ኢዝራ ማጻፋ 8 - Geeshsha Maxaafa

Di7etti Bidasoppe Izrara Simmida Asaa

¹ Kawo Arxekisisi kawoteththan ayssiza woden tanara Baabiloone dereppe simmida korapinneta sunththi hayssafe kaalli dizayssa;

² Finihaase zereththatappe Gershoome, Itamaare zereththatappe Daaneela, Dawite zereththatappe Haxushe,

³ izikka Shakaaniya naa, Paaroose zereththatappe Zakaraasinne istta soo asatappe 150 addeti xaafettida;

⁴ Pahaate-Mo7aabe zereththatappe Zarahiya naa Elho7enayeynne 200 attumasati,

⁵ Zaato zereththatappe Yahazi7eele naa Shakaaniyara 300 attumasati,

⁶ Adiine zereththatappe Yoonataane naa Ebeedenne 50 attumasati,

⁷ Elaame zereththatappe Attaaliya naa Yesha7iyanne izara 70 attumasati,

⁸ Shafaaxiya zereththatappe Mika7eele naa Zabaadiyanne izara 80 attumasati,

⁹ Iyo7aabe zereththatappe wurseththata sunththay Yihi7eele naa Abdiyunne izara 218 attumasati,

¹⁰ Baane zereththatappe Yospiya naa Shalomitenne izara 160 attumasati,

¹¹ Bebaye zereththatappe iza naa Zakaraasanne 28 attumasati,

¹² Azgaade zereththatappe Haqoxe naa Yohanaanenne izara 110 attumasati,

¹³ Adonqaame zereththatappe wurseththata sunththay, Elfaleexe, Yi7i7eele, Shama7enne isttara 60 attumasati,

¹⁴ Biguwaye zereththatappe Uutaye, Zakurenne isttara 70 attumasati simmida.

Izray Xoossa Keeththan Ooththiza Lewe Zereththata Demo

¹⁵ Tani Izray kumeththa dereza Ahiwa goggiza haaththa shaafaa ach shiishshada heen heedzdzu gallas gam7idos; he shiiqozan qeesetappe attiin hara Lewe zereththati bayndayssa eradis;

¹⁶ hessa gishshas tani deraa kaaleththiza uddufun asata El7ezeere, Ar7eele, Shama7e, Elnataane, Yaribe, Elnataanenne, Naataane, Zakaraasanne Mashulaame; qasseka nam7u astamaareta Yoyaaribenne Elnataane geetettizayta xeygisadis.

¹⁷ Isttaka Kaspiya deren halaqa gidida Iddoko kiittadis; Iddoynne iza dabboti Xoossa Keeththan ooththiza oosanchchati nuus Xoossa Keeththan ooththana as yeddana mala ooththadis.

¹⁸ Gita Xoossa wolqqay nunara diza gishshas istti lo7o erateththi dizayssa Mahile zereththatappe Isra7eele naa Lewe zare gidida Sherebiya yeddida; izikka 18 ba attuma naytanne ba ishata kaaleththi ekkidi nuukko yides.

¹⁹ Qasse Meraare zereththatappe Hashaabiyanne Yesha7iya geetettiza 20 dabbotara nuukko yeddida.

²⁰ Iza bolla gujjidi isttas kase aawati Leweta zereththata maaddana mala kawo Dawitinne izara issife ooththiza daannati piqaade immida; heen 220 oosanchchati deettes; isttika ba sunththan xaafettida.

Xoomanne Woosa

²¹ Xoossi nu oge lo7eththana mala, nunanne nu nayta qasseka nuus dizaaz ubbaa naagana mala iza sinththan nunateththaa ziqqi ooththidi woossanaas Ahiwa shaafa achchan xooma awajjadis.

²² Hayssafe sinththan ta kawo Arxekisisi erisiza wode «Nu Xoossay izan ammanettizayta ubbaa anjjees; iza aggizayta gidikko keehi qaxxayees» gaada ta qonccisida gishshas nunara ogen gaaggana morkketappe nuna naagana mala kawoza wottadaratanne toga asata imma gaada oychchidaakko yeellatanakoshin.

²³ Hessa gishshas Xoossay barkka nuna naagana mala xoomaninne woosan shiiqidos; izikka nu woosaa siyides.

Xoossa Keeththas Shiiqida Imota

²⁴ Kaaleththiza qeeseta giddofe Sherebiya, Hashaabiyanne harata 10 asata dooradis.

²⁵ Hessafe guye kawozinne iza zoranchchati, Shuumetinne heen diza Isra7eele asati wuri nu Xoossa Keeththa oosos immida bira, worqqanne hara dumma dumma miishshata ubbaa meezaanen woththada isttas immadis.

²⁶ Ta isttas immida Xoossa Keeththa miishshati hayssafe kaalli dizayta; 22,000 kilo gidiza bira, 70 kilo gidiza birappe oosettida xeetu miishshata, 3,400 kilo gidiza worqqa;

²⁷ Osppun kilonne 400 giraame gidiza worqqafe oosettida shel7etanne worqqafe oosettida malay xolqiza xarqimalappe oosettida 2 shel7eta.

²⁸ Tanikka isttas, «Intteninne ha miishshati Xoossas dummatidayta; biraynne worqqay intte aawata Xoossaassa; hessika intte intte sheneninne ufayssan immiza dumma imota.

²⁹ Yerusalaamen diza Xoossa Keeththa gaaththan ba kifilen kifilen diza qeese halaqata, Leweta daannatassinne Isra7eele zereththa halaqata sinththan intte meezaanen woththi immana gakkanaas lo7eththi naagite» gadis.

³⁰ Hessafe guye qeesetinne Leweti geeddarettida bira, worqqanne hara Xoossa Keeththa miishshata Yerusalaamen diza Xoossa Keeth efanaas alaafeteth ekkida.

Asay Yerusalaame Simo

³¹ Koyro aginay gelida mala tammanne nam7anththo gallas Yerusalaame baanaas nunikka Ahiwa shaafa achchafe dendidos; nu Xoossaa kushey nunara diza gishshas nu biza ogen diza morkketappenne pangatappe nuna ashshides.

³² Yerusalaame gakkidi heen heedzdzu gallas shempidos;

³³ Oydanththo gallas biidi bira, worqqanne Xoossa Keeththa miishshata Xoossa Keeththan geeddaridi Uriya naa qeese Mermotes immidos; Finihaase naa El7ezeerey, qasseka Lewe Iyaaso naa Yozabaadeynne Binuwe naa No7aadiyay izara issife deettes.

³⁴ Ubbaa miishshay heerakka taybettidaappe guye geeddarettidi wogara xaafettides.

³⁵ Hessafe guye di7eteththafe simmidayti Isra7eele Xoossas yarsho gidizayssa 12 mirgota, 96 dharshota, 77 dharsho laaqqata qasseka nagara digganaas shiiqiza yarshos 12 orgeta; hayssi ubbay Xoossas xuugetti shiiqiza yarsho.

³⁶ Kawoza azazo iza garsan poliza daannatassinne Efiraaxise shaafa pinththan diza dere ayssizaytas immida; isttika deraanne Xoossa Keeththa ooso maaddida.