ሆሴኤ ቲንቢቴ 12 - Geeshsha Maxaafa

¹ Efreemey carko heenththanchcha; gallas kumeth arshey mokkiza bagga carko kaallees; wordonne makkalla darsees. Asoore deraara caaqo qaala gelees; wogara zayte Gibxe biitta yeddees.

² GODAY Yuhuda deraa bolla shiishshiza mootoy dees; izi Yaaqoobe iza hanota mala qaxxayana. Iza ooso mala izas immana.

³ Yaaqoobey buro ba aayey ulon dishe ba isha toho qirphe oykkides; Asa zawa gakkidaappe guye oossara baaxetides.

⁴ Kiitanchchara baaxetidi iza xoonides; iza sinththan teema demmanaas yeekki woossides; izakka Beetelen demmides; heen izara haasayettides.

⁵ GODAY Ubbaafe Wolqqama Xoossay izas erettida sunththay GODAA.

⁶ Hessa gishshas ne Xoossako simma; siiqonne tumu pirda lo7eththa oykka; ubba wode ne Xoossan ammanetta.

⁷ «Zal7anchchati wordo geeddaran bayzeettes; shocechchoka doseettes.

⁸ Efreemey, ‹Tani dure; ta duretadis; taas hayssi ubbay dishin ay qohoykka woykko nagaray ta bolla gakkenna› gi ceeqettees.

⁹ «Inttena Gibxe biittafe kessida GODAA intte Xoossay tana; layththa ba7aale gallas kase intte ooththiza mala intte intte dunkaanen daana mala ta ooththana.

¹⁰ «Tani kasetada nabetas yootadis; daro ajjuuta ta istta bessadis; istta baggara leemison yootadis.

¹¹ Gala7aaden iitateththi kumides; asaykka shufuro xalla. Gelgelan mirgota yarshos shiishshizoo? Istta yarshizasoy meqerettidi goshsha giddon korettida shuchcha mala gidana» gees.

¹² Yaaqoobey Mesphexoomiya baqatides; Isra7eeley machcho ekkanaas heen haggazides; izis immana ciloosha gishshas dors heemmides.

¹³ GODAY nabe baggara Isra7eele Gibxeppe kessides, nabeza baggara istta ishalsi oykkides.

¹⁴ Gido attiin Efreemey iza keehi hanqeththides; iza GODAY izi suuth gussida mala qohoza iza bolla gaththana; izi leqqiza leqoza gishshas izas bessizaaz qanxxana.