ሆሴኤ ቲንቢቴ 10 - Geeshsha Maxaafa

¹ Isra7eele asay daayida woyne miththa mala. Istti daro ayfe ayfida; ayfezi darida keena daro yarshosoho medhdhida. Istta biittaya lo7o ayfe immada istta duresida mala istti goynniza tuussata aleqessida.

² Istta wozinan geney kumides; istti ba ooththida geneza waaga ekkana. GODAY istti yarsho yarshizasohota ubbaa laallana. Istti goynniza eeqa xoossa tuussatakka shoddana.

³ Isttika, «Nuus kawoy deenna; nuni GODAA bonchchontta gishshas kawoy dizaakkoka izi nuus ay ooththanee?» gaana.

⁴ Istti wordora caaqqidi qaala geleettes; hada hidota ooththeettes; hessa gishshas kaththa giddon marzera diza haruma maatay mokkiza mala istta giddon gene pirday darana.

⁵ Samaariya kataman diza derey Beeti-Awenen diza mara mislen oosettida eeqa xoossas yayyees. Izappe bonchchoy qaaretti kichchida gishshas asay yeekkees. He eeqa misleza qeesetikka waasseettes.

⁶ He eeqa mislezi gita gidida Asoore kawos kiyateth imettana. Efreemey kawuyana; Isra7eeleykka bantta eeqa xoossa gishshas yeellatana.

⁷ Samaariya kawoy haaththa goppontto mala coo dhayana.

⁸ Isra7eeles nagara gidida Beet-Awenen goynnizasoho zumbullazi dhayana; okkaynne ohay mokkana; He wode derey zumata, «Nuna qottite!» zumbullatakka «Nuna kammite!» gaana.

Goday Isra7eele Asaa Qaxxayana

⁹ GODAY, «Isra7eele asawu! Gibi7an nagara ooththoosoppe hach gakkanaas Geba7oonen nagara ooththizayta olay wursibeennee?

¹⁰ Tani koyza wode istta qaxxayana; Istti ooththida dakko nagara gishshas qixaatey istta bolla gakkana; kawoteththati istta bolla dendana.

¹¹ Isra7eeley kath bukkanaas dosiza mehe mala; gido attiin lo7iza izi morge bolla qambara woththana; Efreeme waaxana; Yuhuday goyana; Yaaqoobe nayti waaxettidi biitta pixana.

¹² GODAY yiidi xilloteth intte bolla ira mala bukisana gakkanaas hanna intte iza koyza wode gidida gishshas oththaa goyite; inttes xilloteth zerite; mino siiqo ayfe maxite.

¹³ «Intte gidikko intte wolqqaninne intte ola qarata daroteththan ammanettidi iitateththi zerideta; nagara shiishshideta; wordoteththa ayfe mideta.

¹⁴ Shilimaaney Beeti-Arbeele geetettiza katama olan kase laallidayssaththonne Aayeta naytara gaththi biitta bolla dincereththi wursida mala shiroy deraa bolla yaana. Intte dere asaa bolla wolqqama olay yaana; Intte miixay laalettana.

¹⁵ Beetele! Ne iitateththi gita gidida gishshas ne bollaka hessaththo hanana; he gallassaya gakkiza wode Isra7eele kawoy mulera dhayana» gees.