ሆሴኤ ቲንቢቴ 11 - Geeshsha Maxaafa

Isra7eeles Godaa Siiqo

¹ GODAY, «Isra7eeley buro yidhan dishin dosadis. Histtada ta naaza ta Gibxe biittafe xeygadis.

² Gido attiin ta istta xeygida keena istti taappe gede haakki haakki bida. Ba7aales yarsho shiishshida; iza misletasikka exaane cuwasida.

³ Efreemes kusheza oykkada hemeth tamaarsiday tana; Gido attiin istta paththiday tana gididayssa istti eribeettenna.

⁴ Ta istta qadheta wodoroninne siiqo sansalatan taakko shiishshadis; istta morgefe qambara denththadis; ziqqi ga hokkada istta mizadis.

⁵ «Histtiin istti maaroteththan gelontta gishshas duge Gibxe simmettennee? Asoorey istta haarennee?

⁶ Istta iita halchcho gishshas Morkke tooray istta katamata olana; istta katamata pengetakka menththereththi yeggana. Isttika mulera dhayana.

⁷ Ta derey taappe haakkanaas koyides; gidikkoka istti taakko Ubbaafe Wolqqama Xoossako waassiko ta istta ashshike.

⁸ «Efreemee! Ta nena wostta aggaaganee? Isra7eele ta nena wostta aaththa immanee? Ta kase Adaamaninne Xaboymen ooththidayssaththo wostta ne bolla ooththoo? Ta wozinay giddon qaaxxides; ta maaroteththay nena ashshana dendides.

⁹ Tani intte giddon diza Geeshsha Xoossa attiin as gidikke. Ta hanqora intte intteko yiikke; ta bosha hanqo intte bolla yeddike; Efreeme zaarada dhayssike.

¹⁰ «Tani GODAY istta ashshanaas xaaggiza gaammo mala tani ta qaala sissishin istti tana kaallana; ta nayti kokkorishe arshey mokkiza baggafe yaana.

¹¹ Gibxeppe kafo mala Asooreppe haraphphe mala piradhdhi yaana. Tani istta isttasohon woththana» gees.

Isra7eele Nagaranne Yuhuda Nagara

¹² GODAY, «Efreeme wordon Isra7eeleykka genen tana giddoththides; Yuhuday Xoossas haarettonttaade; ammanettida Geeshshazara eqettizaade» gees.