ሜቴ ማጻፋ 11 - Geeshsha Maxaafa

Baabiloone Gimbe

¹ Biitta bollan diza asi wuri koyro issi doonanne issi qaala haasayees.

² Asay arshey mokkiza bagga simmidi bishe Sana7oore geetettiza biittan issi dembaso demmidi heen uttides.

³ Istti issoy issaa, «Haa yiite; xuube medhdhidi ane taman xuuggoos» giidi istta shuchcha gishshas xuube, urqqa gishshas shida

⁴ ekkidi, «Haa yiite! Nu sunth xeygisanaassinne qasse nuni ha biitta ubbaa bollan laalettontta mala issi gita katamanne xeeray pude salo gakkiza issi gimbe ane keexxoos» gida.

⁵ Gido attiin GODAY asay keexxida gita katamazanne gimbeza beyanaas duge wodhdhidi,

⁶ «Hekko istti issi asa! Qasse istti wurikka issi qaalan haasayeettes; istti ha7i hayssa ooso oykkidaappe guye, istti baas ooththanaas qoppidayssa istta digganay deenna.

⁷ Haa yiite! Ane nu duge wodhdhidi istti issoy issaa qaala erontta mala istta qaala walakkoos» gides.

⁸ Hessa gishshas GODAY istta hessafe biitta ubbaa bollan laalliin istti he gita katama ooththizayssa aggaagida.

⁹ GODAY biitta asaa qaalaa heen walakkida gishshas he katamaya Baabile geetettadus. GODAY istta hessafe biitta ubbaa bollan laallides.

Seeme Zereth

¹⁰ Seeme zereththi hayssafe kaallidi xaafettidayssa; dhayssa haaththi simmiin nam7u layththafe guye Seemes layththay 100 gidiin Seemey Arfaakiside yelides.

¹¹ Seemey Arfaakiside yelidaappe guye 500 layth de7ides; hara attuma naytakka macca naytakka yelides.

¹² Arfaakisidey 35 layth de7idi Sheelahe yelides;

¹³ Arfaakisidey Sheelahe yelidaappe guye 403 layth de7ides; hara attuma naytanne macca naytakka yelides.

¹⁴ Sheelahey 30 layth de7idi Eboore yelides;

¹⁵ Sheelahey Eboore yelidaappe guye 403 layth de7ides; hara attuma naytanne macca nayta yelides.

¹⁶ Eboorey heedzdzu tammanne oyddu layth de7idi Peeleege yelides;

¹⁷ Eboorey Peeleege yelidaappe guye 430 layth de7ides; hara attuma naytanne macca nayta yelides.

¹⁸ Peeleegey 30 layth de7idi Era7e yelides;

¹⁹ Peeleegey Era7e yelidaappe guye 209 layth de7ides; hara attuma naytanne macca nayta yelides.

²⁰ Era7ey 32 layth de7idi Saruge yelides;

²¹ Era7ey Saruge yelidaappe guye 207 layth de7ides; hara attuma naytanne macca nayta yelides.

²² Sarugey 30 layth de7idi Naakoore yelides;

²³ Sarugey Naakoore yelidaappe guye 200 layth de7ides; hara attuma naytanne macca nayta yelides.

²⁴ Naakoorey 29 layth de7idi Taara yelides.

²⁵ Naakoorey Taara yelidaappe guye 119 layth de7ides; hara attuma naytanne macca nayta yelides.

²⁶ Taaray 70 layth de7idi Abraame, Naakoorenne Haaraane yelides.

Taara Zereth

²⁷ Taara yeletay hayssafe kaallidi xaafettidayssa; Taaray Abraame, Naakoorenne Haaraane yeliin Haaraaney Looxe yelides.

²⁸ Haaraaney ba aaway Taaray paxa dishin ba yelettida Kaladaaweta biittan Uure geetettiza gita katamaan hayqqides.

²⁹ Abraameynne Naakoorey nam7ayka machchida; Abraame machchey sunththi Soora; qasse Naakoore machchey sunththi Milka; Milkay Haaraane naa; Haaraaney Milkissinne Yiskaanissi aawa.

³⁰ Sooray maynne; izis nay baawa.

³¹ Taaray ba naa Abraame, ba naaza Haaraane naa Looxenne ba naa Abraame machcho Soora ekkidi keziin istti issife Kanaane biitta baanaas Uure geetettiza Kaladaaweta katamappe dendida; gido attiin istti Kaaraane geetettiza katama gakkanaas biidi heen de7ida.

³² Taaray 205 layth de7idi Kaaraanen hayqqides.