ሂዚቄላ ቲንቢቴ 27 - Geeshsha Maxaafa

Xiroosis Zilalettida Zilas

¹ GODAA qaalay taakko yiidi,

² «Haysso asa nawu! Xiroosi gishshas zilala.

³ Abban gelizaso pengen dizaarissinne daro abba gaxatan diza deretara zal7iza Xiroosis, Ubbaa Haariza GODAY, «Hanne Xiroosee! ‹Neni nena keehippe lo7o› gadasa;

⁴ Ne zaway abba giddon dees; nena ooththidayti keehi lo7eththi ooththida.

⁵ Ne sanqqata ubbaa, Sanireppe yida xiiddan ooththida; markabe tuussati Libaanooseppe yida zigappe giigida.

⁶ Baasaaneppe yida wolappe markabe laaggiza miish ooththida; Qophiroose zawappe yida ziga miththaa, danggarsa zaalen aleqessidi ne wuygeza ooththida.

⁷ Ne Markabeza xibabey Gibxe biitta laynoppe oosettides; hessi nena bandira mala go7ides. Salo misatizanne ochcha teera misatiza ne sharati Qophirooseppe yida.

⁸ Markabe sololissizayti Sidoonappenne Arwaadeppe yidayta; hanne Xiroose, ne markabe laaggizayti loohida ne asata.

⁹ Gebaaleppe loohida daannatinne hiillanchchati ne markabeta koolanaas ne giddon deettes; abba bollara biza markabetinne markabe laaggizayti ubbay heregettidi nenara zal7ettanaas neekko yeettes.

¹⁰ «Paarise, Luudenne Puuxe asati wottadara gididi ne olanchchata giddon nena haggazeettes; nees teema gidana mala bantta gondallenne bantta birata qoobe ne godaa bolla kaqqida.

¹¹ Arwaadenne Heleeke asati ne gimbeta ubbasora naageettes; Gamaadeppe yida asati ne gimbe giddon deettes; istti bantta gondalle ne gimbeza yuushon kaqqida; ne puulateththaa kumeth ooththida.

¹² «Keehi daro gidida ne dureteththa gaason Tarseesey nenara zal7en gayttadus; iza biranne birata, qorqoronne irsaase ehada ne shaqaceta laame ekkawus.

¹³ «Yaawaaney, Tubaaleynne Mesheekey nenara issife zal7eettes; aylletanne xarqimalappe oosettida miishshata shaqacera laammeettes.

¹⁴ «Beeti-Togarma asati caana parata, ola paratanne baqulota shaqacen laammeettes.

¹⁵ «Erodoose asati zal7en nenara gayttida; daro haruro dereti ne shaqaceta danggarsa zaaleninne Zophe geetettiza miththan laammeettes.

¹⁶ «Keehi daro gidida ne aqota gaason Aaraamey nenara zal7en gayttadus; ne shaqacekka beluren, ochcha teera misatiza carqqan, xibaben, lo7o laynon, heleloninne zo7o inqqun laammeettes.

¹⁷ «Yuhudaynne Isra7eeleykka attontta nenara zal7en gayttida; istti Miniteppe yida gistte, malido, ees, zaytenne balasaane geetettiza dhalliza zayte ne shaqacezara laammeettes.

¹⁸ «Ne daro dureteththanne ishalo duussa gaason Damasqo asati Helboone woyne ushshinne Zahaare dere dorsa iske shiishshidi nenara zal7ettida.

¹⁹ «Oozeelen diza Daaneynne Girke asay ne dumma dumma miishshaa shammida; istti ne miishshaara laammanaas aleqettida birata, dumma dumma sawotanne qarafa ehida.

²⁰ «Dadaaney ne shaqace gilaasera laammawus.

²¹ «Arabiya halaqatinne Qeedaare halaqati ubbay ne laggeta; istti laaqqa, dharshonne deyshe ehidi nenara zal7eettes.

²² «Saaba zal7anchchatinne Eraa7ime zal7anchchati nenara zal7etteettes; doorettida qimame ubbaa, al7o shuchchinne worqqa shiishshidi shaqacen nenara zal7etteettes.

²³ «Kaaraane, Kaane, Edene, Saaba, Asoorenne Kilmaade zal7anchchati nenara zal7etteettes.

²⁴ Heytikka ne giya giddon lo7o may7o, salo misatiza kaabba, xibabe, hessaththoka birata qalamen phoollizanne minni dadettida sigaajja ehidi nenara zal7etteettes.

²⁵ «Tarseese markabeti ne shaqace caani caani efida; neni abba giddon deexo caana caanettada daasa.

²⁶ Markabe sololissizayti ciimma abba giddon nena efida; gido attiin arshey mokkiza bagga carkoy abba giddon nena menththereththides.

²⁷ Markabe daafay ne bolla gakkiza gallas ne aqotay, ne shaqaceynne ne zal7e miishshay, ne markabeza sololissizayti, markabezan bizaytinne markabe oosanchchati, ne zal7anchchatinne ne wottadarati ubbay, markabezan dizayti ubbay, duge ciimma abban mitettana.

²⁸ Ne markabe sololissizayti waassishin, abba gaxan dizayti yarkiyarkeettes.

²⁹ Markabe sololissizayti ubbay bantta markabeta oli baana; markabe sololissizaytinne markaben dizayti ubbay wodhdhidi abbaa gaxan eqqana.

³⁰ Bantta qaala dhoqqu histtidi camo yeeho nees yeekkana; bantta hu7en gudulla qolidi bidinththa bolla bululettana.

³¹ Ne gishshas kayottidi bantta hu7e bulusana; maaqaka may7ana; wozinappe ceecidi camo yeeho nees yeekkana.

³² Ne gishshas istti waassishe yeekkana; istti nees zilalishe, ‹Abban mitetti co7u giday, Xiroose malay oonee?› gaana.

³³ Ne shaqacey abbaafe pinni kezida wode, daro dereta kalssaasa; neni ne gita aqotaninne ne shaqacezan biittan diza kawoteththata duresadasa.

³⁴ Ha7i gidikko ciimma haaththan abba giddon meqeretta kundadasa; ne caanaynne caanettida asay ubbay nenara abban mitettida.

³⁵ Abba gaxan de7iza asay ubbay ne bolla gakkidayssa be7idi dagammida. Istta kawotikka hirgan kokkorida; istta ayfesoy laamettides.

³⁶ Hara kawoteththata giddon diza zal7anchchati ne bolla ay keena wayqidoo! ne wurseththay daganththizaaz gidides; ne mernaas beettaka» gides.