada nena taas machcho giigsana. Nenikka tani GODA gididayssa erana.

²¹ «He gallas tani zaaro immana; tani salo azazana; saloykka sa7as zaaro immana.

²² Biittay kath, woyne ushshunne zayte immana; isttika Izra7eeles zaaro gidana.

²³ Tani ta dereyo biitta bolla tokkana. ‹Maaroteththi bayndaaro› geetettidaaro ta zaarada maarana; ‹Ta maarikke› gidayssaka zaara maarana; ‹Intte ta dere deekketa› geetettideta. ‹Ta dereta› gaada ta xeygana gaana; isttika tana, ‹Neni nu Xoossa› gaana» gees.