ሂዚቄላ ቲንቢቴ 30 - Geeshsha Maxaafa

Gibxe Bolla Yaana Qixaate

¹ GODAA qaalay taakko yiidi,

² «Haysso asa nawu! Hayssa mala gaada tinbite yoota: Ubbaa Haariza GODAY, « ‹Wu! Wuy› ga waassa; ‹He gallassays aayye ana!› ga.

³ Gallassay matides! GODAA gallassay gakkides! He gallassay shaara gallassa; kawoteththata ubbaas bashsha gallassa.

⁴ Gibxe bolla olay yaana; Tophphiya bollaka tuggay yaana. Daroti Gibxen shuketti kundana; izi aqotay bonqqettana; izi yochchatikka laalettana.

⁵ «Tophphiyaynne Puuxey, Luudeynne Arabey, Liibiyaynne caaqo qaala biitta asay Gibxera issife mashshan wurana.

⁶ «Ubbaa Haariza GODAY, ‹Gibxera zuppetizayti kundana; iza otorettiza minoteththay dhayana; Migidooleppe biidi Asiwa gakkanaas, istti mashshan hayqqana› gees.

⁷ Bula biittata giddon istti aadhdhi bula gidana; istta katamatikka laalettida katamata giddofe issaa gidana.

⁸ Tani Gibxen tama oyththiza wode, izo maaddizayti ubbay kundiza wode, tani GODAA gididayssa istti he wode erana.

⁹ «He gallas ta qasttanneti markaben biidi badhdhi ga uttidasohoppe kessanaas Tophphiya daganththana; Gibxey dhuman mitettiza wode istta ceecey oykkana; tumappe he gallassay yaana».

¹⁰ Ubbaa Haariza GODAY, «Baabiloone kawo Nabukadanaxoore kushen qooday baynda Gibxe dere asaa ta dhayssana.

¹¹ Kawoteththata ubbaafe menxe iita gidida izinne iza oosanchchati biittayo dhayssanaas yaana mala ooththana; bantta mashsha Gibxe bolla shoddidi biittayo aha xalla histtana.

¹² Abbaye shaafa tani melissana; biittayokka iita asatas bayzana; allagata kushen biittayonne izin diza ubbaa ta bula histtana; tani GODAY hayssa yootadis.

¹³ «Eeqa xoossata ta dhayssana; Memppisan diza misleta ta dippi histtana; hayssafe guye Gibxen halaqatanay deenna; biittay bolla ta yashshateth kiittana.

¹⁴ Tani Phaxiroose biitta bula histtana; Xaanoose bolla tama yeddana; Teebeese bolla qixaate yeggana.

¹⁵ Gibxes miixa gidida Siina bolla ta bashshaa gussana; qooday baynda Teebeese asaa ta dhayssana.

¹⁶ Tani Gibxe bolla tama eeththana; Siiney ceecen bul7akettana; Teebeesey dambalan mitettana; Memppisay duuxxontta ceece giddo gelana.

¹⁷ Heeliyootenne Buubastte naateththati mashshan siifettana; he katamatikka di7ettana.

¹⁸ Tani Gibxe qambara menththiza wode Xaafinaasen gallassay qammana; hessafe guye iza otorettida izi minoteththay kundana; iza shaaran kamettana; izi gutatikka di7ettana.

¹⁹ Hessa gishshas ta Gibxe bolla ta qixaate ehana; isttika tani GODAA gididayssa he wode erana» gides.

Gibxe Kawo Kundeth

²⁰ Nuni di7ettida tammanne issinththa layththan, koyro aginan, laappunththa gallassan GODAA qaalay taakko yiidi,

²¹ «Haysso asa nawu! Tani Gibxe kawo qese menththadis; izi paxana mala iza qesey koolettibeenna; woykko izi mashsha oykki dandayana mala iza kushey maqqan koolettibeenna.

²² Hessa gishshas Ubbaa Haariza GODAY, ‹Tani Gibxe kawo Paaroone bolla dendadis; izas paxa qesezaranne meqo qesezara nam7aa gaththa menththana; iza mashshay iza kusheppe kessi ekki wodhdhana mala ta ooththana.

²³ Tani Gibxe asaa kawoteththata giddon laallana; hara dereta giddonkka zerana.

²⁴ Tani Baabiloone kawo qese minththada ta mashshaaka iza oyththana. Gido attiin Paaroone qeseza ta menththana; izikka ba morkkeza sinththan iita madunxida asa mala toqqana.

²⁵ Baabiloone kawo qese ta minththana; gido attiin Paaroone qesey daaburana; tani ta mashshaa Baabiloone kawo kushen oyththiin izikka qaaththishin tani GODAA gididayssa istti erana.

²⁶ Ta Gibxeta kawoteththata giddon laallana; dereta giddonkka zerana; hessafe guye tani GODAA gididayssa istti he wode erana› gees» gides.