ሜቴ ማጻፋ 49 - Geeshsha Maxaafa

Yaaqoobey Ba Naytas Yootida Bassa Qaala

¹ Hessafe guye Yaaqoobey ba attuma nayta xeygidi, «Sinththafe inttes hananayssa tani inttes yootana mala haa shiiqite.

² «Intteno Yaaqoobe naytoo! Issife haa shiiqidi siyite; intte aaway Isra7eeley inttes yootizayssa ezgite.

³ «Oroobeele ta naa bayrazoo, neni ta wolqqa; ta minoteththas koyro; neni bonchchonkka wolqqankka ubbaafe aadhdhaasa.

⁴ Neni bixalay baynda para mala; ne dosidaa hanaasa; neni ne aawa hiith kezadasa; ne aawa hiiththaaka tunisadasa. Hessa gishshas halaqateththi nees bessenna.

⁵ «Simooninne Lewey ishantta; istti iita ooththanaas mashshanne toora ekkeettes.

⁶ Tani istta zoreteththan gelikke; tani istta shiiqosonkka uttike. Ays giikko istti ba hanqon as wodhidanne bana ekka ekka giin boorata gildayi qanxxida.

⁷ Istta iita hanqoynne istta meqeththa iitateththi qanggettidaaz gido! Tani istta Yaaqoobe asaa giddon laallana; Isra7eele biittan dharccana.

⁸ «Yuhuda ne ishati nena galatana; neni ne morkketa morge naaqqa oykkana; ne aawa nayti nees hokkidi ziggana.

⁹ Yuhuda neni wodalla gaammo mala; ta naazoo! Neni shankkati oykkidi, cogotti ichchida gaammo mala. Neni asi bana bosheththanaas koyontta macca gaammo mala.

¹⁰ Dere haarizaadey yaana gakkanaashe, kawoteththaa algay Yuhudappe, halaqateththa guufey iza keeththafe shaakettenna. Qasse dere asay izas azazettana.

¹¹ Izi ba hare kaththa giddon ba hare gutteka doorettida kaththan qachchana. Izi ba haath woyne ushshan, ba may7o qasse woyne maadhan meeccana.

¹² Iza ayfey woyne ushshafe aadhdhi zo7ana; iza achchayka maaththafe aadhdhi boottana.

¹³ «Zaabilooney abba doonan daana; iza biittay daro markabetas shemposo gidana; iza zaway Sidoona gakkana.

¹⁴ «Yisakoorey nam7u goday go7ettiza mino hare mala.

¹⁵ Izi ba shempizasoy lo7o gididayssanne ba derey ufayssizaaz gididayssa be7idi, tooho tookkanaas ba zokko ziqqi histtidi, aylleteththa ooso ooththana.

¹⁶ «Daaney Isra7eele qommotappe issaas pirdiza daanna gidana.

¹⁷ Daaney para toggidaadey guye kundana mala para qirphe dukkiza oge doonan diza haso shooshsha.

¹⁸ «Abeet Godoo! Ta ne maado naagays.

¹⁹ «Gaadey bonqqizaytan deshettana; gido attiin izikka istta geedo kaallidi istta bonqqana.

²⁰ «Aaseere maadday aakkana; kawotas izi lo7o quma immana.

²¹ «Niftaalemey qashettontta yeda diza, lo7o laaqqata yeliza genessa.

²² «Yooseefey melontta pultto haaththa achchan tokettada, izi ayfey lasha bollara alalettana gakkanaas ayfe immiza miththay mala.

²³ Wondafeza dukkizayti iza bolla worajjida; ba wondafenkka gooddi gooddi caddeettes.

²⁴ Gido attiin Yaaqoobe Godaa Xoossa wolqqan iza heemmiza Isra7eele zaallan iza wondafey minnides; iza mino qeseykka pilatides.

²⁵ Nena maaddiza ne aawa Xoossan Ubbaa Dandayzayssaninne nena anjjiza Xoossan pude bollafe beettiza maadoninne garsa biittafe beettizan anjjon qasseka aayi uloppenne dhanththafe beettiza anjjon nena anjjana.

²⁶ Ne aawa anjjoy beni wodeppe hanno gakkanaas minni diza zumatappenne mernaa zumata ubbaafe aadhdhees. Hessa gishshas hayssi ha anjjoy wurikka Yooseefe gakko. Ba ishata bolla halaqa gidida Yooseefe bolla wodhdho.

²⁷ «Biniyaamey bonqqiza kana suyte mala. Ba shankkatidayssa maalado mees; ba di7idayssa omars gishereththees» gides.

²⁸ Hayti tammanne nam7u Isra7eele qommota; qasse istta aaway istta issaa issaa istta hano mala isttas bessiza anjjo hessaththo anjjides.

Yaaqoobe Hayqo

²⁹ Hessafe guye izi isttas, «Tani ta aawatan gaaggana gays; tana Hiite as Efroone gaden diza gongolon, ta aawatara moogite.

³⁰ Hessika Kanaane biittan, Mamire achchan diza Makipheele geetettiza gongolo; hayssika Abrahaamey moogos Hiite as Efrooneppe gadaara gaththi shammida gongolo.

³¹ Abrahaameynne iza machcheya Saaray heen moogettida; Yisaaqinne iza machcheya Irbiqaykka heen moogettida; tani qasse Liya heen moogadis.

³² He gadezinne izan diza gongoloy Hiitetappe shamettidayssa» gi azazides.

³³ Yaaqoobey ba naytas azazo wursidaappe guye ba toho pude ba hiixan shiishshi ekkidi hayqqidi ba aawatan gaaggides.