ሆሴኤ ቲንቢቴ 13 - Geeshsha Maxaafa

Isra7eele Bolla Yaana Wurseththa Pirda.

¹ Efreemey Isra7eele dereza giddon bonchchetti diza gishshas izi haasayshin asay ubbay kokkorees. Gido attiin ba7aales goynnida gishshas qohides; hayqqides.

² Ha7ikka nagara bolla nagara gujjida; bantta cinccateththan misleta baas giigsida; birappe eeqa xoossata banttas medhdhida; heyti wurikka asa kushen oosettidayta; hayta ha asata gishshas, «As yarsho histti shiishsheettes; mara mislen oosettida eeqa xoossata yeereettes» geetettides.

³ Hessa gaason istti wontta maalado shaara mala coo tim7i gaana; maalado xaaza malakka coo wodhdhi dhayana; woykko bangga bukkiza baleppe gote carkoy efiza suulla mala gidana; woykko keeththafe kezidi beettishe coo dhayza cuwa mala gidana.

⁴ GODAY, «Nena Gibxeppe kessiday tana GODAA ne Xoossa; nees taappe attiin hara Xoossi deenna; nena ashshiday taappe attiin hara xoos gidenna.

⁵ Bazzo biittan kaththinne haaththi bayndason nena ishalsa woththadis.

⁶ Gido attiin ta miziin istti kallida; kallidi otorettida; hessafe guye tana balida.

⁷ Hessa gishshas tani istta bolla gaammo mala yaana; maahe mala oge bolla zamada uttana.

⁸ Izi marati bonqqettida zardo mala ta istta shocananne puuzereththana; ta istta gaammo mala puuzereththa mittana; wora do7a mala duusereththana.

⁹ «Isra7eele derezoo! Ne ta bolla dendida gishshassinne nena maaddiza tanara ne eqettida gishshas ne dhayana;

¹⁰ Ne tana, ‹Taas kawonne halaqata imma› gadasa; histtiin ha7i nena ashshana kawoy awan dizee? Ne katamatan diza halaqati ubbay ha7i awan dizoo?

¹¹ Ta hanqettashe inttes kawo immadis; gido attiin tani boshankka iza shaaradis.

¹² «Efreeme qohoy doorettides; iza nagaraykka mazgaben xaafettides.

¹³ Miixay oykkida maccassa mala iza bolla metoy yaana; izi gidikko aadho erateththi baynda eeya naa; yelettiza wodey gakkiin ba aayey uloppe yelettanaas koyontta naa mala.

¹⁴ Tani nena duufo wolqqafe ashshana; hayqoppeka wozzana. Hayqoo! Ne wodhiza wolqqay awan dizee? Duufozoo! Neni as dhayssiza wolqqay awan dizee? Tani izas qadhettike.

¹⁵ Izi ba ishata giddon dure gidikkoka GODAAPPE kiitettida carkoy arshey mokkiza baggara bazzo biittafe dendidi yaana. Pulttoy to7ana; haaththa olaykka melana; izas diza al7o aqotay minjja keeththafe bonqqettana.

¹⁶ Samaariya asay bantta Xoossa bolla makkallida gishshas bantta qoho tookkana; mashshankka siifettana; qeeri nayti biitta bolla dinccettana; qanththara diza maccassata uloy daakettana» gees.