ሂዚቄላ ቲንቢቴ 35 - Geeshsha Maxaafa

Eedoome Bolla Yootettida Tinbite

¹ GODAA qaalay taakko yiidi,

² «Haysso asa nawu! Ne sinth hanqettashe Seyre zumaakko zaara; izas tinbite yoota.

³ Neni izas Ubbaa Haariza GODAY, ‹Haysso Seyre zumazoo! Ta ne bolla dendadis; tani ta kushe ne bolla denththana; nena bulanne asi bayndaso kessana.

⁴ Ne katamata tani laallana; ne bulattana. Hessafe guye tani GODAA gididayssa neni erana.

⁵ « ‹Isra7eeleta bolla gakkiza qixaatey keehi cammiin istti banttana gakkiza metoza ekkiza wode neni beni lancceyo oykka uttada ne istta mashshas gaththadasa.

⁶ Ubbaa Haariza GODAY tani de7o Xoos gididayssan caaqqays; ne suuththi gukkana mala ta nena izas aaththa immana; izikka nena yedeththana; suuth gussizayssa ne ixxontta gishshas suuth gussizayti nena yedeththana.

⁷ Tani Seyre zuma bulanne asi bayndaso kessana; izi bolla pude kezizaytanne duge wodhdhizayta ta diggana.

⁸ Ne zumata ta ahan kunththana; mashshan siifettidayti ubbay ne zumatan, ne zulletaninne ne haaththi goggizaso ubbaan kundana.

⁹ Ta nena mernaas bula histtana; ne katamati duussaso gidettenna; hessafe guye tani GODAA gididayssa intte erana› gees ga.

¹⁰ «Tani GODAY heen dishin intte, ‹Hayti nam7u kawoteththatinne nam7u dereti nuus gidana; nunikka istta laattana› gideta.

¹¹ Hessa gishshas Ubbaa Haariza GODAY tani de7o Xoos gididayssan caaqqays; intte istta ixxiza gaason, intte istta bolla qonccisida hanqonne qanaate keena ta intte bolla pirdana; ta intte bolla pirdiza wode tanateththay istta giddon erettana mala ta ooththana.

¹² Hessafe guye Isra7eele zumata gishshas neni, ‹Istti asi bayndaso gidida; nu istta maana mala nuus imettida› gaada ne kadhen yootidayssa tani GODAY siyidayssa neni he wode erana.

¹³ Neni ta bolla otorettadasanne xalateththan haasayadasa; tanikka hessa siyadis.

¹⁴ «Ubbaa Haariza GODAY, ‹Kumeththa biittay ufayettiza wode ta nena bulasana.

¹⁵ Isra7eele keeththaa xinxxoy bula gidida wode ne ufayettida gishshas tanikka ne bolla hessaththo ooththana; haysso Seyre zumazoo! Neninne kumeththa Eedoomey bulattana; hessafe guye tani GODAA gididayssa istti erana› gees» gides.