ሂዚቄላ ቲንቢቴ 32 - Geeshsha Maxaafa

Paaroone Gishshas Zilalettida Zilas

¹ Nuni di7ettida tammanne nam7anththo layththan, tammanne nam7anththo aginan, koyro gallassan GODAA qaalay taakko yiidi,

² «Haysso asa nawu! Gibxe kawo Paaroones zilalashe, « ‹Neni kawoteththa giddon gaammo mala; abba giddonkka miimintte mala; neni shaafatan bobolccu gaasa; haaththata ne tohon wadhdhaasa; pulttota uullosaasa.

³ « ‹Ubbaa Haariza GODAY: daro dere shiishshada, ta giteza ne bolla yeggana; istti nena ta gitezara goochchi kessana.

⁴ Ta nena biitta bolla yeggana; demba bollaka miccana; salo kafoti ubbay ne bolla uttana mala ta ooththana; wora do7ati ubbay nena yiiqeti mi kallana.

⁵ Tani ne asho zumata bolla laallana; zulletakka ne ahan kunththana.

⁶ Biittaa ne suuththan ta caphisana; neeppe goggizayssi zulleta kumidi zumata gakkanaas diza oge ubbaa kammana.

⁷ Ta nena dhayssiza wode salota goozana; istta xoolinttetakka dhumisana; awakka shaaran kammana; aginaykka ba poo7o diggana.

⁸ Salon poo7isiza poo7ota ubbaa, ne bolla ta dhumisana; ne biittaa bolla ta dhuma ehana› gees.

⁹ «Ne bolla yida bashshaa ta sissiza wode ne erontta biittan kawoteththata giddon, daro asata wozina ceecisana.

¹⁰ Daro asay ne bolla gakkida meton dagammana mala ta ooththana; tani ta mashshaa istta sinththan shodda seessishin ne bolla gakkida hanoza gaason istta kawoti dagaman nozhzhu gaana; neni kundiza gallas issoy issoy ba shemppos yashshan ayfe qiphon kokkorana.

¹¹ «Ubbaa Haariza GODAY Gibxe kawos, ‹Baabiloone kawo mashshay ne bolla yaana.

¹² Kawoteththata ubbaafe keehi menxe iita gidida, wolqqama asata mashshan ne shiishshida olanchchati kundana mala ta ooththana; Gibxe otoreteththaa istti kundisana; izis cora olanchchatakka dhayssana.

¹³ Daro haaththa matan diza izi wudeta ta dhayssana; hessafe guye asa tohon yedhettettenna; mehe tohoy uullosenna.

¹⁴ Histtada ta izi haaththata xillisana; izi shaafata zayte mala ta gogisana.

¹⁵ Ta Gibxe bulasishin biittayn dizay ubbay dhayshin, heen diza ubbaa tani shocishin, tani GODAA gididayssa istti he wode erana› gees» gides.

¹⁶ Ubbaa Haariza GODAY, «Hessi ubbay izi gishshas zilalettiza zilassa; kawoteththata macca nayti zilalana; Gibxessinne izi cora olanchchata gishshas zilalishe koyzana» gees.

Gibxes Wurseththa Kayo

¹⁷ Nuni di7ettida tammanne nam7anththo layththan, he aginan, tammanne ichchashanththo gallassan GODAA qaalay taakko yiidi,

¹⁸ «Haysso asa nawu! Gibxe olanchcha corata gishshas yeekka! Izonne wolqqama kawoteththata macca nayta duge duufon gelizaytara issife duge biitta gars gelththa.

¹⁹ Neni isttas, ‹Intte haratappe aadhdhidi lo7eetii? Duge wodhdhada ammanonttaytara issife ichcha› ga yoota.

²⁰ Istti mashshan siifettidayta giddon kundana; mashshay shodettides; iza ba daro oosanchchatara issife gooshettu.

²¹ Duufo giddon wolqqama halaqati Gibxe gishshassinne izira zuppetizayta gishshas istti duge wodhdhidi, ‹Mashshan hayqqidaytaranne ammanonttaytara issi bolla ichchida› gaana.

²² «Asoorey ba kumeththa olanchchatara dawus; izippe mashshan kundidaytanne siifettidayta duufon doodetta uttadus.

²³ Istta duufoy ciimma olla giddon dees; izi olanchchati izi duufo yuushon korettida; paxa dizayta biittan shiro denththidayti ubbay shukettida; mashshankka wurida.

²⁴ «Elaama heen dawus; izi olanchchati ubbay izi duufo yuuyi aadhdhi deettes; ubbatikka shukettida; mashshankka hayqqida; paxa dizayta biittan shiro denththida ubbati ammanontta biitta gars gelida; duge biitta gars gelidaytara issife yeella may7i gelida.

²⁵ Izi duufo yuushon diza kumeththa olanchchatara shukettidayta giddon hiixay izis giigettides. Istti ubbay ammanonttaytanne mashshan siifettidayta; istta shiroy shemppora paxa dizayta biittan worekettida gishshas duge duufon gelizaytara issi bolla yeella may7ana; shukettidayta giddon istti ichchana.

²⁶ «Mesheekeynne Tubaale duufoy bantta olanchchata duufon doodetti uttana; istti ubbayka ammanonttayta gidi uttidi shemppora paxa dizayta biittan ba shiro denththeththida gishshas mashshan hayqqida.

²⁷ Daro layththafe kase hayqqida ola qarati bantta mashsha borkotidi, bantta gondalle bantta tira bolla oykkidi, bantta kumeththa ola miish ubbaara duufon gelidayta mala bonchchon moogettibeettenna. Ha olanchchati shemppora paxa dizayta biittan diza wolqqama asata bolla shiro denththida gishshas istta nagara qixaatey istta meqeththa bolla shempana.

²⁸ «Paaroone! Nenikka hessaththo meqqana; mashshan siifettidaytaranne ammanonttaytara ne issi bolla ichchana.

²⁹ «Eedooma heen de7awus; izi kawotinne izo haarizayti ubbay heen deettes; istti wolqqara dizayta gidikkoka mashshan siifettidaytara, duge duufon gelidaytaranne ammanonttaytara issi bolla ichchida.

³⁰ «Pudeha bagga haarizaytinne Sidoonati ubbay heen deettes; hayssafe kase istti ba wolqqan ammanettidi shiro denththidayta gidikkoka shukettidaytara issife yeellan kundida; mashshan siifettidayta ammanonttaytaranne duge duufon wodhdhidaytara issife yeella may7i ichchana.

³¹ «Paarooneynne iza olanchchati ubbay istta be7ana; mashshan siifettida ba olanchchata ubbaa kayoppe izi minettana.

³² Tani hayssafe kase kawoteththati ubbay Gibxe kawos yayyana mala shemppora paxa dizayta biittan shiroy aakkana mala koykkoka Paarooneynne iza olanchchati ubbay mashshan siifettidaytaranne ammanonttaytara issife ichchana; tani Ubbaa Haariza GODAY hayssa yootadis» gides.