ኢምባቆ ቲንቢቴ 2 - Geeshsha Maxaafa

¹ Tani naage naagizason eqqana; miixa gimbe bolla kezada heen takkana. Ta oyshaas GODAY ay zaaro immanakko ta dizason daada iza naagana.

Imbaaqo Oyshaas Goday Immida Zaaro

² Xoossi Imbaaqos, «Waayisontta nababettana mala nees ajjuutan qonccidayssa saleeda bolla lo7eththa wooca xaafa.

³ Ne ajjuutazi baas imettida wode naagees; izikka wurseththa gishshas yootees, wordotenna. Gam7ana misatikkoka naaga; izi tumappe yaana; mulekka gam7enna.

⁴ «Hekko izi otorettides; iza amoy suure gidenna; xillo asi gidikko ammanon dees.

⁵ Dureteththi as baleththees; otoranchchas mulekka shemppoy deenna; izi duufo mala yora; wodhiza hayqo malakka kalo erenna; dere ubbaa shiishsheessinne di7i ekki bees.

⁶ Histtiin hessa mala asa bolla qidheninne kadhen asay, ‹Ba kaysi ekkida shaqaceza baas shiishshizaades, genen duretizaades aayye ana! Hessaththo ayde gakkanaas shiishshanee?› gi iza bolla miiccennee?

⁷ Ne acon yeggida asati ne qoppontta ne bolla dendettennee? Istti beeggidi nena daganththettenee? Hessafe guye ne istta kushen kundana.

⁸ Ne daro dere miish bonqqida gishshas hankko bonqqettonttayti nena bonqqana; ne asa suuth gussadasa; deraa, katamanne izan dizayta wursa dhayssadasa.

⁹ «Wordora baleththi ekkida miishshan baas daana keeth keexxizaadessinne ba morkke kusheppe attanaas ba keeth dhoqqasohon keexxizaades aayye ana!

¹⁰ Daro asa shemppoy dhayana mala qachchadasa; ne keeththa bollanne ne bolla dhayssizaaz ehadasa.

¹¹ Gimbe giddon shuchchi waassees; giddon goda eqqida miththatikka izas zaaro immeettes.

¹² «Suuth gussidinne iita ooththidi katama essizaytas aayye ana!

¹³ Asa oosoy ubbay taman xuugettana mala dereykka mela daaburana mala GODAY Ubbaafe Wolqqama Xoossay ubbaa woththibeennee?

¹⁴ Abbay kumiza mala biittay GODAA gitateth eron kumana.

¹⁵ «Asa kalloteth beyanaas ba laggeta ushshu ushshizaadessinne istti uyidi maththottana gakkanaas woyne ushshu duuqqizaades aayye ana!

¹⁶ Neni bonchcho gishshas yeellatana; hessika ha7i taray nees gidida gishshas uyada gandigara; ne kallotta. GODAA ushachcha kushen diza hanqo xuu7ay ne bolla simmana; kase nees diza bonchchoza kawushshateththan laammana.

¹⁷ Ne Libaanoose bolla ooththida geney nena mittana; neni medosata dhayssidayssi zaari nena daganththana; hessika ne asa suuth gussida gishshassinne dereta, katamatanne isttan dizayta ne ubbaa dhayssida gishshassa.

¹⁸ «Asa kushey massi giigsida eeqanne wordo haasayza misles ay go7ay dizee? Histtiin iza ooththidaadey barkka ba ooson ammanettiza gishshassinne isttika haasayanaas dandayontta eeqa ooththiza gishshassa.

¹⁹ Miththaa, ‹Ne beegga!› Shemppoy baynda shuchchaaka, ‹Ne denda!› gizaades aayye ana! Tumukka izi tamaarsana dandayzee? Hekko izi bollara worqqaninne biran tiyettides; izas shemppoyka deenna.

²⁰ GODAY gidikko ba Geeshsha keeththan dees. Biitta bolla diza derey wurikka iza sinththan co7u go» gides.