ኢምባቆ ቲንቢቴ 3 - Geeshsha Maxaafa

Imbaaqo Woosa

¹ Nabe Imbaaqoy yeththan shiishshida woossa.

² Abeet GODAWU! Ta ne goobateththa gishshas siyadis. GODAWU ne oosoykka tana yashissides; neni ne ooso nu woden ooraththa; ne oosoti nu wodenkka erettana mala ooththarkkii! Hanqo wodekka maaroteth qopparkkii!

³ Xoossi Temaaneppe Geeshshayka Paaraane zuma bollafe yides; Iza bonchchoy salo kammi oykkides; Iza galataykka biitta bolla kumides.

⁴ Iza poo7oy awa arshe poo7o mala; awa xalqqey iza kusheppe kezides; iza wolqqayka heen qotettides.

⁵ Iita hargey izappe sinththara bides; hada hayqoykka iza geedo kaallides.

⁶ Izi eqqiin biittay qaaxxides; izi xeellidi asaa kokkorisides; Mernaas diza zumati laaleteth piski gida; Beniisofe diza zumatikka woddida; Iza ogey mernaassa.

⁷ Tophphiya dunkaaneti metotettishin, Midiyaameta duussasoy bul7akettishin ta beyadis.

⁸ GODAWU! Ne haaththata bolla hanqettadii? Ne hanqoy haaththa pulttota bolla dizee? Neni ne paratanne xooniza para-gaareta toggada kaaleththida wode abba bolla hanqettadii?

⁹ Neni ne wondafe giigsadasa; yiishshay nees yaana mala azazadasa; biitta phalqada haath kessadasa.

¹⁰ Zumati nena be7idi mannida; Haaththaa dambalay aadhdhi bides; abbay ceeqettides; abbaa dambalakka pude denththides.

¹¹ Ne pirisa yeddida ne yiishshatappenne xolqettiza ne toora poo7oppe dendidayssan arsheynne aginay ba dizason eqqi attida.

¹² Neni biitta bolla hanqon simerettadasa; deretakka hanqon yedhdhadasa.

¹³ Neni ne dere ashshanaasinne ne tiydaade ashshanaas kezadasa, iita dere kaaleththizaade liiqisadasa, hu7eppe toho xugunth gakkanaas kallo ashshadasa.

¹⁴ Gote carko mala nuna laallanaas yidayssa, aykkoy baynda manqoza geemara mittanaas amottizayssa, olanchchata halaqa gididayssa iza tooran iza zaara caddadasa.

¹⁵ Neni abba ne paratan yedhisiza woden ciimma abbay qaaxxees.

¹⁶ Tani siyadis; ta wozinaykka dagammides; Iza giirssafe dendidayssan ta metershay kokkorides. Babon taas maracey qaaxxides. Taas gulbatey kokkorides; gidikkoka nu bolla worajjiza dereza bolla metoy yaana gallas ta gencca naagays.

¹⁷ Balase geetettiza miththay ayfontta aggikokka woyne miththafe ayfey beettontta aggiko wogara miththika ayfontta aggiko goshsha gadey kath immontta aggiko Dorsi yiren dontta aggikokka Miizi zedhen dontta aggikokka

¹⁸ Tani ta GODAAN ufayettana; ta izan attida Xoossan ufayettana.

¹⁹ GODA Ta Xoossay taas wolqqa; ta tohota izi genessa toho mala minththo; izi tana dhoqqasohora hemeththana. Yexxizayta kaaleththizaades yeththa miishshan yexettida mazamure.