ሂዚቄላ ቲንቢቴ 24 - Geeshsha Maxaafa

Distte Leemiso

¹ Nuni di7ettida uddufunththa layththan, tammanththa aginan, tammanththa gallassan GODAA qaalay taakko yiidi,

² «Haysso asa nawu! Hach hanno gallassayo dumma mazgaba; Baabiloone kawoy Yerusalaame ha gallassayn dooddi oykkides.

³ Ha makkallanchcha keeththaas hayssafe kaalli diza leemisoza yoota; Ubbaa Haariza GODAY, « ‹Birata distte tama bolla woththa; hessafe guye izan haath gujja.

⁴ Gedappenne missafe qanxxada, lo7o lo7o asho muxada, doorettida meqeththata cukereththada izan yegga.

⁵ Wudezappe modhdho dors ekka shukka; iza meqeththaa doyssanaas eeso mith darsa woththa; sudhdhu gaanaashe gakkanaas doyssa; meqeththazikka kaxxo› gees.

⁶ «Ubbaa Haariza GODAY, ‹Shi7ida birata distteys, izi shi7i yeddonttaaris, suuth gussida katamays aayye ana! Shaakkanaas saama yeggontta issaa issaa kessada kays ashsha.

⁷ Izi giddon asa suuththi dees; zaalla bolla qoncceson gussadus attiin biittay kammanaas dandayza gaden gussabeekku.

⁸ Ta hanqoy eexxana malanne halo kessanaas taas injjetana mala, izi kammanaas dandayontta mala, izi suuththaa zaalla bolla qoncceson gussadis› gees.

⁹ «Hessa gishshas Ubbaa Haariza GODAY, ‹Suuth gussida katamays aayye ana! Tani iza xuugettana mith guuppana.

¹⁰ Eeso mith doora; tamaakka eeththa. Sawo gujjada ashoza lo7eththa doyssa; meqeththazikka micco.

¹¹ Shi7azi seerana malanne birata shi7azi taman xuugettana mala, mela disttey seellana gakkanaas, tamazi bonqqanaashe gakkanaas cooceza bolla woththa.

¹² Daro wolqqay wurikkoka doorettida birata shi7i tamankka yeddana dandayenna.

¹³ « ‹Ne tuniday ne baalage oosonna; ta hanqoy ne bolla polettanaashe gakkanaas hayssafe guye ne geesh gidakka; gaasoykka tani nena ne tunateththaafe geeshshana koyiinkka ne geeyana dosabeekka.

¹⁴ « ‹Tani GODAY hayssa yootadis; ta ooththanaas wodey gakkides; ta guye giikke; qadhettikenne sidhikke; ne oge malanne ne ooso mala ne bolla pirdettana› gees» gides.

Hiziqeela Machchey Hayqo

¹⁵ GODAA qaalay taakko yiidi,

¹⁶ «Haysso asa nawu! Neni ne ayfe shempisiza miish tani ta hanqon neeppe ekka diggana; neni gidikko waassofa; yeekkofa; afunththika gussofa.

¹⁷ Ne qaala ziqqi histtada kayottashe milala attiin hayqqidayssas yeekkofa; ne hu7eppe quraace diggofa; ne tohoppe caamma kessofa; ne doona gaththa kammofa; shochchika mooppa» gides.

¹⁸ Tanikka wonttara deraas hessa yootadis; he gallassa omarsa wode ta keeththa aayeya hayqqadus; wonteththa gallas maalado GODAY tana azazida mala ooththadis.

¹⁹ Derezi tana, «Nuus ay kiita yootana koyada ne hayssa ooththidaakko nuus yootikkii?» gi oychchides.

²⁰ Tanikka deraas zaarada, «GODAA qaalay taakko yiidi,

²¹ Isra7eele keeththas Ubbaa Haariza GODAY, ‹Intte ceeqettiza wolqqa, intte ayfe shempisizasozanne intte wozinas ufays gidida Xoossa Keeththaa tayssa ta tunisana. Intte yeggi bida intte macca naytinne attuma nayti mashshan wurana.

²² Ta ooththida mala he wode intteka ooththana; intte doona gaththi kammeketa; shochchika meekketa.

²³ Intte hu7eppe quraace diggeketa; intte tohoppe caamma kesseketa; intte intte nagaran gilqana; issoy issaara tookki shempana attiin kayos utteketanne yeekkeketa.

²⁴ He woden Hiziqeeli inttes malata gidana; izi ooththida mala intteka ooththana› gides. Ubbaa Haariza GODAY tana gididayssa hayssi haniza wode intte erana» gees.

²⁵ GODAY tana, «Haysso asa nawu! Bantta wolqqa, bantta ufayssa, bantta bonchcho, istta ayfes shemposonne istta wozinas ufays gidida istta macca naytanne attuma nayta gaththa ta isttafe ekkiza wode,

²⁶ he gallas kessi ekki attida asi he paapunththaa yootanaas neekko yaana.

²⁷ He gallas ne doonay doyettana; nenikka izara haasayana; hessafe guye ne doona duude gidakka; ne isttas malata gidana; tani GODAA gididayssa istti he wode erana» gides.